តម្លៃផ្ទះជាសកលមានតម្លៃខ្ពស់កប់ពពក! ប្រសិនបើអ្នកគ្រាន់តែត្រូវការផ្ទះរស់នៅផ្ទាល់ខ្លួន តើអ្នកគួរចាប់ផ្តើមពេលណា?

នេះជាពេលវេលាដ៏ល្អបំផុត នេះជាពេលវេលាដ៏អាក្រក់បំផុត នេះជាយុគសម័យនៃប្រាជ្ញា នេះជាយុគសម័យនៃភាពល្ងង់ខ្លៅ នេះជាយុគសម័យនៃទំនុកចិត្ត នេះជាយុគសម័យនៃការគ្មានទំនុកចិត្ត នេះជារដូវកាលនៃពន្លឺ នេះជារដូវកាលនៃភាពងងឹត នេះជារដូវផ្ការីកនៃក្តីសង្ឃឹម នេះជារដូវរងានៃភាពអស់សង្ឃឹម យើងមានអ្វីទាំងអស់នៅនឹងមុខ យើងគ្មានអ្វីទាំងអស់នៅនឹងមុខ យើងទាំងអស់គ្នានឹងឡើងទៅឋានសួគ៌ យើងទាំងអស់នឹងសំដៅទៅផ្លូវផ្សេងទៀត។

"រឿងនិទាននៃទីក្រុងពីរ" របស់លោក Dickens គឺជាចំណារពន្យល់ដ៏ល្អបំផុតនៃពេលវេលារបស់យើងរួចទៅហើយ។ នៅក្នុងយុគសម័យល្អបំផុតនេះ យើងអាចតាមដានព័ត៌មានថ្មីៗពីទូទាំងពិភពលោកក្នុងពេលវេលាជាក់ស្តែង និងមានសមត្ថភាពក្នុងការដោះស្រាយរាល់វិបត្តិ។ ប៉ុន្តែនៅក្នុងយុគសម័យដ៏អាក្រក់បំផុតនេះ យើងក៏បានមើលឃើញពីស្ថានភាពសោកនាដកម្មនៃជនខិលខូចនៅក្នុងពិភពលោក ហើយគម្លាតរវាងអ្នកមាននិងអ្នកក្រកំពុងតែកើនឡើង។ ក្នុងពេលជាមួយគ្នានេះ ពិភពលោកហាក់ដូចជាកាន់តែមានរឿងល្អៗនិងរឿងចម្លែកៗ។

ពិភពលោកកំពុងស្ថិតក្នុងវិបត្តិសេដ្ឋកិច្ច ប៉ុន្តែតម្លៃផ្ទះកំពុងតែឡើងខ្ពស់

នៅឆ្នាំ ២០២០ កូវីដ-១៩ បានចាប់ផ្តើមបង្កការបំផ្លិចបំផ្លាញលើពិភពលោក។ បន្ទាប់ពីការរាតត្បាតជាបន្តបន្ទាប់វានៅតែជាឧបសគ្គធំបំផុតចំពោះការអភិវឌ្ឍសេដ្ឋកិច្ចពិភពលោក។ ប៉ុន្មានថ្ងៃមុននេះ មានអ្នកចូលរួមនិងអ្នកជំនាញសេដ្ឋកិច្ចមានវត្តមាននៅ វេទិកាសេដ្ឋកិច្ចឌែលហ្វីលើកទី ៦ នៅប្រទេសក្រិក ក៏បានលើកឡើងផងដែរថាការងើបឡើងវិញនៃសេដ្ឋកិច្ចពិភពលោកពីកូវីដ-១៩ នឹងចំណាយពេលយ៉ាងតិច ២ ឆ្នាំ។

នៅឆ្នាំ ២០២១ ពិភពលោកនៅតែកំពុងប្រឈមមុខនឹងវិបត្តិសេដ្ឋកិច្ចធ្ងន់ធ្ងរបំផុត ចាប់តាំងពីសង្គ្រាមលោកលើកទី ២ មក ហើយការអភិវឌ្ឍគ្រប់ស្រទាប់វណ្ណៈក៏ត្រូវបានគ្របដណ្ដប់ដោយស្រទាប់អ័ព្ទ ដោយមានទាំងវិស័យអចលនទ្រព្យផងដែរ។ តាមពិត នៅកំឡុងនេះឆ្នាំមុន អ្នកជំនាញផ្នែកអចលនទ្រព្យជាច្រើនបានយកចិត្តទុកដាក់ចំពោះទីផ្សារជាខ្លាំង។ ប៉ុន្តែជំងឺកូវីដ-១៩បានធ្វើឱ្យផ្នែកភាគច្រើននៃពិភពលោកឈានទៅរកការរាំងស្ទះ សហគ្រាសជាច្រើនបានបិទទ្វារ មនុស្សរាប់សិបលាននាក់បានបាត់បង់ការងារ ហើយទីផ្សារអចលនទ្រព្យក៏បានធ្លាក់ចុះជាខ្លាំងផងដែរ។ ចំនួនមនុស្សដែលស្នើសុំឱ្យធនាគារបន្ធូរបន្ថយរយៈពេលសងប្រាក់កម្ចីបញ្ចាំ បានកើនឡើងយ៉ាងខ្លាំង។

ទោះជាយ៉ាងណាក៏ដោយ វិបត្តិនេះមិនមានរយៈពេលយូរទេ ហើយវិស័យអចលនទ្រព្យក៏ស្រាប់តែមានភាពប្រសើរឡើង៖

នៅសហរដ្ឋអាមេរិក ក្នុងខែមករាឆ្នាំនេះ តម្លៃផ្ទះជាមធ្យមនៃទីក្រុងធំៗ បានកើនឡើង ១១,២% ប្រៀបទៅនឹងឆ្នាំមុន ដែលកំណត់ជាការកើនឡើងខ្ពស់បំផុតតាំងពីខែកុម្ភៈ ២០០៦ មក ។ នៅចក្រភពអង់គ្លេស តម្លៃផ្ទះបានកើនឡើង ៧,៥% ក្នុងឆ្នាំកន្លងមក។ នៅនូវែលសេឡង់ តម្លៃផ្ទះបានកើនឡើង ១៩% ក្នុងរយៈពេល ១២ ខែដំបូងរហូតដល់ចុងខែមករា។ នៅឆ្នាំ ២០២០ តម្លៃផ្ទះនៅប្រទេសកូរ៉េខាងត្បូង នឹងកើនឡើងច្រើនបំផុតក្នុងរយៈពេល ៩ ឆ្នាំ ដោយមានការកើនឡើងជាង ៥% ។ តម្លៃផ្ទះនៅទួរគី នឹងកើនឡើងជាង ២០% ក្នុងឆ្នាំ ២០២០ ដែលឈរនៅលំដាប់លេខ ១ លើពិភពលោក។

លើសពីនេះទៀត តម្លៃផ្ទះកំពុងតែឡើងថ្លៃនៅប្រទេសអាឡឺម៉ង់ ប៉េរូ កាណាដា ស៊ុយអែត ស្លូវ៉ាគី រុស្ស៊ី និងប្រទេសមានសេដ្ឋកិច្ចពិភពលោកសំខាន់ៗដទៃទៀត។

និន្នាការបែបនេះគ្រាន់តែជាការបំប៉ោង ឬឱកាសល្អមួយ?

តើនិន្នាការនេះយ៉ាងដូចម្តេចទៅ? វាត្រូវបានគេមើលឃើញក្នុងរបាយការណ៍ពីរនៅក្នុងទស្សនាវដ្តី“The Economist” ។

នៅថ្ងៃទី ១០ ខែមេសា គេហទំព័ររបស់ទស្សនាវដ្តី The Economist បានរាយការណ៍ថា តម្លៃផ្ទះពិតប្រាកដនៅក្នុងប្រទេសអភិវឌ្ឍន៍ទាំង ២៥ ដែលខ្លួនបានតាមដាន បានកើនឡើងជាមធ្យម ៥% ក្នុងរយៈពេល ១២ ខែដំបូងដែលជាការកើនឡើងលឿនបំផុតចាប់តាំងពីឆ្នាំ ២០០៦ មក។

ប៉ុន្តែកាលពីឆ្នាំមុន ទស្សនាវដ្តី The Economist បានព្យាករណ៍ថាអតិផរណាតម្លៃផ្ទះនៅលើពិភពលោកនឹងធ្លាក់ចុះដល់ ២,៥% ក្នុងឆ្នាំ ២០២០ ហើយលទ្ធភាពនៃការធ្លាក់ចុះតម្លៃទូទៅគឺ ២៥% ។ ប៉ុន្តែជារួមតម្លៃផ្ទះទំនងជានឹងធ្លាក់ចុះរួចទៅហើយ។

នៅក្នុងអត្ថបទវិភាគជាច្រើន យើងអាចឃើញថាមូលហេតុនៃការធ្វើឱ្យតម្លៃផ្ទះឡើងខ្ពស់បែបនេះគឺ ដើម្បីទប់ទល់នឹងផលប៉ះពាល់នៃកូវីដ-១៩នៅក្នុងឆ្នាំកន្លងមក ធនាគារកណ្តាលពិភពលោកបានបើក“ ការបញ្ចេញទឹកធំ” ។

នៅក្រោមលក្ខខណ្ឌអំណោយផលនៃគោលនយោបាយរូបិយវត្ថុរលុង អត្រាការប្រាក់នៃប្រាក់កម្ចីទិញផ្ទះបានថយចុះយ៉ាងខ្លាំង។ តាមពិតអំណាចទិញលុយនឹងធ្លាក់ចុះយ៉ាងឆាប់រហ័ស អ្វីគ្រប់យ៉ាងនឹងកើនឡើងហើយលុយនឹងគ្មានប្រយោជន៍។ ដូច្នេះវាចាំបាច់ណាស់ សម្រាប់សាធារណៈជនជំនួសប្រាក់ ដោយរូបិយប័ណ្ណរឹងដែលមិនងាយរំលោះតម្លៃ។

ដូចដែលយើងបានដឹងហើយថា អចលនទ្រព្យមានសុវត្ថិភាពខ្ពស់នៅក្នុងផលិតផលវិនិយោគ ហើយវាជាការវិនិយោគងាយស្រួលបំផុតសម្រាប់មនុស្សសាមញ្ញ ដូច្នេះវាបានក្លាយជាចំណុចក្តៅគគុកនៅក្នុងភ្នែករបស់សាធារណជន។

ជាមួយនឹងការលើកកម្ពស់ជាបន្តបន្ទាប់នៃវ៉ាក់សាំងកូវីដ-១៩ និងការបន្ធូរបន្ថយគោលនយោបាយរាំងស្ទះនៅក្នុងប្រទេសផ្សេងៗ អ្នកទិញផ្ទះលើសកលលោកអាចនឹងមានចំនួនកើនឡើងបន្ថែមទៀត។ ដូច្នេះហើយ វាមិនសមហេតុផលទេដែលរំពឹងថាទីផ្សារអចលនទ្រព្យសកលនឹងធ្លាក់ចុះយ៉ាងឆាប់រហ័ស។

ប្រសិនបើអ្នកគ្រាន់តែត្រូវការផ្ទះរស់នៅផ្ទាល់ខ្លួន តើអ្នកគួរចាប់ផ្តើមយ៉ាងដូចម្តេច?

ក្នុងកំឡុងពេលមានជំងឺកូវីដ-១៩នេះ តើពេលណាជាឱកាសល្អបំផុតសម្រាប់អ្នកដែលត្រូវការទិញផ្ទះ?

តាមពិត មានសំណើមិនពិតមួយចំនួននៅក្នុងការពិភាក្សានេះ។

តើ "ត្រូវការ" គឺជាអ្វី? វាជាតម្រូវការចាំបាច់ដែលត្រូវមានផ្ទះផ្ទាល់ខ្លួន។ នោះគឺមានន័យថា មិនថាពិភពលោកផ្លាស់ប្តូរយ៉ាងណាទេ មនុស្សត្រូវការទិញផ្ទះដើម្បីបំពេញសេចក្តីត្រូវការរបស់គ្រួសារទាំងមូល។ តើពួកគេត្រូវការរកពេលវេលាសមស្របសម្រាប់ទិញផ្ទះដែរឬ? គ្រប់ពេលទាំងអស់គឺជាពេលវេលាដ៏ល្អបំផុត ដរាបណាអ្នកអាចទិញបាន។ ការកើនឡើងនិងការធ្លាក់ចុះនៅក្នុងពិភពវិនិយោគគឺវាហួសពីសមត្ថភាពរបស់យើង។ សត្វចាប Chaffinch មានភាពរីករាយផ្ទាល់ខ្លួន ដូច្នេះប្រសិនបើវាត្រូវរៀនពីរបៀបហោះហើរដូចជាសត្វក្ងាន អ្វីដែលវាទទួលបានមិនមែនជាភាពរីករាយទេ តែជាការឈឺចាប់។

តើផ្ទះប្រភេទណាដែលល្អបំផុតកំឡុងពេលឥឡូវនេះ? សម្រាប់អ្នកទិញផ្ទះលើកដំបូង ផ្ទះល្អបំផុតជាផ្ទះសមនឹងខ្លួនអ្នក មានន័យថាផ្ទះត្រូវនឹងហិរញ្ញវត្ថុនិងតម្រូវការបច្ចុប្បន្ន។ ពេលខ្លះមិនមានកញ្ចប់ផ្ទះល្អឥតខ្ចោះទេ វាអាចចំណាយពេលច្រើនឆ្នាំដើម្បីអភិវឌ្ឍ ប៉ុន្តែវាមិនអីទេប្រសិនបើវាស្ថិតក្នុងវិសាលភាពនៃការទទួលយកបាន។

ជាការពិតណាស់ ប្រសិនបើអ្នកខំប្រឹងបន្តិច វាជាការប្រសើរក្នុងការទិញអចលនទ្រព្យដែលមានទីតាំងតំបន់បរិស្ថានល្អ និងមានសាលារៀនដែលមានគុណភាពខ្ពស់ ឬអចលនទ្រព្យនៅជិតមជ្ឈមណ្ឌលពាណិជ្ជកម្ម។ យ៉ាងណាមិញ អចលនទ្រព្យទាំងនេះមានសុវត្ថិភាពជាងទីតាំងដ៏ទៃទៀត ហើយជាអចលនទ្រព្យមានតម្លៃយូរអង្វែង ដែលត្រូវតម្រូវការទីផ្សារគ្រប់ពេល។

ដូច្នេះនៅក្នុងយុគសម័យដ៏ល្អនេះ តើអ្នកនឹងទិញផ្ទះផ្ទាល់ខ្លួនរបស់អ្នកឬមើលអ្នកដទៃទិញវាវិញ?

ជាចុងក្រោយ អ្នកនិពន្ធចង់ប្រាប់អ្នកអានរាល់គ្នាថា មិនថាទិញផ្ទះសម្រាប់ការកាន់កាប់ដោយខ្លួនឯង ឬការវិនិយោគទេ ដរាបណាលក្ខខណ្ឌអនុញ្ញាត អ្នកគួរតែចេះបែងចែកអចលនទ្រព្យដែលមានគុណភាពខ្ពស់ឱ្យបានឆាប់តាមដែលអាចធ្វើទៅបាន។ បើមិនដូច្នោះទេ ទ្រព្យសម្បត្តិរបស់មនុស្សសាមញ្ញដូចពួកយើង នឹងហួតលឿនជាងទឹកជំនន់ពិភពលោកនេះ។

ប្រភព៖ Compass

និពន្ធដោយ ៖ Sunnie         ប្រែសម្រួលដោយ៖ Malinda         នាយក / ផលិតករ ៖ Nicole

គេហទំព័រអន្តរជាតិខមភើស៖ កម្ពុជា | សិង្ហបុរី | អារ៉ាប់រួម | ថៃ | ហ្វីលីពីន | មីយ៉ាន់ម៉ា | ឡាវ