ក្តៅៗ ! នាយឧត្តមសេនីយ៍ នេត សាវឿន បញ្ជាឱ្យផ្អាកការផាកពិន័យច្បាប់ចរាចរណ៍រយៈពេល១៥ថ្ងៃសិន

រាជធានីភ្នំពេញ ៖ លោកឧត្តមសេនីយ៍ឯក ស ថេត ស្នងការនគរបាលរាជធានីភ្នំពេញបានថ្លែងតាមរយៈសារជាសំឡេងនាថ្ងៃទី០១ ខែធ្នូ ឆ្នាំ២០២០ នេះថា ដោយមានការណែនាំពីឯកឧត្តមនាយឧត្តមសេនីយ៍សន្តិបណ្ឌិត នេត សាវឿន អគ្គស្នងការនគរបាលជាតិលោកបានណែនាំឱ្យផ្អាកការអនុវត្តច្បាប់ចរាចរណ៍ផ្លូវគោក (ផ្អាកផាកពិន័យ) រយៈពេល១៥ថ្ងៃសិន ។

លោកឧត្តមសេនីយ៍ឯក ស ថេត ក៏បានបញ្ចាក់ផងដែរថា បើទោះបីត្រូវផ្អាកការផាកពិន័យ ប៉ុន្ដែមន្ដ្រីនគរបាលចរាចរណ៍ទាំងអស់ ត្រូវប្រចាំការនៅគោលដៅដដែលហើយជួយសម្រួលចរាចរណ៍ជូនប្រជាពលរដ្ឋដែលធ្វើដំណើរនៅក្នុងរាជធានីភ្នំពេញតែប៉ុណ្ណោះ ។ ជាមួយគ្នានេះលោកឧត្តមសេនីយ៍ស្នងការថាការពិនិត្យជាតិអាល់កុលនៅពេលយប់ក៏ត្រូវធ្វើការផ្អាកដូចគ្នាផងដែរ ៕

អត្ថបទដោយ ៖ សំណាង