ស្វាយរៀងប្លែកហើយ !​ ស្ងាត់ៗដីប្រែហក់ឡើងថ្លៃគិតស្មានមិនដល់

ខេត្តស្វាយរៀង គឺជាខេត្តមានសក្តានុពលពាណិជ្ជកម្មក្តី ប៉ុន្តែក្រឡេកទៅមើលវិស័យសំណង់និងអចលនទ្រព្យវិញ ឃើញថាខេត្តមានសញ្ញាវិជ្ជមានច្រើន និងមានសកម្មភាពអភិវឌ្ឍលើបណ្តាគម្រោងសាងសង់ដដែល ។ 

បច្ចុប្បន្នខេត្តស្វាយរៀង មានភាពរីកចម្រើនគួរឱ្យកត់សម្កាល់ និងមានភាពទាក់ទាញមិនចាញ់ខេត្តដទៃទៀតទេ ។ សំណង់លំនៅដ្ឋាន អគារខ្ពស់ៗសម្រាប់បម្រើដល់វិស័យទេសចរណ៍ និងពាណិជ្ជកម្ម មិនមានការផ្អាកសកម្មភាពសាងសង់អ្វីទេ ។

ខេត្ដស្វាយរៀង ជាប់ព្រំប្រទល់ប្រទេសវៀតណាមដែលមានច្រកព្រំដែនអន្ដរជាតិមួយល្បីឈ្មោះគឺច្រកព្រំដែនបាវិត ដែលជាដង្ហើមសេដ្ឋកិច្ចដ៏សំខាន់របស់ប្រទេសកម្ពុជា ។ ជាមួយនឹងគ្នានេះ ខេត្តស្វាយរៀងក៏ទទួលបានគម្រោងមួយចំនួនដែលធ្វើអោយតម្លៃដីក្នុងខេត្តមួយនេះកាន់តែកើនឡើងជាបន្តបន្ទាប់ដូចជា ៖

ទី១- ផ្លូវល្បឿនលឿនភ្នំពេញ-បាវិត

គ្រោងចំណាយថវិកាប្រមាណជាង២ពាន់លានដុល្លារសហរដ្ឋអាមេរិកក្នុងសាងសង់ដែលសព្វថ្ងៃក្រសួងក៏ដូចជារាជរដ្ឋាភិបាលត្រូវការពេលសិក្សាពិនិត្យឱ្យបានគ្រប់ជ្រុងជ្រោយលើជម្រើសផ្លូវចំនួន៣ មុននឹងធ្វើការសម្រេចថា តើត្រូវជ្រើសរើសយកជម្រើសផ្លូវមួយណា?

គម្រោងនេះគឺជាកត្តាមួយ ដែលអាចទាក់ទាញវិនិយោគបន្ថែមដូចជា រោងចក្រ និងគម្រោងវិនិយោគផ្សេង ព្រោះបាវិតជាតំបន់សេដ្ឋកិច្ចពិសេស តំបន់រោងចក្រ តំបន់ផែស្ងួត ហើយចំពោះវិស័យដីធ្លីនិងតម្រូវការកាន់តែកើនឡើង ហើយវាថែមទាំងបង្កើតការងារកាន់តែច្រើនសម្រាប់ប្រជាជននៅក្នុងស្រុក ។

ទី២- តំបន់សេដ្ឋកិច្ចពិសេស៤៥០ហិកតា 

ក្រុមហ៊ុនចិនមួយគ្រោងនឹងសាងសង់ តំបន់សេដ្ឋកិច្ចពិសេសបៃតងទំហំ ៤៥០ ហិកតា តម្លៃជាង ១ ពាន់លានដុល្លារ នៅក្រុងស្វាយរៀង ដែលតំបន់សេដ្ឋកិច្ចពិសេសនេះ ស្ថិតនៅចម្ងាយ ៤ គីឡូម៉ែត្រពីទីប្រជុំជនភាគខាងត្បូងនៃផ្លូវជាតិលេខ១ ដោយប្លង់មេនៃតំបន់ឧស្សាហកម្មបង្ហាញថា គម្រោងនេះស្ថិតនៅលើច្រាំងខាងជើងនៃទន្លេ ៕

អត្ថបទដោយ ៖ សំណាង