ពិតជាស្មានមិនដល់មែន ! ដីនៅក្រុងបាវិតឡើងថ្លៃសាហាវកប់ពពកព្រោះតែ...

តម្លៃដីធ្លី និងសំណង់អគារនានានៅក្រុងបាវិត កំពុងហក់ឡើងយ៉ាងលឿន ជាពិសេសតំបន់ទីប្រជុំជនក្នុងសង្កាត់បាវិតតែម្ដង ដោយមានជនជាតិចិនបានមកដេកចាំទិញដីសាងសង់អគារខ្ពស់ៗសម្រាប់ធ្វើអាជីវកម្ម ដូចជា ខុនដូ សណ្ឋាគារ ផ្ទះសំណាក់ កាស៊ីណូ ក្លិបកម្សាន្ដ ផ្សារទំនើប និងតូបលក់ដូរជាដើម ។

សព្វថ្ងៃនេះ អាជីវកម្មជនជាតិចិនបានបើកដំណើរការជាបន្ដបន្ទាប់ ដោយលើកស្លាកយីហោជាអក្សរចិនព្រោងព្រាតនៅតាមដងផ្លូវតូចធំគួរឲ្យភ្ញាក់ផ្អើលជាប្រវត្តិសាស្ត្រ មិនធ្លាប់មានសម្រាប់ទឹកដីខេត្តស្វាយរៀង។ មិនត្រឹមតែប៉ុណ្ណោះ ក៏មានភ្ញៀវទេសចរជាតិ និងអន្តរជាតិកំពុងធ្វើដំណើរយ៉ាងមមាញឹកចេញចូលមិនដាច់នៅច្រកទ្វារព្រំដែនអន្តរជាតិបាវិត ដែលធ្វើសកម្មភាពសេដ្ឋកិច្ចរីកចម្រើនគួរឲ្យកត់សម្គាល់ដែរ ។

លោក សេង សិលា អភិបាលក្រុងបាវិត ធ្លាប់មានប្រសាសន៍កន្លងមកថា ការរីកចម្រើននៃក្រុងបាវិត ដោយសារតែមានជនជាតិចិនចូលមកច្រើន ។ ជាក់ស្ដែងគម្រោងអភិវឌ្ឍន៍ទីក្រុងរណបហេងហេង ដែលជាគម្រោងរបស់លោកឧកញ៉ា លឹម ហួ លើផ្ទៃដីប្រមាណជិត១០ហិកតា ភាគច្រើនសាងសង់ជួលឲ្យជនជាតិចិន និងវិនិយោគឲ្យក្រុមហ៊ុនចិន ។ លោកថា ៖«បើគ្មានចិនចូលមកវិនិយោគ ឬជួលនិងទិញទេ ក៏មិនអាចដំណើរការបានដែរ» ។

លោកបញ្ជាក់ថា ៖« ដីនិងអចលនទ្រព្យមានតម្លៃហក់ឡើងខ្ពស់ គឺដោយសារមានចិនមកប្រមូលទិញ ហើយចិនទិញតែក្នុងទីប្រជុំជនក្នុងសង្កាត់បាវិតទេ ជាពិសេសជិតកាស៊ីណូក្បែរព្រំដែន ដូចជា នៅបរិវេនកាស៊ីណូម៉ុកប៉ាយ តម្លៃចាប់ពី១លានដុល្លារទៅ៣លានដុល្លារក្នុង១ហិកតា, ដីជាប់កាស៊ីណូ ឡឺម៉ាកាវ តម្លៃ៤លានដុល្លារក្នុង១ហិកតា » ។

លោកបញ្ជាក់បន្ថែមថា ៖« សម្រាប់ដីទំនេរ ឬដីស្រែ ក៏កើនឡើងដែរ បើធៀបនឹងឆ្នាំមុនៗ ក្នុងនោះ បើដីមិនទាន់ចាក់បំពេញ ក្នុង១ម៉ែត្រការ៉េ តម្លៃ១០ទៅ២០ដុល្លារ, ដីក្រវាត់ក្រុងតាមដងផ្លូវវាង ផ្លូវកុងតឺន័រ តម្លៃ៣០ដុល្លារ ក្នុង១ម៉ែត្រការ៉េ, ដីជាប់ផ្លូវតាមបណ្តោយផ្លូវជាតិលេខ១ តម្លៃ៨០ដុល្លារ ក្នុង១ម៉ែត្រការ៉េ និងដីជាប់ថ្នល់ជាតិលេខ១ ក្នុងសង្កាត់បាទី សង្កាត់ច្រកម្ទេស ក្នុង១ម៉ែត្រការ៉េ តម្លៃ២០ដុល្លារ ។

ចំណែកសកម្មភាពអាជីវកម្មពុះដីឡូត៍ក៏កំពុងមានទីផ្សារដែរ គឺចាប់ផ្ដើមស្ទុះឡើង ក្រោយពីបោះឆ្នោតអាណត្តិទី៦នេះរួចមក ពិសេសបន្ទាប់ពីមានជនជាតិចិនចូលមកវិនិយោគនិងស្នាក់នៅរកស៊ីលក់ដូរ និងធ្វើការងារច្រើននៅទីនេះ ៕

អត្ថបទដោយ ៖ សំណាង