គម្រោងស្ពានបេតុង ឫស្សីកែវ-ជ្រោយចង្វារ បានសម្រេចការសាងសង់បាន ៥០ ភាគរយហើយ

ខមភើសអចលនទ្រព្យ·សេចក្តីរាយការណ៍ព័ត៌មាន ~  យោងតាមការបញ្ជាក់របស់មន្ទីរសាធារណការ និងដឹកជញ្ជូននៃរាជធានីភ្នំពេញកាលពីពេលថ្មីៗនេះបានឱ្យដឹងថា គិតមកត្រឹមថ្ងៃសុក្រទី២៣ ខែកក្តដាកន្លងទៅនេះ គម្រោងសាងសង់ស្ពានបេតុងឫស្សីកែវ-ជ្រោយចង្វារ ដែលត្រូវបានដឹងរួចមកហើយថាជាគម្រោងដែលឆ្លងកាត់តាមបឹងទន្លេសាប ពីផ្លូវជាតិលេខ៥ ម្តុំឃ្លាំងសាំងក្នុងខណ្ឌប្ញស្សីកែវ តភ្ជាប់ទៅដល់តំបន់អភិវឌ្ឍន៍ជ្រោយចង្វារនៃខណ្ឌជ្រោយចង្វា បានធ្វើការសម្រេចសមិទ្ធិផលការងាររួច ៥០% ហើយ។

តាមការបញ្ជាក់ គម្រោងសាងសង់ស្ពានបេតុងមួយខ្សែនេះមានតួនាទីសំខាន់ណាស់ នៅក្នុងការចូលរួមចំណែកជួយសម្រួលដល់ចរាចរនៅលើផ្លូវជាតិលេខ៦ និងផ្លូវជាតិលេខ៥ ក៏រួមទាំងច្រកចេញចូលនៃរាជធានីភ្នំពេញផងដែរ។ ម៉្យាងវិញទៀត នៅក្នុងនាមកម្ពុជានឹងទទួលរៀបចំធ្វើជាម្ចាស់ផ្ទះនៃព្រឹត្តិការណ៍ប្រកួតកីឡា SEA GAME 2023 គម្រោងសាងសង់ស្ពានថ្មីនេះក៏ជាការជួយផ្តល់ភាពងាយស្រួលក្នុងការធ្វើចរាចរណ៍ពីទីក្រុងភ្នំពេញ ទៅកាន់ពហុកីឡដ្ឋានជាតិមរតកតេជោដូចគ្នា។

គួរបញ្ជាក់ផងដែរថា ការដ្ឋានសាងសង់នៃគម្រោងស្ពានបេតុង ឫស្សីកែវ-ជ្រោយចង្វារនេះ ជាស្ពានដែលមានប្រវែង ៩២២ម៉ែត្រ ទទឹង២០,៥ម៉ែត្រ និងចិញ្ចើមស្ពានសម្រាប់ថ្មើរជើងគឺ ១,២៥ម៉ែត្រ ស្ថិតនៅស្របទៅនឹងស្ពានបាឡេដែលកំពុងប្រើប្រាស់ប្រចាំថ្ងៃ ដែលត្រូវបានដឹងទៀតថា ក្រោយអំពីការដ្ឋានសាងសង់នៃស្ពានថ្មីនេះត្រូវបានចប់ជាស្តាពរ រដ្ឋាភិបាលក៏នឹងចាប់ផ្តើមធ្វើការរុះស្ពានបាឡេចេញតែម្តង។

គួរបញ្ជាក់បន្ថែម គម្រោងការដ្ឋានសាងសង់នៃគម្រោងស្ពានបេតុង ឫស្សីកែវ-ជ្រោយចង្វារត្រូវបានបើកការដ្ឋានសាងសង់ចាប់តាំងពីថ្ងៃទី ២៣ ខែតុលា ឆ្នាំ ២០១៧ មកម្ល៉េះ។

រៀបរៀងនិងកែសម្រួលដោយខមភើសកម្ពុជា

រៀបរៀងដោយ ៖ Thangnyth，   ប្រធានផ្នែកនិពន្ធ ៖ Sunnie，   នាយក / ផលិតករ ៖ Nicole

កាន់តែងាយស្រួលស្វែងរកអចលនទ្រព្យបានគ្រប់ប្រភេទជាមួយគេហទំព័រ Compass ទាំងក្នុង និងក្រៅប្រទេសមាននៅ ៖  កម្ពុជា | សិង្ហបុរី | អារ៉ាប់រួម | ថៃ | ហ្វីលីពីន | មីយ៉ាន់ម៉ា | ឡាវ