តំបន់ពាណិជ្ជកម្មនៅរាជធានីភ្នំពេញ| ស្វែងយល់អំពីតំបន់ពាណិជ្ជកម្មដ៏មានឥទ្ធិពលទាំង ១០ (ភាគទី ១)

រាជធានីភ្នំពេញជាទីក្រុងប្រមូលផ្តុំនូវភាពចម្រុះ។

ក្នុងនាមជាប្រទេសមួយក្នុងចំណោមប្រទេសដែលមានកំណើនសេដ្ឋកិច្ចលឿនបំផុតនៅតំបន់អាស៊ីអាគ្នេយ៍ ភ្នំពេញ រាជធានីនៃប្រទេសកម្ពុជា នៅតែបន្តទាក់ទាញភ្ញៀវទេសចរ វិនិយោគិន សហគ្រាស និងបុគ្គលិករបស់ក្រុមហ៊ុននានាមកពីជុំវិញពិភពលោក។ យុវជន យុវនារីមានទេពកោសល្យជាច្រើនរូបដែលរស់នៅខេត្តក្រុងផ្សេងទៀតក៏ចាកចេញពីស្រុកកំណើតមករាជធានីភ្នំពេញដើម្បីអភិវឌ្ឍខ្លួន។ ដូច្នេះហើយ ប្រជាជនចម្រុះនាំមកនូវវប្បធម៌ និងភាសាចម្រុះ ហើយពួកគេអាចរីកចម្រើនដោយសេរី និងបើកចំហនៅទីនេះ។

ការអភិវឌ្ឍពាណិជ្ជកម្មនៅទីនេះក៏មានភាពចម្រុះផងដែរ។ ដូច្នេះ តើការអភិវឌ្ឍពាណិជ្ជកម្មក្នុងទីក្រុងភ្នំពេញអាចនាំឱ្យយើងមានការភ្ញាក់ផ្អើលអ្វីខ្លះ?

ថ្ងៃនេះ យើងនឹងមកស្វែងយល់អំពីតំបន់ពាណិជ្ជកម្មដ៏មានឥទ្ធិពលបំផុតទាំង ១០ នៅក្នុងរាជធានីភ្នំពេញ និងគម្រោងតំណាងរបស់តំបន់ទាំងនោះ។

✨ លក្ខណសម្បត្តិនៃការអភិវឌ្ឍផ្នែកពាណិជ្ជកម្មក្នុងរាជធានីភ្នំពេញ ✨

១. ការអភិវឌ្ឍក្រុមចម្រុះ

ជាមួយនឹងការអភិវឌ្ឍយ៉ាងឆាប់រហ័សរបស់រាជធានីភ្នំពេញ ជាពិសេសនៅក្នុងទីក្រុងរណបធំៗ ការអភិវឌ្ឍផ្នែកពាណិជ្ជកម្មរបស់ទីក្រុងបានលោតចេញពីការរឹតបន្តឹងក្នុងការបែងចែកខណ្ឌរដ្ឋបាល ហើយបានបង្កើតជា "គំរូតំបន់ពហុកណ្តាល" ។ ទីតាំងតំបន់ពាណិជ្ជកម្មចាស់ៗ ដូចជា បឹងកេងកង១ ធីខេ ផ្សារអូរឬស្សី ផ្សារធំថ្មី ជាដើម បានពង្រីកឥទ្ធិពល និងអភិវឌ្ឍជាបន្តបន្ទាប់ ជាមួយនឹងពាណិជ្ជកម្មដែលកំពុងរីកចម្រើនជុំវិញ ដើម្បីបង្កើតជាតំបន់ពាណិជ្ជកម្មឲ្យកាន់តែរឹងមាំ។

តំបន់ពាណិជ្ជកម្មដែលកំពុងរីកចម្រើនបានអភិវឌ្ឍជាមួយនឹងការកើនឡើងនៃតំបន់លំនៅឋានសំខាន់ៗ។ អគារពាណិជ្ជកម្មខ្នាតធំ និងទូលំទូលាយជាច្រើនត្រូវបានបង្កើតឡើងដើម្បីបង្កើតជាតំបន់ពាណិជ្ជកម្ម។ ម៉្យាងវិញទៀត ពួកគេបំពេញនូវតម្រូវការការរស់នៅ និងការប្រើប្រាស់របស់មនុស្សនៅក្នុងតំបន់ ហើយម្យ៉ាងវិញទៀត តំបន់បានប្រសព្វគ្នា និងបំពេញបន្ថែមតំបន់អាជីវកម្មដែលបានបង្កើតឡើង ធ្វើឱ្យទិដ្ឋភាពអាជីវកម្មរបស់រាជធានីភ្នំពេញកាន់តែពេញលេញ។

២. ជាឱកាសដើម្បីរួមបញ្ចូលគ្នានូវផ្សារទំនើបទាន់សម័យជាមួយផ្សារបែបប្រពៃណី

ថ្វីត្បិតតែការអភិវឌ្ឍពាណិជ្ជកម្មរបស់រាជធានីភ្នំពេញ បច្ចុប្បន្នត្រូវបានគ្របដណ្ដប់ដោយផ្សារទំនើបៗទាន់សម័យក៏ដោយ ក៏ផ្សារបែបប្រពៃណីនៅតែភ្លឺចែងចាំងដដែល។ ផ្សារក្នុងស្រុកធំៗ ដូចជាផ្សារធំថ្មី និងផ្សារទួលទំពូង មិនត្រឹមតែជាកន្លែងដែលអ្នកអាចទិញរបស់ប្រើប្រាស់ប្រចាំថ្ងៃប៉ុណ្ណោះទេ ប៉ុន្តែក៏ជាកន្លែងដ៏ល្អសម្រាប់ជនបរទេសមកទស្សនា និងទិញវត្ថុអនុស្សាវរីយ៍ផងដែរ។

៣. សហគ្រាសដែលទទួលបានការបណ្ដាក់ទុនពីបរទេស និងសហគ្រាសក្នុងស្រុកធ្វើការជាមួយគ្នា

ការអភិវឌ្ឍយ៉ាងឆាប់រហ័សនៃអាជីវកម្មរបស់រាជធានីភ្នំពេញ គឺជាលទ្ធផលនៃកិច្ចខិតខំប្រឹងប្រែងរួមគ្នារបស់សហគ្រាសដែលបណ្ដាក់ទុនពីបរទេស និងសហគ្រាសក្នុងស្រុក។

បើនិយាយពីសហគ្រាសដែលមានទុនវិនិយោគពីបរទេស ដូចជា ផ្សារទំនើបអ៉ីអន ១ ផ្សារទំនើបអ៉ីអន ២ និង ផ្សារទំនើបអ៉ីអន ៣ របស់ប្រទេសជប៉ុន សុទ្ធតែមានប្រជាប្រិយភាពបំផុតចាប់តាំងពីផ្សារបានបើក ហើយពិតជាបានជម្រុញការអភិវឌ្ឍក្នុងតំបន់ ហើយដូចគ្នាទៅនឹងផ្សារទំនើបម៉ាក្រូដែលមកពីប្រទេសថៃផងដែរ។

សម្រាប់សហគ្រាសក្នុងស្រុក ក្រុមហ៊ុន ជីប ម៉ុង គ្រុប បានពន្លឿនកិច្ចខិតខំប្រឹងប្រែងរបស់ខ្លួនក្នុងរយៈពេលពីរឆ្នាំចុងក្រោយនេះ ដែលមិនត្រឹមតែបានសាងសង់ផ្សារទំនើបដ៏ធំចំនួនពីរនៅមហាវិថីសែនសុខ និងមហាវិថី ហ៊ុន សែន ប៉ុណ្ណោះទេ ប៉ុន្តែក៏បានកសាងធុរកិច្ចបែបសហគមន៍នៅក្នុងផ្នែកផ្សេងៗ ដើម្បីឱ្យកាន់តែមានភាពរឹងមាំក្នុងការអភិវឌ្ឍផ្នែកពាណិជ្ជកម្ម។

✨ តំបន់ពាណិជ្ជកម្មបឹងកេងកង ១ ទៅដល់តំបន់កោះពេជ្រ ✨ 

● គម្រោងសំខាន់ៗក្នុងតំបន់៖ ផ្សារទំនើប អ៉ីអន១ ផ្សារទំនើប ជីបម៉ុង ណូរ៉ូម៉ល ណាហ្គាវើល ផ្សារទំនើបសូហូ ផ្សារទំនើប The Bridge Lifestyle Mall ផ្សារបឹងកេងកង ផ្សារទំនើប Connexion (កំពុងសាងសង់) មជ្ឈមណ្ឌលព្រីនស៍ ហ័នយូ (មរំពឹងថានឹងបើកនៅឆ្នាំ ២០២៤) ។ល។

● ទិដ្ឋភាពទូទៅ៖ បឹងកេងកង១ គឺជាតំបន់រស់នៅ និងលំនៅឋានអន្តរជាតិបំផុតនៅក្នុងរាជធានីភ្នំពេញ។ ជនបរទេសមួយចំនួនធំរស់នៅទីនេះ។ មានកន្លែងផ្សេងៗ និងពេញលេញ ដូចជាលំនៅឋាន និងអគារការិយាល័យ។ ក្នុងនាមជាតំបន់ពាណិជ្ជកម្មកណ្តាលថ្មី (CBD) ក្នុងរាជធានីភ្នំពេញ ទីក្រុងរណបកោះពេជ្រក៏ប្រមូលផ្តុំឥស្សរជនដែលមានទ្រព្យសម្បត្តិច្រើន និងកន្លែងស្នាក់នៅកំពូលៗរបស់ទីក្រុងផងដែរ។

ជាមួយនឹងការអភិវឌ្ឍជាបន្តបន្ទាប់ក្នុងតំបន់ និងគុណសម្បត្តិភូមិសាស្ត្រ តំបន់បឹងកេងកង១ និងតំបន់កោះពេជ្រនៅតែបន្តពង្រីក និងបានតភ្ជាប់គ្នាបង្កើតបានជាសង្កាត់ពាណិជ្ជកម្ម។

ផ្សារទំនើបអ៉ីអនម៉ល ភ្នំពេញ (អ៉ីអន ១) ស្ថិតនៅក្នុងសង្កាត់ទន្លេបាសាក់ ខណ្ឌចំការមន។ ផ្សារត្រូវបានបើកនៅក្នុងឆ្នាំ ២០១៤ ហើយជាផ្សារទំនើបដំបូងគេរបស់ក្រុមហ៊ុន អ៉ីអនគ្រុប របស់ប្រទេសជប៉ុនក្នុងរាជធានីភ្នំពេញ ជាមួយនឹងស្តង់ដារពិភពលោក។ បន្ទាប់ពីពង្រីកនៅឆ្នាំ២០២៣ កន្លែងទំហំលក់រាយរបស់ផ្សារទំនើប អ៉ីអន ១ បានកើនឡើងដល់ ១៦២ ០០០ ម៉ែត្រការ៉េ ដែលមានហាងសរុបចំនួន ២៤០ រួមមាន ហាង COACH, Calvin Klein, Champion, Adidas, H&M, CHARLES & KEITH, ECCO, FILA, MICHAEL KORS, Pandora, និងហាងម៉ាកអន្តរជាតិល្បីៗផ្សេងទៀត។

ផ្សារទំនើប ជីបម៉ុង ណូរ៉ូម៉ល ដែលមានទីតាំងនៅតាមបណ្ដោយមហាវិថីព្រះនរោត្តម ត្រូវបានបើកដំណើរការក្នុងឆ្នាំ ២០២០ ហើយត្រូវបានអភិវឌ្ឍដោយក្រុមហ៊ុន ជីប ម៉ុង គ្រុប ដែលជាក្រុមហ៊ុនដ៏ធំបំផុតមួយក្នុងប្រទេសកម្ពុជា។ ផ្សារទំនើបទាំងមូលមានទំហំប្រហែល ៧ ៤០០ម៉ែត្រការ៉េ ដែលមានកម្ពស់សរុប ៦ ជាន់ ដែលមានជាផ្សារទំនើប រោងកុន ហាងនំប៉័ង ភោជនីយដ្ឋាន ហាងកាហ្វេ កន្លែងនិងសេវាកម្មកម្សាន្តផ្សេងៗទៀត។ល។

ណាហ្គាវើល មានទីតាំងនៅជាប់វិមានឯករាជ្យ ជាប្រភេទសណ្ឋាគារ និងមជ្ឈមណ្ឌលកម្សាន្តដ៏ទូលំទូលាយតែមួយគត់នៅក្នុងរាជធានីភ្នំពេញ ហើយក៏ជាកាស៊ីណូតែមួយគត់ដែលត្រូវបានអនុញ្ញាតនៅក្នុងរាជធានីភ្នំពេញផងដែរ។ នៅក្នុងមជ្ឈមណ្ឌលលក់ទំនិញក្រោមដី ណាហ្គាទី ១ និង ២ លោកអ្នកអាចរកឃើញហាងទំនិញមិនគិតពន្ធដ៏ធំបំផុតរបស់កម្ពុជា (CDF China Duty Free Group) ដែលលក់ផលិតផលប្រណីត សម្លៀកបំពាក់ ស្បែកជើង គ្រឿងអលង្ការ គ្រឿងសម្អាង បារី ស្រា និងអាហារ មកពីប្រទេសនានា រួមទាំងម៉ាកល្បីៗផ្សេងទៀតដូចជា Dior, Burberry, Coach, Omega, Miu Miu, Lamer, Lancôme ជាដើម ជាមួយនឹងតម្លៃពិសេស។

សង្កាត់ពាណិជ្ជកម្មនេះក៏រួមបញ្ចូលផងដែរនូវ SOHO Mall, The Bridge, The Peak និងអាជីវកម្មបែបសហគមន៍ផ្សេងទៀត និងធុរកិច្ចសម្រាប់គម្រោងធំៗ ដូចជាអគារពាណិជ្ជកម្ម Elysée ផងដែរ។ លើសពីនេះទៀត ផ្សារទំនើប Connexion (កំពុងសាងសង់) និងមជ្ឈមណ្ឌលពាណិជ្ជកម្មរបស់ Prince Huan Yu Center (រំពឹងថានឹងបើកនៅឆ្នាំ ២០២៤) ជាដើម ដែលទាំងអស់នេះនឹងរួមចំណែកដល់បរិយាកាសពាណិជ្ជកម្មទំនើបនៅក្នុងតំបន់។

ក៏មានហាងលក់ទំនិញមួយចំនួនធំនៅក្នុងសង្កាត់ពាណិជ្ជកម្ម រួមមាន AEON MaxValu Express, ផ្សារ ឡាក់គី, 7-Eleven, ផ្សារជីបម៉ុង, SuperDuper, Circle K, ផ្សារថៃហួត, Kim Mart ជាដើម ដែលមានមុខទំនិញម៉ាកល្បីៗមកពីប្រទេសថៃ ជប៉ុន កូរ៉េខាងត្បូង សហរដ្ឋអាមេរិក និងផលិតផលក្នុងស្រុក ធ្វើឱ្យការរស់នៅប្រចាំថ្ងៃនៅទីនេះកាន់តែងាយស្រួល។

បើនិយាយពីផ្សារប្រពៃណីក្នុងស្រុកវិញមាន “ផ្សារបឹងកេងកង” ដែលអាចទិញទំនិញប្រើប្រាស់ប្រចាំថ្ងៃ អាហារសម្រន់ និងអាហារឆ្ងាញ់ៗគ្រប់ប្រភេទ សម្លៀកបំពាក់ វត្ថុអនុស្សាវរីយ៍ និងផ្លែឈើស្រស់ បន្លែ និងសាច់។

✨ តំបន់ពាណិជ្ជកម្មខណ្ឌសែនសុខ ✨ 

● គម្រោងធំៗក្នុងតំបន់៖ ផ្សារទំនើប អ៉ីអនម៉ល សែនសុខ ផ្សារទំនើប ជីបម៉ុង សែនសុខ ផ្សារបោះដុំម៉ាក្រូ ហាងគ្លូប៊ល ហោស៍, SCG HOME DESIGN VILLAGE ។ល។

● ទិដ្ឋភាពទូទៅ៖ តំបន់ពាណិជ្ជកម្មក្នុងខណ្ឌសែនសុខ គឺផ្តោតជាសំខាន់ទៅលើ ព្រីមៀ សេនធ័រ សែនសុខ ហើយបន្តរាលដាលដល់តំបន់ជុំវិញ ដោយមានគម្រោងពាណិជ្ជកម្មធំៗមួយចំនួនដូចជា ផ្សារទំនើបអ៉ីអន២ ផ្សារទំនើបបោះដុំម៉ាក្រូ និងគ្លូប៊ល ហោស៍ ដែលមិនត្រឹមតែបញ្ចូលភាពរស់រវើកទៅក្នុងការអភិវឌ្ឍក្នុងតំបន់ និង លើកកម្ពស់ការប្រកួតប្រជែងក្នុងតំបន់ ប៉ុន្តែក៏នាំមកនូវភាពងាយស្រួលដល់ប្រជាពលរដ្ឋនៅក្នុងតំបន់ផងដែរ។

សែនសុខជាខណ្ឌដែលសម្បូរទៅដោយគម្រោងសហគមន៍បុរីជាច្រើន (ប្រភេទផ្ទះល្វែង និងវីឡា)។ គ្រួសារដែលមានវណ្ណៈកណ្តាលមួយចំនួនធំរស់នៅទីនេះ ហើយសង្កាត់ពាណិជ្ជកម្មជុំវិញគឺជាជម្រើសដ៏ល្អបំផុតសម្រាប់ពួកគេ។ ខណ្ឌបានបង្កើតជាតំបន់លំនៅឋានខ្នាតធំ និងមានគុណភាពខ្ពស់។ នៅពេលដែលតំបន់ពាណិជ្ជកម្មមានភាពពេញលេញនិងពង្រីកបន្តិចម្តងៗ ការប្រកួតប្រជែងក្នុងតំបន់ក៏នឹងកើនឡើងផងដែរ។

ផ្សារទំនើប អ៉ីអនម៉ល សែនសុខ (អ៉ីអន ២) ត្រូវបានបើកដំណើរការក្នុងឆ្នាំ ២០១៨ ដែលមានផ្ទៃដីសាងសង់ ១៥១ ០០០ ម៉ែត្រការ៉េ។ បើនិយាយពីហាងដែលមានម៉ាកល្បី ក៏ស្រដៀងទៅនឹងផ្សារទំនើប អ៉ីអន ១ ដែរ។ ក្នុងចំនោមនោះ រោងភាពយន្ត Major Cineplex (Thailand) បានបង្កើតរោងកុន IMAX ដំបូងបង្អស់របស់កម្ពុជានៅទីនេះ។ ផ្សារក៏មានកីឡាបូលីង Blue-O និង សួនទឹក Water Garden ដែលយើងអាចរីករាយជាមួយឧបករណ៍កម្សាន្តជាច្រើនប្រភេទ។

ផ្សារម៉ាក្រូ គឺជាផ្សារទំនើបលក់បោះដុំដ៏ធំនៅក្នុងប្រទេសថៃ ត្រូវបានបើកនៅក្នុងខណ្ឌសែនសុខក្នុងឆ្នាំ ២០១៧ និងគ្របដណ្តប់លើផ្ទៃដីប្រហែល ៥ ហិកតា។ ផ្សារទំនើបម៉ាក្រូ ផ្តល់ជូននូវផលិតផលប្រើប្រាស់ប្រចាំថ្ងៃជាច្រើនប្រភេទក្នុងតម្លៃប្រកួតប្រជែងសម្រាប់តម្រូវការរបស់អតិថិជនទាំងអស់។

ផ្សារទំនើប ជីប ម៉ុង ម៉លសែនសុខ មានទីតាំងនៅខណ្ឌសែនសុខ បានបើកដំណើរការនៅឆ្នាំ ២០២២។ ផ្សារទំនើបបានណែនាំហាងល្បីៗជាច្រើនរួមមាន សំលៀកបំពាក់ ផលិតផលអេឡិចត្រូនិក ភោជនីយដ្ឋាន ហាងកាហ្វេ រោងកុន សួនកុមារ Doozii Kid ធនាគារ មជ្ឈមណ្ឌលអុបទិក ហាងលក់គ្រឿងសម្អាង ផ្សារទំនើបជាដើម ចាប់តាំងពីបើកដំណើរការមក ផ្សារខាងលើបានធ្វើឲ្យប្រសើរឡើងនូវប្លង់ពាណិជ្ជកម្មនៃខណ្ឌសែនសុខ ពន្លឿននូវការអភិវឌ្ឍក្នុងតំបន់ ពង្រីកវិសាលភាពរបស់តំបន់ពាណិជ្ជកម្មសែនសុខ ព្រមទាំងបានធ្វើឲ្យប្រសើរឡើងនូវការប្រកួតប្រជែងរបស់គម្រោងអចលនទ្រព្យក្នុងតំបន់។

គ្លូប៊ល ហោស៍ ខេមបូឌា (Global House Cambodia) ជាមជ្ឈមណ្ឌលលក់ទំនិញដែលមានឯកទេសលើផលិតផលសំណង់ និងគ្រឿងសង្ហារិម ផ្តល់នូវការទិញទំនិញផ្សេងៗដោយមិនឈប់ឈរ រួមទាំងគ្រឿងសង្ហារឹម និងឧបករណ៍ប្រើប្រាស់ក្នុងផ្ទះ គ្រឿងសង្ហារឹមការិយាល័យ ផ្ទះបាយ និងបន្ទប់ទឹក ព្រមទាំងតុការិយាល័យ ទូបន្ទប់ទឹក ទូផ្ទះបាយ កំរាលព្រំ ផ្ទាំងរូបភាព។ល។

លើសពីនេះ មានសហគមន៍ពាណិជ្ជកម្មផ្សេងទៀតដូចជា “The Green Community Mall” នៅក្នុងខណ្ឌ។

✨ តំបន់ពាណិជ្ជកម្មខណ្ឌមានជ័យ ✨ 

● គម្រោងធំៗក្នុងសង្កាត់៖ ផ្សារទំនើប អ៉ីអន ម៉ល មានជ័យ(អ៉ីអន ៣), ផ្សារទំនើប ជីប ម៉ុង ២៧១ មេហ្គាម៉ល, ផ្សារ មានជ័យ អាវឺន្យូ (Mean Chey Avenue)

● ទិដ្ឋភាពទូទៅ៖ តំបន់ពាណិជ្ជកម្មនេះត្រូវបានគេស្គាល់ជាផ្លូវការនៅឆ្នាំ ២០២២ ជាមួយនឹងការបើកដំណើរការផ្សារទំនើប អ៉ីអន ៣ និង ផ្សារជីបម៉ុង ២៧១ ។ ថ្វីត្បិតតែជាតំបន់ពាណិជ្ជកម្មថ្មីដែលទើបនឹងលេចចេញឡើងក៏ដោយ ក៏ទទួលបានការចាប់អារម្មណ៍យ៉ាងខ្លាំង។

តំបន់ពាណិជ្ជកម្មត្រូវបានអភិវឌ្ឍជាចម្បងនៅតាមបណ្តោយមហាវិថី សម្ដេច ហ៊ុន សែន។ មានសហគមន៍បុរីមួយចំនួនធំនៅក្នុងខណ្ឌ។ បច្ចុប្បន្នតំបន់ពាណិជ្ជកម្មនេះនៅតែស្ថិតក្នុងការអភិវឌ្ឍ និងសាងសង់នៅឡើយ ប៉ុន្តែជាមួយនឹងការកើនឡើងនូវអត្រាកាន់កាប់ និងហេដ្ឋារចនាសម្ព័ន្ធធំៗផ្សេងទៀត នឹងត្រូវបានពង្រីកយ៉ាងខ្លាំង។

ផ្សារទំនើប អ៉ីអនម៉ល មានជ័យ (ផ្សារទំនើប អ៉ីអន ៣) ក៏ត្រូវបានវិនិយោគ និងសាងសង់ដោយក្រុមហ៊ុន AEON Group របស់ជប៉ុនផងដែរ បានក្លាយជាផ្សារទំនើបដ៏ធំបំផុតក្នុងប្រទេសកម្ពុជារហូតមកដល់ពេលនេះ។

ផ្សារទំនើប អ៉ីអនម៉ល មានជ័យ គឺជាផ្សារទំនើបទីមួយក្នុងប្រទេសកម្ពុជា ដែលរួមបញ្ចូលសួនកម្សាន្តខាងក្រៅ។ មានទីតាំងនៅមហាវិថី សម្ដេច ហ៊ុន សែន ក្នុងរាជធានីភ្នំពេញ និងគ្របដណ្ដប់លើផ្ទៃដី ១៧ ហិកតា ដែលធំជាងផ្ទៃដីរបស់ផ្សារទំនើបអ៊ីអន ១ និង អ៊ីអន ២ បូកបញ្ចូលគ្នា។

ផ្សារទំនើប ជីប ម៉ុង ២៧១ មេហ្គាម៉ល មានផ្ទៃដីទំហំ ១៥០ ០០០ ម៉ែត្រការ៉េ និងមានកម្ពស់សរុប ៥ ជាន់។ ជាផ្សារទំនើបខ្នាតធំដំបូងគេដែលបើកនៅតាមបណ្តោយមហាវិថី សម្ដេច ហ៊ុន សែន ដែលបំពេញចន្លោះពាណិជ្ជកម្មក្នុងតំបន់ប្រកបដោយស្តង់ដារខ្ពស់ និងទាក់ទាញការចាប់អារម្មណ៍យ៉ាងច្រើន។

ក្រៅពីផ្សារទំនើបទាំង ២ ខាងលើ តំបន់ពាណិជ្ជកម្មក៏មានមជ្ឈមណ្ឌលពាណិជ្ជកម្មសហគមន៍ដូចជា “មានជ័យ អាវឺន្យូ” ដែលអាចផ្តល់កន្លែងលក់រាយ កន្លែងសម្រាកលម្ហែកាយ និងកម្សាន្ត។ 

“ផ្សាររាត្រី វិថីអាហារ ៦០ ម៉ែត្រ” និង “ផ្សាររាត្រីណយ” ដែលទើបនឹងបើកថ្មីក៏អាចផ្តល់កន្លែងជាច្រើនទៀតសម្រាប់អ្នកដែលចូលចិត្តដើរទិញឥវ៉ាន់ និងចូលចិត្តញ៊ាំអាហារតាមផ្លូវនៅពេលយប់។ ហ្វេកធឺរីភ្នំពេញ (Factory Phnom Penh) មានកន្លែងច្នៃប្រឌិត រួមបញ្ចូលកន្លែងលក់ម្ហូបអាហារ ការកម្សាន្តជាលក្ខណៈគ្រួសារ កន្លែងអប់រំរបស់កុមារ កន្លែងច្នៃប្រឌិត និងការិយាល័យ ហើយក៏ជាកន្លែងប្រមូលផ្តុំសម្រាប់ក្រុមអ្នកប្រើប្រាស់វ័យក្មេងផងដែរ។

មហាវិថី សម្ដេច ហ៊ុន សែន ស្ថិតនៅក្នុងតំបន់ពាណិជ្ជកម្ម គឺជាតំបន់អភិវឌ្ឍដ៏សំខាន់ក្នុងរាជធានីភ្នំពេញ ហើយក៏ជាផ្លូវតែមួយគត់ពីអាកាសយានដ្ឋានអន្តរជាតិតេជោក្រុងតាខ្មៅ (អាកាសយានដ្ឋានអន្តរជាតិភ្នំពេញថ្មី) ទៅកាន់ទីក្រុងសំខាន់ក្នុងរាជធានីភ្នំពេញ។

គួរជម្រាបថា ប្រទេសកម្ពុជាក៏កំពុងសិក្សាលើគម្រោងផ្លូវរថភ្លើងធុនស្រាល ដែលតភ្ជាប់ទីក្រុងភ្នំពេញ ទៅកាន់អាកាសយានដ្ឋានអន្តរជាតិតេជោក្រុងតាខ្មៅ ក្នុងខេត្តកណ្តាល ហើយនឹងបង្កើតស្ថានីយនៅតាមបណ្តោយមហាវិថី ហ៊ុន សែន។ លើសពីនេះ មានគម្រោងលំនៅឋានជាច្រើននៅជុំវិញតំបន់នោះ រួមមាន បុរី ជីបម៉ុង ៦០ម៉ែត្រ (Chip Mong Landmark 60M) បុរី ប៉េងហួត ក៏ដូចជាគម្រោងខុនដូ ដូចជា បុរី អ&អេហ្វ (R&F City), Urban Village ជាដើម ដែលមានសក្តានុពលពេញលេញសម្រាប់ការអភិវឌ្ឍនាពេលអនាគត។

តើយើងនៅមានសង្កាត់ពាណិជ្ជកម្មអ្វីទៀតក្នុងរាជធានីភ្នំពេញ? សូមរង់ចាំមើលនៅថ្ងៃស្អែក!