ក្នុងរយៈពេល២ខែឆ្នាំនេះ រំហូរទុនវិនិយោគនៅកម្ពុជា មានជាង១.៣ប៊ីលានដុល្លារ ក្នុងនោះវិនិយោគចិនមាន​ជិត​៤០%

ឯកឧត្តម ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា បានបញ្ជាក់ឲ្យដឹងថា ក្នុងរយៈពេល២ខែ ឆ្នាំ២០២៤នេះ រំហូរទុនវិនិយោគនៅកម្ពុជា មានប្រមាណជាង១.៣ ប៊ីលានដុល្លារ កើនឡើងជាង៥០០% ក្នុងនោះ រំហូរវិនិយោគចិន មានប្រមាណ៥៤៥លានដុល្លារ។

ការបញ្ជាក់បែបនេះ ធ្វើឡើងក្នុងឱកាសដែលឯកឧត្តមបានអញ្ជើញចូលរួមជាអធិបតី ក្នុងកិច្ចប្រជុំស្ដីពីការកសាងកិច្ចសហប្រតិបត្តិការ ផ្លាស់ប្ដូរយោបល់គ្នារវាងខេត្តសានទុង និងកម្ពុជា ក្នុងការអភិវឌ្ឍ «ច្រករបៀងឧស្សាហកម្ម» និង «ច្រករបៀងមច្ឆា និងអង្ករ» នារសៀលថ្ងៃទី០៨ ខែមីនា ឆ្នាំ២០២៤។

ឯកឧត្តម ជា វុទ្ធី បានបញ្ជាក់យ៉ាងដូច្នេះថា «ក្នុងរយៈពេល២ខែ ដើមឆ្នាំ២០២៤ រំហូរទុនវិនិយោគ មានការកើនឡើងយ៉ាងសម្បើម ប្រមាណជាង១.៣ ប៊ីលានដុល្លារអាមេរិក កើនឡើងជាង ៥០០% បើធៀបនឹងរយៈពេលដូចគ្នា ក្នុងឆ្នាំ២០២៣»។

បន្ថែមពីនោះ ឯកឧត្តមបានបញ្ជាក់ឲ្យដឹងទៀតថា ក្នុងរយៈពេល២ខែ ដើមឆ្នាំ២០២៤ រំហូរវិនិយោគចិន មានប្រមាណ៥៤៥លានដុល្លារអាមេរិក ស្មើនឹងប្រមាណ៣៩% នៃទុនវិនិយោគសរុប។

បើតាមការបញ្ជាក់ របស់ឯកឧត្តម ជា វុទ្ធី រំហូរទុនវិនិយោគសរុបនៅកម្ពុជា មានកំណើនប្រមាណ៤.៩ប៊ីលានដុល្លារអាមេរិក នៅឆ្នាំ២០២៣ កើនឡើងប្រមាណ២២% ធៀបនឹងឆ្នាំ២០២២។ សម្រាប់ឆ្នាំ២០២៣ រំហូរទុនវិនិយោគសរុបរបស់ចិន មានដល់ទៅប្រមាណ ជាង៣ប៊ីលានដុល្លារអាមេរិក រួមចំណែកជាងពាក់កណ្តាល (៦៦%) នៃរំហូរទុនវិនិយោគសរុប។ រំហូរទុនវិនិយោគរបស់ចិន តែងឈរនៅលំដាប់លេខរៀងទី១ ទី២ ឬទី៣ រៀងរាល់ឆ្នាំ ដែលភាគច្រើនប្រមូលផ្តុំ ក្នុងវិស័យឧស្សាហកម្ម, ហេដ្ឋារចនាសម្ព័ន្ធ, និងកសិឧស្សាហកម្ម។

ឯកឧត្តម ជា វុទ្ធីក៏បានគូសបញ្ជាក់អំពីក្របខ័ណ្ឌកិច្ចសហប្រតិបត្តិការ នៃប្រទេសទាំងពីរ បានដំឡើងកម្រិតជា «កិច្ចសហប្រតិបត្តិការត្បូងពេជ្រ» ដែលនឹងអាចសម្រេចបាននូវកិច្ចសហប្រតិបត្តិការផ្នែកនយោបាយ សេដ្ឋកិច្ច និងសន្តិសុខបន្ថែមទៀត ឆ្ពោះទៅរកការកសាងសហគមន៍វាសនារួមក្នុងយុគសម័យថ្មី។

ឯកឧត្តមអគ្គលេខាធិការ បានលើកទឹកចិត្តឲ្យវិនិយោគិនចិន អញ្ជើញមកធ្វើការសិក្សាស្វែងយល់បន្ថែម និងបណ្តាក់ទុនវិនិយោគនៅកម្ពុជា ព្រមទាំងនាំយកនូវចំណេះដឹង ចំណេះធ្វើ និងបច្ចេកវិទ្យា ក្នុងវិស័យឧស្សាហកម្ម កសិកម្ម និងកសិ-ឧស្សាហកម្ម ជាពិសេសការដាំដុះកសិកម្ម វារីវប្បកម្ម ឧស្សាហកម្មកែច្នៃ និងឧស្សាហកម្មសមុទ្រ ឈានទៅបង្កើនតម្លៃបន្ថែម និងធ្វើទំនើបកម្មវិស័យទាំងនេះនៅកម្ពុជា ក៏ដូចជាដើម្បីបំពេញតម្រូវការដ៏ធំសម្បើមនៃទីផ្សារចិន និងអន្តរជាតិ។

លើសពីនោះទៀត ឯកឧត្តមក៏បានជម្រាបជូនផងដែរថា ថ្នាក់ដឹកនាំនៃក្រសួងពាណិជ្ជកម្ម នៃសាធារណរដ្ឋប្រជាមានិតចិន នឹងធ្វើដំណើរទស្សនកិច្ចមកកម្ពុជា នាពេលខាងមុខ ដើម្បីពិភាក្សាអំពីការបង្កើត សួនឧស្សាហកម្មក្នុងការជំរុញការកែច្នៃវត្ថុធាតុដើមក្នុងស្រុក និងផលិតផលពាក់កណ្ដាលសម្រេច សម្រាប់ផ្គត់ផ្គង់ដល់រោងចក្រផលិតសំបកកង់រថយន្ដនៅកម្ពុជា។

បន្ថែមពីនេះ ក្រុមហ៊ុនដ៏មានសក្ដានុពលមួយ នឹងមកបង្កើតមជ្ឈមណ្ឌលកែច្នៃ និងផលិតវត្ថុពាក់កណ្ដាលសម្រេចសម្រាប់ផ្គត់ផ្គង់ ដល់ឧស្សាហកម្មផលិតសំបករថយន្ដដោយប្រើប្រាស់ជ័រកៅស៊ូកម្ពុជា។ 

អភិបាលរងខេត្តសានទុង៖ ខេត្តសានទុង និងកម្ពុជាមានការបំពេញបន្ថែមគ្នាយ៉ាងខ្លាំងនៅក្នុងពាណិជ្ជកម្ម

លោក Song Junji អភិបាលរងខេត្តសានទុងរបស់ប្រទេសចិនបានមានប្រសាសន៍ថា កាលពីខែកញ្ញាឆ្នាំមុន ប្រធានាធិបតីចិន Xi Jinping បានសង្កត់ធ្ងន់នៅពេលជួបជាមួយសម្តេចធិបតី ហ៊ុន ម៉ាណែត ថាប្រទេសចិនមានឆន្ទៈក្នុងការធ្វើការជាមួយកម្ពុជាដើម្បីអនុវត្ត«ផែនការសកម្មភាពនៃការកសាងសហគមន៍វាសនារួមកម្ពុជា-ចិន ក្នុងយុគសម័យថ្មី រវាងរាជរដ្ឋាភិបាលកម្ពុជា និងរដ្ឋាភិបាលចិន» និងរួមគ្នាអភិវឌ្ឍ «ច្រករបៀងឧស្សាហកម្ម» និង «ច្រករបៀងមច្ឆា និងអង្ករ» ដើម្បីលើកកម្ពស់ការអនុវត្តដំបូង និងលទ្ធផលប្រកបដោយប្រសិទ្ធភាពនៃកិច្ចសហប្រតិបត្តិការសំខាន់ៗដែលពាក់ព័ន្ធ។

លោកបានបញ្ជាក់ថា ដំណើរទស្សនកិច្ចរបស់គណៈប្រតិភូខេត្តសានទុង មកកាន់ប្រទេសកម្ពុជា មានគោលបំណងពង្រីក និងបង្កើនកម្រិតនៃកិច្ចសហប្រតិបត្តិការ និងជួយសម្រេចបានសមិទ្ធិផលបន្ថែមទៀតក្នុងការកសាង “ច្រករបៀងពីរ។

លោកបានចង្អុលបង្ហាញថា ក្នុងរយៈពេលប៉ុន្មានឆ្នាំចុងក្រោយនេះ ក្រោមការដឹកនាំនៃកិច្ចសហប្រតិបត្តិការមិត្តភាពជារួមរវាងចិន និងកម្ពុជា ខេត្តសានទុងបានចូលរួមយ៉ាងសកម្មក្នុងការកសាង "ច្រករបៀងពីរ" ក្នុងវិស័យសេដ្ឋកិច្ច ពាណិជ្ជកម្ម មនុស្សសាស្ត្រ និងតំបន់។ ក្នុងឆ្នាំ២០២៣ ទំហំពាណិជ្ជកម្មសរុបរវាងភាគីទាំងពីរបានឈានដល់ 7.61 ពាន់លានយន់ (RMB)។ ខេត្តសានទុងបានបង្កើតតំបន់សហប្រតិបត្តិការសេដ្ឋកិច្ច និងពាណិជ្ជកម្មចំនួនបីក្នុងប្រទេសកម្ពុជារួមមាន តំបន់សេដ្ឋកិច្ចពិសេស សានដុង សាន់សែល (ស្វាយរៀង) តំបន់សេដ្ឋកិច្ចពិសេសខេត្តក្រចេះ និងតំបន់សេដ្ឋកិច្ចពិសេស ឈីលូ ដែលទាក់ទាញក្រុមហ៊ុនជាច្រើននិងផ្តល់ឱកាសការងារសំរាប់មនុស្សរាប់ម៉ឺននាក់ និងជំរុញការអភិវឌ្ឍន៍ និងវិបុលភាពក្នុងតំបន់។

លោកបានបន្តថា ខេត្តសានទុង មានគុណសម្បត្តិច្រើនក្នុងវិស័យកសិកម្ម និងសមត្ថភាពខ្លាំងក្នុងការច្នៃប្រឌិតបច្ចេកវិទ្យាកសិកម្ម។ លោកសង្ឃឹមថា ភាគីទាំងពីរនឹងពង្រឹងកិច្ចសហប្រតិបត្តិការជាក់ស្តែងលើវិស័យបង្កាត់ពូជកសិកម្ម ការកែច្នៃផលិតផលកសិកម្ម គ្រឿងយន្តកសិកម្ម និងការបណ្តុះបណ្តាលជំនាញកសិកម្មជាដើម ដើម្បីជំរុញការរួមបញ្ចូលស៊ីជម្រៅនៃខ្សែសង្វាក់ឧស្សាហកម្មកសិកម្មទាំងមូល។

លោកបានចង្អុលបង្ហាញថា ពាណិជ្ជកម្មរវាងខេត្តសានទុង និងកម្ពុជាមានការបំពេញបន្ថែមខ្ពស់ វាយនភណ្ឌ សម្លៀកបំពាក់ គ្រឿងសង្ហារឹម គ្រឿងបន្លាស់រថយន្ត និងផលិតផលផ្សេងទៀតរបស់ខេត្តសានទុង មានការប្រកួតប្រជែងខ្ពស់ ហើយផលិតផលកសិកម្មរបស់កម្ពុជាដូចជា មៀន និងស្វាយ មានប្រជាប្រិយភាពខ្លាំងនៅក្នុងខេត្តសានទុង។ សង្ឃឹមថាភាគីទាំងពីរនឹងប្រើប្រាស់យន្តការពាណិជ្ជកម្មឱ្យបានល្អ ដូចជាកិច្ចព្រមព្រៀង RCEP និងកិច្ចព្រមព្រៀងពាណិជ្ជកម្មសេរីចិន-កម្ពុជា ដើម្បីជំរុញការនាំចូល និងនាំចេញវាយនភណ្ឌ គ្រឿងប្រើប្រាស់ក្នុងផ្ទះ សំបកកង់ គ្រឿងចក្រ បន្លែផ្លែឈើ កៅស៊ូ និងផលិតផលផ្សេងៗទៀត ហើយបន្តពង្រីកទំហំពាណិជ្ជកម្ម។

លោកស្រីទីប្រឹក្សា Zhong Jie៖ កិច្ចសហប្រតិបត្តិការសេដ្ឋកិច្ច និងពាណិជ្ជកម្មកម្ពុជា-ចិន បន្តកាន់តែស៊ីជម្រៅ និងរឹងមាំ

លោកស្រី Zhong Jie ទីប្រឹក្សានៃស្ថានទូតចិនប្រចាំកម្ពុជា មានប្រសាសន៍ថា ក្នុងប៉ុន្មានឆ្នាំចុងក្រោយនេះ ជាមួយនឹងការអនុវត្តកិច្ចព្រមព្រៀងភាពជាដៃគូសេដ្ឋកិច្ចទូលំទូលាយក្នុងតំបន់ និងកិច្ចព្រមព្រៀងពាណិជ្ជកម្មសេរីចិន-កម្ពុជា កិច្ចសហប្រតិបត្តិការសេដ្ឋកិច្ច និងពាណិជ្ជកម្មកម្ពុជា-ចិន បានបន្តកាន់តែស៊ីជម្រៅ និងរឹងមាំ។ យោងតាមស្ថិតិខាងចិន ទំហំពាណិជ្ជកម្មចិន-កម្ពុជា ឈានដល់ ១៤,៨២ ពាន់លានដុល្លារក្នុងឆ្នាំ ២០២៣ ហើយចិននៅតែជាដៃគូពាណិជ្ជកម្មធំបំផុតរបស់កម្ពុជារយៈពេល ១២ ឆ្នាំជាប់ៗគ្នា។ ប្រទេសចិនបានក្លាយជាទីផ្សារនាំចេញដ៏សំខាន់របស់កម្ពុជា ដូចជាអង្ករដែលមានគុណភាពខ្ពស់ ផ្លែចេក និងស្វាយស្រស់ ហើយម្រេច មៀន និងផលិតផលទឹកផ្សេងៗទៀតត្រូវបាននាំចេញទៅប្រទេសចិនជាបន្តបន្ទាប់ ចំណែកពោត ដូងជាដើម ក៏ត្រូវបានអនុញ្ញាត និងនាំចេញទៅប្រទេសចិនក្នុងពេលឆាប់ៗនេះដែរ។

លោកស្រី Zhong Jie បានចង្អុលបង្ហាញទៀតថា ប្រទេសចិនបានក្លាយជាប្រភពវិនិយោគបរទេសធំបំផុតរបស់កម្ពុជាក្នុងរយៈពេលជាច្រើនឆ្នាំជាប់គ្នា។ យោងតាមស្ថិតិ នៅឆ្នាំ២០២៣ ការវិនិយោគដោយក្រុមហ៊ុនចិននៅកម្ពុជា បានលើសពី ៣ពាន់លានដុល្លារអាមេរិក ដែលស្មើនឹង ៦៦% នៃការវិនិយោគសរុបរបស់កម្ពុជា។ កិច្ចសហប្រតិបត្តិការសេដ្ឋកិច្ច និងពាណិជ្ជកម្មកម្ពុជា-ចិន មានទស្សនវិស័យទូលំទូលាយ និងសក្តានុពលដ៏ធំ។

លោកស្រីZhong Jie បានបញ្ជាក់ថា ខេត្តសានទុង គឺជាខេត្តដែលមានប្រជាជនច្រើន និងជាខេត្តសេដ្ឋកិច្ច និងវប្បធម៌ដ៏សំខាន់របស់ប្រទេសចិន។ យើងជឿជាក់ថា ការផ្លាស់ប្តូរ និងកិច្ចសហប្រតិបត្តិការរវាងខេត្តសានទុង និងប្រទេសកម្ពុជានឹងបន្តធ្វើឱ្យស៊ីជម្រៅ និងអភិវឌ្ឍន៍ ដោយចូលរួមចំណែកក្នុងការសម្រេចបាននូវផលប្រយោជន៍ទៅវិញទៅមក លទ្ធផលឈ្នះ-ឈ្នះ និងការអភិវឌ្ឍន៍រួមរវាងចិន និងកម្ពុជា។

អ្នកឧកញ៉ា ពុង ឃាវសែ៖ សង្ឃឹមថាតាមរយៈការសាងសង់ “ច្រករបៀងពីរ” ផលិតផលកម្ពុជាកាន់តែច្រើនអាចទៅកាន់ពិភពលោក

អ្នកឧកញ៉ា ពុង ឃាវសែ បានមានប្រសាសន៍ថា កម្ពុជាជាប្រទេសសមាជិកអាស៊ានដែលមានស្ថានការណ៍នយោបាយស្ថិរភាព គោលនយោបាយសេដ្ឋកិច្ចបើកចំហ តម្លៃពលកម្មទាប និងមិនមានការគ្រប់គ្រងលើការប្តូរប្រាក់បរទេស ហើយមានគោលនយោបាយវិនិយោគបរទេសបើកចំហ។ ទន្ទឹមនឹងនោះ កម្ពុជាក៏ជាប្រទេសដ៏សំខាន់ក្នុងការជំរុញការកសាងគំនិតផ្តួចផ្តើមខ្សែក្រវាត់ និងផ្លូវ។ ជាពិសេស រាជរដ្ឋាភិបាលទី៧ ដែលដឹកនាំដោយសម្តេចធិបតី ហ៊ុន ម៉ាណែត បានយកចិត្តទុកដាក់យ៉ាងខ្លាំងចំពោះការអភិវឌ្ឍន៍ទំនាក់ទំនងមិត្តភាពរវាងកម្ពុជា និងចិន ហើយបានផ្សព្វផ្សាយនូវគោលនយោបាយលើកទឹកចិត្តជាបន្តបន្ទាប់ ដែលផ្ដល់ផលប្រយោជន៏ដល់ការជំរុញការវិនិយោគ ការអភិវឌ្ឍន៍ឧស្សាហកម្ម ការនាំចេញផលិតផល ការច្នៃប្រឌិតវិទ្យាសាស្ត្រ និងបច្ចេកវិទ្យា។ល។ ជាមួយនឹងគោលនយោបាយបើកទូលាយ និងការពារការវិនិយោគ កែលម្អបរិយាកាសធុរកិច្ចរបស់កម្ពុជា ធ្វើអោយឱ្យសហគ្រាសចិន និងបរទេសមានទំនុកចិត្តបន្ថែមទៀតក្នុងការវិនិយោគនៅកម្ពុជា និងជំរុញការអភិវឌ្ឍសេដ្ឋកិច្ច និងសង្គមរបស់កម្ពុជា។ 

អ្នកឧកញ៉ា បានលើកឡើងថា «ច្រករបៀងឧស្សាហកម្ម» និង «ច្រករបៀងមច្ឆា និងអង្ករ» គឺជាធាតុសំខាន់នៃកិច្ចសហប្រតិបត្តិការចិន-កម្ពុជា ហើយក៏ជាគម្រោងដ៏សំខាន់សម្រាប់ការអភិវឌ្ឍន៍សេដ្ឋកិច្ច និងសង្គមរបស់កម្ពុជា។ សង្ឃឹមថា តាមរយៈការសាងសង់ច្រករបៀងទាំងពីរនេះ ផលិតផលកសិកម្ម និងឧស្សាហកម្មកាន់តែច្រើនរបស់កម្ពុជានឹងត្រូវនាំចេញទៅប្រទេសចិន និងជុំវិញពិភពលោក ដែលនាំមកនូវឱកាសការងារ និងប្រាក់ចំណូលដល់ប្រជាជនកម្ពុជា និងលើកកម្ពស់ជីវភាពរស់នៅ។

ដូច្នេះហើយ ជាមួយនឹងភាពរឹងមាំ និងបទពិសោធន៍ជោគជ័យរបស់ខេត្តសានទុង នឹងបង្កើនល្បឿននៃកិច្ចសហប្រតិបត្តិការរវាងច្រករបៀងទាំងពីរ និងជំរុញការកសាងសហគមន៍ជាមួយនឹងអនាគតរួមគ្នារវាងកម្ពុជា និងចិន។

អ្នកឧកញ៉ា ពុង ឃាវសែ បានបញ្ជាក់ទៀតថា សមាគមសម្ព័ន្ធខ្មែរ-ចិន គឺជាអង្គការសង្គមដ៏សំខាន់មួយ ដែលបន្តប្រវត្តិនៃការអភិវឌ្ឍន៍សហគមន៍ចិននៅកម្ពុជា អស់រយៈពេលជាងមួយរយឆ្នាំ ហើយប្រមូលផ្តុំឥស្សរជនចិន និងសហគ្រាសពាណិជ្ជកម្មចិនជាច្រើន ដែលទាញយកផលប្រយោជន៍ពីបងប្អូនកូនចៅចិននៅកម្ពុជា ដែលមានភាពស្ទាត់ជំនាញខាងវប្បធម៌ និងភាសានៃប្រទេសទាំងពីរ ដើម្បីបង្កើតជាស្ពានធម្មជាតិសម្រាប់ការផ្លាស់ប្តូរ និងកិច្ចសហប្រតិបត្តិការរវាងចិន និងកម្ពុជា ហើយចូលរួមចំណែកយ៉ាងសកម្មក្នុងការលើកកម្ពស់មិត្តភាពរវាងកម្ពុជា និងចិន ជំរុញការទាក់ទាញវិនិយោគ និងថវិការជំនួយពីចិន និងបរទេសក្នុងការវិនិយោគ និងប្រតិបត្តិការនៅកម្ពុជា។