ក្រុមហ៊ុនចិនបញ្ជាក់សិក្សាចប់សព្វគ្រប់ពីផ្លូវ២ខ្សែនៅកម្ពុជា ខណៈរង់ចាំតែការទម្លាក់ថវិកាដើម្បីសាងសង់

ក្រុមហ៊ុន China Communication Contruction Corporation (CCCC) ដែលជាក្រុមហ៊ុនមេរបស់ក្រុមហ៊ុន China Road And Bridge  បានសិក្សាចប់សព្វគ្រប់គម្រោងសាងសង់ផ្លូវជាតិចំនួន ២ ខ្សែនៅក្នុងប្រទេសកម្ពុជារួចរាល់ហើយ ខណៈក្រុមហ៊ុននៅតែរង់ចាំថវិកាសម្រាប់ការសាងសង់ប៉ុណ្ណោះ។ 

នេះបើតាមការបញ្ជាក់ពីលោក ឈិន ចុង (Chen Zhong) អនុប្រធានក្រុមហ៊ុនខាងលើ នៅក្នុងជំនួបជាមួយសម្ដេចតេជោ ហ៊ុន សែន កាលពីថ្ងៃទី ២៨ ខែមីនា ឆ្នាំ២០២៤ ក្នុងឱកាសអញ្ជើញចូលរួមវេទិកាបូអាវ ឆ្នាំ២០២៤ នៅក្រុងបូអាវ ខេត្តហៃណាន ប្រទេសចិន ។

ថ្លែងនៅក្នុងជំនួបខាងលើលោកអនុប្រធានក្រុមហ៊ុន បានជម្រាបជូនសម្ដេចតេជោថា ក្រុមហ៊ុនរបស់លោកបានសិក្សារួចហើយផ្លូវ ៥០សេ តភ្ជាប់ពីកំពង់ធំ ទៅកំពង់ឆ្នាំង និងកំណាត់ផ្លូវជាតិលេខ ៣ ពីកំពតទៅវាលរេញប្រវែងប្រមាណជា ២០ គីឡូម៉ែត្រ ដែលផ្លូវនេះខូចធ្វើមិនចេះជាប់ទេ ហើយក្រុមហ៊ុនរបស់លោកបានសិក្សាចប់សព្វគ្រប់ហើយ។

ក្នុងន័យនេះលោកអនុប្រធានក្រុមហ៊ុន បានស្នើសុំសម្តេចតេជោ ហ៊ុន សែន ជួយជម្រុញរដ្ឋាភិបាលចិនទម្លាក់ថវិកាដើម្បីក្រុមហ៊ុនយកទៅសាងសង់ ដោយសារក្រុមហ៊ុនរបស់លោកបានជួយថែរក្សាផ្លូវនោះរយៈពេល ២ ឆ្នាំមកហើយ។

សូមជម្រាបថា ក្រុមហ៊ុន CCCC ជាក្រុមហ៊ុនមេរបស់ក្រុមហ៊ុន China Road and Bridge  ដែលជាក្រុមហ៊ុនបានសិក្សាសាងសង់គម្រោងហេដ្ឋារចនាសម្ព័ន្ធជាច្រើននៅកម្ពុជាដូចជា៖ គម្រោងផ្លូវល្បឿនលឿនភ្នំពេញទៅកាន់ក្រុងព្រះសីហនុ គម្រោងផ្លូវល្បឿនលឿនពីភ្នំពេញទៅបាវិត ផ្លូវល្បឿនលឿនពីភ្នំពេញទៅខេត្តសៀមរាប ពីសៀមរាបទៅប៉ោយប៉ែត និងសិក្សាគម្រោងព្រៃជីកហ្វូណនតេជោ។

ក្នុងជំនួបនេះ លោក ឈិន ចុង បានជម្រាបសម្តេចតេជោពីវឌ្ឍនភាពនៃគម្រោងសាងសង់ផ្លូវល្បឿនលឿនភ្នំពេញ-បាវិត និងផ្លូវល្បឿនលឿនភ្នំពេញ-សៀមរាប-ប៉ោយប៉ែតផងដែរ។

សម្តេចតេជោ ហ៊ុន សែន បានលើកឡើងថា គម្រោងព្រែកជីកហ្វូណនតេជោ ជាគម្រោងដឹកជញ្ជូនផ្លូវទឹកដ៏សំខាន់សម្រាប់កម្ពុជាផងដែរ។

លោក ឈិន ចុង បានជម្រាបសម្ដេចតេជោ ហ៊ុន សែន ថា លោកបានយល់ពីសារសំខាន់គម្រោងប្រវត្តិសាស្រ្តមួយនេះ ហើយលោកនឹងប្រឹងប្រែងឱ្យគម្រោងព្រែកជីកហ្វូណនតេជោ បានចេញជារូបរាងតាមអនុសាសន៍ណែនាំរបស់សម្តេចតេជោ ហ៊ុន សែន និងសម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា។