ក្នុងរយៈពេល២ខែដំបូង កម្ពុជាទាក់ទាញគម្រោងវិនិយោគចំនួន១,០៦ពាន់លានដុល្លារ

របាយការណ៍ថ្មីរបស់ក្រុមប្រឹក្សាអភិវឌ្ឍន៍កម្ពុជា បានបង្ហាញអោយដឹងថា ក្នុងរយៈពេល២ខែដំបូងនៃឆ្នាំ២០២៥នេះ កម្ពុជាបានអនុម័តគម្រោងវិនិយោគទ្រព្យសកម្មថេរដែលមានតម្លៃ ១,០៦៩ លានដុល្លារអាមេរិក ជាមួយនឹងចំនួនគម្រោងសរុបចំនួន១០៤ គម្រោង។

របាយការណ៍បានបន្តថា គម្រោងវិនិយោគដែលបានអនុម័តនឹងបង្កើតការងារប្រមាណ ៧១,០០០ កន្លែងសម្រាប់ប្រជាជនក្នុងតំបន់។

គម្រោងដែលលេចធ្លោរួមមាន រោងចក្រផលិតគ្រឿងអេឡិចត្រូនិក រោងចក្រផលិតកង់អេឡិចត្រូនិចនិងម៉ូតូ រោងចក្រដែក រោងចក្រកាត់ដេរនិងវាយនភណ្ឌ រោងចក្រកែច្នៃផ្លែឈើ និងសណ្ឋាគារប្រណីត ក្នុងចំណោមគម្រោងផ្សេងៗទៀត។

ក្នុងចំណោមគម្រោងវិនិយោគទាំងអស់ គម្រោងវិនិយោគចំនួន ៦០ មានទីតាំងនៅក្រៅតំបន់សេដ្ឋកិច្ចពិសេស និង ៥២ គម្រោងស្ថិតនៅក្នុងតំបន់សេដ្ឋកិច្ចពិសេស។

ប្រទេសចិនបាននាំមុខគេក្នុងការវិនិយោគផ្ទាល់ពីបរទេសមកកម្ពុជា បន្ទាប់មកអ្នកវិនិយោគក្នុងស្រុក អ្នកវិនិយោគវៀតណាម និងសិង្ហបុរី។

ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ក្រុមប្រឹក្សាអភិវឌ្ឍន៍កម្ពុជា បានមានប្រសាសន៍ថា៖ «ការកើនឡើងលំហូរវិនិយោគមកកម្ពុជា ឆ្លុះបញ្ចាំងពីទំនុកចិត្តរបស់អ្នកវិនិយោគលើស្ថិរភាពនយោបាយដ៏រឹងមាំនៅក្នុងប្រទេស»។

ឯកឧត្តមបានបន្ថែមថា ដើម្បីទាក់ទាញការវិនិយោគក្នុងបរិបទនៃសម្ពាធសង្រ្គាមពាណិជ្ជកម្ម ក្រុមប្រឹក្សាអភិវឌ្ឍន៍កម្ពុជាកំពុងពិនិត្យមើលដើម្បីធ្វើកំណែទម្រង់បន្ថែមទៀតដើម្បីកំណត់បញ្ហា និងបង្កើតការលើកទឹកចិត្តបន្ថែមទៀតដល់វិនិយោគិន។

គួរជម្រាបផងដែលថា កាលពីឆ្នាំមុន កម្ពុជាបានទាក់ទាញការវិនិយោគទ្រព្យសកម្មថេរចំនួន៤១៤ ដែលមានទុនវិនិយោគសរុបចំនួន ៦.៩ ពាន់លានដុល្លារអាមេរិក កើនឡើង៤០ ភាគរយពី ៤.៩២ ដុល្លារអាមេរិកកាលពីឆ្នាំមុន (២០២៣) ។