ពីរខែដំបូង ទំហំ​ពាណិជ្ជកម្ម​កម្ពុជា-អាស៊ាន​បានជាង ២,៧ ពាន់លានដុល្លារ

យោងតាមរបាយការណ៍ក្រសួងពាណិជ្ជកម្ម ក្នុងរយៈពេលពីរខែដំបូងនៃឆ្នាំ២០២៥នេះ ទំហំពាណិជ្ជកម្មរវាងកម្ពុជា ជាមួយបណ្តាប្រទេសជាសមាជិកអាស៊ានសម្រេចបានជាង ២,៧៥១ ពាន់លានដុល្លារអាមេរិក ធ្លាក់ចុះ ០,៣៥% ពីចំនួន ២,៧៦១ ពាន់លានដុល្លារក្នុងរយៈពេលដូចគ្នាកាលពីឆ្នាំមុន។

របាយការណ៍បានអោយដឹងថា ពាណិជ្ជកម្មរបស់កម្ពុជាជាមួយប្រទេសសមាជិកអាស៊ានមានចំនួនស្មើនិង ២៨,៧% នៃទំហំពាណិជ្ជកម្មអន្តរជាតិសរុប។ ការនាំចេញរបស់កម្ពុជាទៅកាន់បណ្តាប្រទេសអាស៊ានមានចំនួន ៩៧០ លានដុល្លារអាមេរិក ធ្លាក់ចុះ៨,៨៧%។ ចំណែកឯការនាំចូលពីបណ្តាប្រទេសក្នុងតំបន់អាស៊ានមកកម្ពុជាវិញ មានចំនួន ១,៧៧ ពាន់លានដុល្លារអាមេរិក ដែលកើនឡើង៥% បើធៀបនឹងរយៈពេលដូចគ្នាកាលពីឆ្នាំមុន។

របាយការណ៍បានឱ្យដឹងទៀតថា កម្ពុជាបាននាំចេញកសិផល សម្លៀកបំពាក់ ស្បែកជើង កាបូប គ្រឿងអេឡិចត្រូនិក និងកង់ ទៅកាន់ប្រទេសអាស៊ាន ខណៈដែលការនាំចូលមានដូចជា៖ ចំណីអាហារ ភេសជ្ជៈ ឧបករណ៍អគ្គិសនី និងអេឡិចត្រូនិក សម្ភារសំណង់ គ្រឿងយន្តកសិកម្ម និងយានជំនិះ។ល។

បើតាមរបាយការណ៍ក្រសួងពាណិជ្ជកម្ម បានបញ្ជាក់ទៀតថា ក្នុងរយៈពេលពីរខែដំបូងឆ្នាំនេះ ទំហំពាណិជ្ជកម្មរវាងកម្ពុជា និងទីផ្សារអន្តរជាតិ សម្រេចបានជាង ៩,៥៨៦ ពាន់លានដុល្លារអាមេរិក កើនឡើង១៥,៤៧% ធៀបនឹងក្នុងរយៈពេលដូចគ្នាកាលពីឆ្នាំមុន។ ក្នុងនោះ កម្ពុជាបាននាំចេញទំនិញក្នុងតម្លៃ ៤,៥៩៩ពាន់លានដុល្លារអាមេរិក កើនឡើង១៤,២៥%។ ចំណែកការនាំចូលទំនិញមកវិញមានតម្លៃ ៤,៩៨៧ពាន់លានដុល្លារ កើនឡើង១៦,៦២។

របាយការណ៍បង្ហាញបន្ថែមថា ក្នុងរយៈពេលពីរខែដំបូងឆ្នាំនេះ ទំហំពាណិជ្ជកម្មរបស់កម្ពុជាជាមួយប្រទេសសមាជិកRCEP សម្រេចបានដល់ ៦,១១៩ពាន់លានដុល្លារអាមេរិក ដែលបានកើនឡើង ១១,២% ពីចំនួន ៥,៥០២ ពាន់លានដុល្លារ ក្នុងរយៈពេលដូចគ្នាកាលពីឆ្នាំមុន។