ឧស្សាហកម្មទេសចរណ៍កម្ពុជាកំពុងងើបឡើងវិញយ៉ាង​ពេញ​ទំហឹង！

គិតចាប់ពីថ្ងៃទី១០ ដល់ថ្ងៃទី១៦ ខែកក្កដា ឆ្នាំ២០២៣ ទេសចរដែលដើរកម្សាន្តនៅតាមតំបន់ទេសចរណ៍នានា នៅក្នុងប្រទេសកម្ពុជា មានចំនួន ២៩៦ ០០៥នាក់។ ក្នុងនោះភ្ញៀវជាតិ មានចំនួន ២៥៩ ៤៤១នាក់ និងភ្ញៀវបរទេសផ្ទៃក្នុងមានចំនួន ៣៦ ៥៦៤នាក់។

យោងតាមស្ថិតិភ្ញៀវទេសចរណ៍នៃសប្តាហ៍ទី២នេះ ពីក្រសួងទេសចរណ៍បានអោយដឹងថា មានខេត្តចំនួន៤ និងរាជធានីភ្នំពេញ ដែលទេសចរទៅកម្សាន្តច្រើនជាងគេ នោះគឺ៖

- ខេត្តព្រះសីហនុ ដែលមានទេសចរណ៍ ៦៦ ៥៥៧នាក់ ក្នុងនោះភ្ញៀវបរទេសមានជាង ៤ពាន់នាក់។ ចំនួនទេសចរណ៍នៃខេត្តនេះ បានកើនឡើងជាង ៥០០នាក់ បើធៀបនឹងសប្តាហ៍ទី១។

- ចំណាត់ថ្នាក់ទី២គឺខេត្តបាត់ដំបង ដែលមានទេសចរណ៍ ៣៥ ៦៦៤នាក់ ក្នុងនោះភ្ញៀវអន្តរជាតិមានជាង ៦០០នាក់។ 

- លំដាប់ទី៣គឺរាជធានីភ្នំពេញ ដែលមានទេសចរ ៣៣ ២១១នាក់ ដោយទេសចរបរទេសជាង ២ម៉ឺននាក់។ 

- បន្ទាប់មកគឺខេត្តកំពត ដែលមានទេសចរ ២៧ ៦៧៥នាក់ និងទេសចរអន្តរជាតិមានជាង ១ពាន់នាក់

លើសពីនេះ ខេត្តផ្សេងទៀតក្នុងប្រទេសកម្ពុជា ដូចជាខេត្តសៀមរាប ក៏មានភ្ញៀវទេសចរណ៍ចំនួន ២២ ៥៣៥ នាក់ ក្នុងនោះមានភ្ញៀវអន្តរជាតិជាង ៥ ពាន់នាក់។ ចំណែកខេត្តកំពង់ស្ពឺ ពោធិ៍សាត់ និងកែប ក៏មានភ្ញៀវទេសចរជាង ១ម៉ឺននាក់ដូចគ្នា។

ចំនួនភ្ញៀវទេសចរខាងលើ មានការកើនឡើងប្រមាណ ៣,១៥ភាគរយ ធៀបនឹងសប្តាហ៍កន្លងមក ក្នុងនោះភ្ញៀវជាតិកើនឡើង ៣,៤ភាគរយ និងភ្ញៀវអន្តរជាតិកើនឡើង ១,៣៦ភាគរយ។ 

បើទោះជាខេត្តព្រះសីហនុ មានទេសចរកើនឡើង តែរដ្ឋបាលខេត្តព្រះសីហនុ បានប្រកាសពីស្ថានភាពអាកាសធាតុ ដើម្បីឱ្យប្រជាពលរដ្ឋ ដែលរស់នៅក្បែរសមុទ្រ មានការប្រុងប្រយ័ត្ន ទាំងអ្នកនេសាទ និងទេសចរជិះទូកឆ្លងទៅកម្សាន្តផងដែរ។ 

យោងតាមរបាយការណ៍ចុងក្រោយដែលចេញផ្សាយដោយធនាគារអភិវឌ្ឍន៍អាស៊ី (ADB) វីស័យទេសចរណ៍នៅក្នុងតំបន់អាស៊ីប៉ាស៊ីហ្វិក និងប្រទេសកម្ពុជាកំពុងមានការងើបឡើងវិញយ៉ាងគួរអោយកត់សម្គាល់។ របាយការណ៍នេះបានបញ្ជាក់ថា ការងើបឡើងនៃវិស័យទេសចរណ៍នេះ បានបន្តធ្វើអោយមានការកើនឡើងយ៉ាងច្រើននូវចំនួនភ្ញៀវទេសចរនិងសកម្មភាពនានា។

ទោះបីជា ADB រក្សាការព្យាករណ៍របស់ខ្លួនសម្រាប់កំណើនរបស់តំបន់អាស៊ីប៉ាស៊ីហ្វិកភាគច្រើន ទីភ្នាក់ងារនេះបានកាត់បន្ថយការព្យាករណ៍របស់ខ្លួនសម្រាប់អាស៊ីអាគ្នេយ៍មកត្រឹម 4.6%នៅឆ្នាំនេះ និង4.9%នៅឆ្នាំក្រោយ បើធៀបនឹងការព្យាករណ៍ក្នុងខែមេសា ដែលមានចំនួន4.7% និង 5.0%។

យោងតាមការព្យាករណ៍ពីរបាយការណ៍ វិស័យទេសចរណ៍ និងកសិកម្មនៅកម្ពុជាត្រូវបានគេរំពឹងថានឹងកើនឡើង 7.3% និង 1.1%នៅឆ្នាំនេះ។ នៅឆ្នាំក្រោយ កំណើនទេសចរណ៍ត្រូវបានគេរំពឹងថានឹងធ្លាក់ចុះមកនៅត្រឹម6.8% ខណៈវិស័យកសិកម្មត្រូវបានគេរំពឹងថានឹងកើនឡើង1.2%។