អ្នកឧកញ៉ាលាងម៉េង៖ វិស័យអចលនទ្រព្យនៅកម្ពុជាអាចនឹងប្រសើរឡើងវិញនៅអំឡុងខែតុលាឆ្នាំ២០២៤

បច្ចុប្បន្ននេះស្ថានភាពក្នុងវិស័យអចលនទ្រព្យមិនទាន់មានភាពនឹងនរ នៅឡើយនោះទេ។ នៅក្នុងកម្មវិធីវេទិកាធុរកិច្ចឆ្នាំ២០២៣ និងពិធីពិសាអាហារសាមគ្គី ដែល រៀបចំដោយសមាគមឧកញ៉ាកម្ពុជា អ្នកឧកញ៉ា  លាង ម៉េង ប្រធានអគ្គនាយកក្រុមហ៊ុនជីប ម៉ុង គ្រុប បានលើកឡើងថា ស្ថានភាពនេះអាចបន្តអូសបន្លាយរហូតដល់ខែតុលា ឆ្នាំ២០២៤។

អ្នកឧកញ៉ាបានបន្ថែមថា លោកមានគម្រោងអចលនទ្រព្យចំនួន៦ ហើយអះអាងតែនៅតែលក់ចេញបាន ដោយគ្រាន់តែចំនួនថយជាងមុន ប៉ុន្តែអ្នកទិញរបស់លោកភាគច្រើនគឺជាម្ចាស់ដែលរស់នៅទីនោះពិតប្រាកដ មិនមែនគ្រាន់តែទិញតាមគ្នាដើម្បីប្រាក់ចំណេញនោះឡើយ។

គាត់បានបន្តថា “ខ្ញុំសង្ឃឹមថា រដ្ឋាភិបាលថ្មី គាត់បានយល់ច្បាស់ ដូច្នេះគាត់នឹងមានតិចនិចយុទ្ធសាស្ត្រ ដើម្បីធ្វើឱ្យ ដូចឆ្នាំ២០១៨ លើការវិនិយោគនៅក្រុងព្រះសីហនុ។ ខ្ញុំមើលឃើញថា ក្នុងឆ្នាំ២០២៤ ដើមឆ្នាំមិនទាន់សូវល្អនោះទេ ប៉ុន្តែខែ១០ (ខែតុលា) គ្រប់យ៉ាងប្រហែលនឹងប្រសើរ”។

យោងតាមការបកស្រាយពី អ្នកឧកញ៉ា លាង ម៉េង បានបញ្ជាក់ថា មានកត្ដាធំៗ៣ ដែលធ្វើឲ្យគម្រោងទាំងនោះជាប់គាំងមិនអាចបន្ដដំណើរទៅមុខបាន៖

១. ការសាងសង់លំនៅដ្ឋានច្រើនជាងតម្រូវការជាក់ស្តែង

ត្រង់ចំណុចនេះអ្នកឧកញ៉ាបានលើកឡើងថា “អ្នកវិនិយោគមួយចំនួនឃើញBusinessមួយនឹងល្អ អ៊ីចឹងម្នាក់ៗនាំគ្នាវិនិយោគតាមគ្នា ឃើញចំណេញនាំគ្នាធ្វើតាមគ្នា ការសាងសង់ចាប់ផ្ដើមច្រើនទៅ ដោយសេដ្ឋកិច្ចពិភពលោក មិនប្រាកដផង ដែលធ្វើឲ្យប៉ះមកដល់យើងដែរ”។

២. ការរៀបចំលំហូរសាច់ប្រាក់ (Cash flow) មិនបានត្រឹមត្រូវ

ចំពោះចំណុចនេះ អ្នកឧកញ៉ា បន្តថា “ មួយរយៈនេះមានការតវ៉ា ដែលមានការលើកឡើងថា ម្ចាស់គម្រោងបោកប្រាស់គាត់ ដោយសារតែ ម្ចាស់គម្រោងមិនបានរៀបចំ Cash flow មិនបានត្រឹមត្រូវ ដោយគាត់មិនគិតច្បាស់លាស់ ។ 

៣. ការវិនិយោគ

ដោយឡែកចំពោះចំណុចនេះវិញ  “ ដូចយើងមើលឃើញជាក់ស្ដែង គឺដោយសារអ្នកទិញ ឃើញថាវាជាឱកាសនាំគ្នាទិញទុក ដែលនេះជាការប៉ះពាល់ធំ។ ឧទាហរណ៍ របស់នោះត្រូវការតែ១០ ប៉ុន្តែអ្នកវិនិយោគនាំគ្នាទៅទិញដល់ទៅ២០ ដោយប៉ះ Cash flow មិនត្រឹមត្រូវហើយអ្នកវិនិយោគច្រើនផងធ្វើឲ្យគម្រោងនោះជាប់គាំងតែម្តង”។