ពិតជាអស្ចា្យមែន ! ក្រុមហ៊ុនចិនធំៗចំនួន៨ចាប់អារម្មណ៍វិនិយោគក្នុងខេត្តព្រះសីហនុ

ក្រុមហ៊ុនចិនធំៗចំនួន៨ទៀត បាននឹងកំពុងតែធ្វើការសិក្សានិងបង្ហាញអំពីគោលបំណងវិនិយោគនៅក្នុងខេត្តព្រះសីហនុ ដែលជាខេត្តមានការរីកចម្រើន និងមានសក្តានុពលផ្នែកសេដ្ឋកិច្ចមួយនេះ។

ក្នុងជំនួបពិភាក្សាការងារជាមួយលោក យន្ត មីនដែលជាអភិបាលខេត្តព្រះសីហនុកាលពីចុងសប្តាហ៍មុន លោក LUO ZHUOWEI ដែលជានាយករងមជ្ឈមណ្ឌលជំរុញការវិនិយោគ នៃសាធារណរដ្ឋប្រជាមានិតចិនបានឲ្យដឹងថាក្រុមហ៊ុនរបស់លោកមានបទពិសោធន៍ជាច្រើនឆ្នាំរួចមកហើយក្នុងការ គ្រប់គ្រង ទឹកស្អាត កាកសំណល់ សំរាម ទឹកកខ្វក់ និងសន្តិសុខ។ហើយក្រុមហ៊ុនរបស់លោកក៏ចង់មកធ្វើការវិនិយោគនៅក្នុងខេត្តព្រះសីហនុ ដែលជាខេត្តមួយស្ថិតក្នុងចំណោមតំបន់នៃគោលនយោបាយផ្លូវមួយខ្សែក្រវាត់មួយរបស់ប្រធានាធិបតីចិនផងដែរ។

លោក យន្ត មីន អភិបាលខេត្តព្រះសីហនុលោកបានធ្វើការស្វាគមន៍ក្រុមហ៊ុនទាំង៨នេះដែលមានគោលបំណងចង់មកវិនិយោគនៅក្នុងខេត្តព្រះសីហនុ ស្របពេលដែលខេត្តព្រះសីហនុ កំពុងត្រូវបានអភិវឌ្ឍន៍យ៉ាងគំហុកជាខ្លាំងក្រៃលែង។ ម្យ៉ាងទៀតការអភិវឌ្ឍរមែងមានផលប៉ះពាល់ផ្នែកបរិស្ថាន អនាម័យមួយចំនួនផងដែរ ហេតុនេះក្រុមហ៊ុនត្រូវគោរពតាមគោលការណ៍ច្បាប់នៃព្រះរាជាណាចក្រកម្ពុជា។

លោកក៏បានបន្តថា ក្នុងរយៈពេល២ឆ្នាំនេះ មានក្រុមហ៊ុនបរទេសជាច្រើនបានមកធ្វើការវិនិយោគនៅក្នុងខេត្តព្រះសីហនុ ទន្ទឹមនឹងនោះក៏មានក្រុមហ៊ុនមួយចំនួនបាននឹងកំពុងតែធ្វើការសិក្សាស្វែងយល់លើគម្រោងហេដ្ឋារចនាសម្ព័ន្ធ ផ្លូវថ្នល់ លូ បរិស្ថានជាដើម ក្នុងចំណោមក្រុមហ៊ុនទាំងនោះភាគច្រើនគឺមកពីប្រទេសចិន”។ 

លោកយន្ត មីនបានបន្តថា រដ្ឋបាលខេត្តនឹងស្វាគមន៍គ្រប់ក្រុមហ៊ុនទាំងអស់ ដែលមានគោលបំណងចង់មកធ្វើការវិនិយោគនៅក្នុងខេត្តព្រះសីហនុមិនថាការវិនិយោគ លើអគារពាណិជ្ជកម្ម សណ្ឋាគារ ខុនដូ រោងចក្រ សហគ្រាស ឬហេដ្ឋារចនាសម្ព័ន្ធ នានាក្នុងខេត្ត រដ្ឋបាលខេត្តនឹងទទួលស្វាគមន៍ទាំងអស់ហើយក៏និងជួយសម្របសម្រួល ដើម្បីឱ្យដំណើរការវិនិយោគនៅក្នុងខេត្តមួយនេះប្រព្រឹត្តទៅដោយរលូននិងមានសន្ទុះកាន់តែកើនឡើងដើម្បីចូលរួមចំណែកកាត់បន្ថយភាពក្រីក្ររបស់ប្រជាពលរដ្ឋដែលមានក្នុងប្រទេសកម្ពុជា។ តាមរយៈការវិនិយោគ ទាំងនេះបានធ្វើឱ្យខេត្តព្រះសីហនុមានការរីកចម្រើនយ៉ាងលឿនស្ទើរតែនឹកស្មានមិនដល់ហើយក៏បានធ្វើឱ្យអ្វីៗមានការប្រែប្រួលនាពេលបច្ចុប្បន្ន និងទៅអនាគតផងដែរ៕