គ្រប់ទឹកហើយ ! គ្រាន់តែផ្ទុះដំណឹងកូរ៉េខាងត្បូងជួយសាងសង់ស្ពានជ្រោយចង្វារ-ស្វាយជ្រុំស្រាប់តែតម្លៃដីតំបន់នេះឡើងថ្លៃភ្លែត

ក្រោយពីមានការប្រកាសផ្ទាល់ពីសំណាក់ប្រធានាធិបតីកូរ៉េខាងត្បូងក្នុងកិច្ចប្រជុំកំពូលអាស៊ាន-កូរ៉េកាលពីពេលថ្មីៗកន្លងមកនេះអំពីគម្រោងជួយសាងសង់ស្ពានពីតំបន់ជ្រោយចង្វារទៅតំបន់ស្វាយជ្រុំ ពេលនេះស្រាប់តែតម្លៃដីក្នុងតំបន់អរិយក្សត្រចាប់ផ្តើមឡើងថ្លៃជាបណ្តើរៗ ។

តាមប្រភពភ្នាក់ងារអចលនទ្រព្យមួយរូបបានឱ្យដឹងថា ក្រោយលេចឮព័ត៌មានពីគម្រោងសាងសង់ស្ពានភ្លាមធ្វើឱ្យតម្លៃដីក្នុងតំបន់នោះចាប់ផ្តើលឡើងថ្លៃភ្លាមៗ ។ មូលហេតុដែលធ្វើឱ្យដីនៅតំបន់នេះឡើងថ្លៃ ដោយសារតែតំបន់នោះនឹងកាន់តែគៀកជាមួយរាជធានីភ្នំពេញ ហើយវាក៏នឹងក្លាយជាតំបន់ដែលទាក់ទាញការវិនិយោគកាន់តែច្រើនផងដែរ បើសិនជាស្ពានត្រូវបានសាងសង់ភ្ជាប់តំបន់ទាំងពីរនេះមែន ។

តម្លៃដីលំនៅដ្ឋាន និងដីពាណិជ្ជកម្មបានឡើងថ្លៃចន្លោះពី៣០០ដុល្លារទៅ៧៥០ដុល្លារក្នុងមួយម៉ែត្រការ៉េ រីឯដីចំការបានឡើងថ្លៃរហូតដល់ជិត១០០ដុល្លារក្នុងមួយម៉ែត្រការ៉េ ។ ប្រសិនបើគម្រោងសាងសង់ស្ពានកាន់តែច្បាស់ជាងនេះតម្លៃដីនឹងកាន់តែប្រែប្រួលថែមទៀត ៕

អត្ថបទដោយ ៖ សំណាង / Compass Original