ដំណឹងល្អ ! បើចំណូលក្រោមលក្ខខណ្ឌកំណត់៣នេះអ្នករកស៊ីមិនបាច់បង់ពន្ធឡើយ

ស្ទើរតែគ្រប់ប្រទេសអភិវឌ្ឍទាំងអស់នៅលើពិភពលោក ចំណូលពន្ធគឺជាចំណូលចម្បងដែលរួមចំណែកក្នុងការអភិវឌ្ឍ និងធានានិរន្តរភាពនៃស្ថានភាពថវិការរបស់ប្រទេស ។ សម្រាប់កម្ពុជាការបង្កើនចំណូលពីការបង់ពន្ធគឺជាមធ្យោបាយដ៏សំខាន់មួយដើម្បីឈានទៅបញ្ឈប់ការពឹងផ្អែកលើជំនួយពីបរទេស ។

តាមការពិតការបង់ពន្ធរបស់ប្រជាពលរដ្ឋគឺជាការចូលរួមចំណែកក្នុងថវិកាជាតិដើម្បីឱ្យរដ្ឋមានលុយយកទៅចំណាយដោយមិនចាំបាច់បោះពុម្ពលុយដែលអាចបង្កឱ្យមានបញ្ហាអតិផរណា ។ សម្រាប់អ្នករកស៊ីមួយចំនួនអាចអស់ក្តីបារម្ភតទៅទៀតព្រោះបើចំណូលទាបជាងការកំណត់ទាំងនេះគឺមិនតម្រូវឱ្យមានការបង់ពន្ធឡើយ ដែលកម្រិតអ្នកជាប់ពន្ធមាន៣ដូចខាងក្រោម ៖

ទី១-អ្នកជាប់ពន្ធតូច

មានចំណូលចាប់ពី២៥០លានរៀល ទៅដល់ ៧០០លានរៀល ត្រូវបង់ពន្ធប៉ាតង់ប្រចាំឆ្នាំចំនួន៤០០០០០រៀល

ទី២-អ្នកជាប់ពន្ធមធ្យម

មានផលរបរចាប់ពី៧០០លានរៀល ដល់ ៤០០០លានរៀល ត្រូវបង់ពន្ធប៉ាតង់ប្រចាំឆ្នាំចំនួន ១ ២០០ ០០០ រៀល

ទី៣-អ្នកជាប់ពន្ធធំ

ដែលមានផលរបរ (Turnover) លើសពី ៤ ០០០ លានរៀល ដល់ ១០ ០០០ លានរៀល ត្រូវបង់ពន្ធប៉ាតង់ប្រចាំឆ្នាំចំនួន ៣ ០០០ ០០០ រៀល ។ ករណីអាចរកបានលើសពី ១០ ០០០ លានរៀល ត្រូវបង់ពន្ធប៉ាតង់ប្រចាំឆ្នាំចំនួន ៥ ០០០ ០០០ រៀល ។

ចំណែកឯអ្នករកស៊ីដែលមានចំណូលទាបជាងលក្ខខណ្ឌ ៣ ចំណុចខាងលើគឺមិនមានការបង់ពន្ធជូនរដ្ឋនោះឡើយ ៕

អត្ថបទដោយ ៖ សំណាង