អាកាសធាតុនឹងឡើងកំដៅដល់៣៩អង្សាសេ ហើយមានផ្គរ រន្ទះ និងខ្យល់កន្ត្រាក់ពីថ្ងៃទី១៧ ដល់២៣ មីនា

ក្រសួងធនធានទឹក និងឧតុនិយមបានឲ្យដឹងថា ចាប់ពីថ្ងៃទី ១៧ រហូតដល់ថ្ងៃទី២៣ ខែមីនានេះ អាកាសធាតុនៅក្នុងប្រទេសកម្ពុជានឹងឡើងកម្ដៅដល់ 39 អង្សាសេ ហើយមានផ្គររន្ទះ និងខ្យល់កន្ត្រាក់ ។

យោងតាមការសេចក្តីជូនដំណឹងរបស់ក្រសួងធនធានទឹកស្តីពីអាកាសធាតុបានលើកឡើងថា តាមរយៈការតាមដានស្ថានភាពអាកាសធាតុជាប់បន្តបន្ទាប់ សង្កេតឃើញថា កម្រិតសម្ពាធទាបនៅលើផ្ទៃដី និងសម្ពាធខ្ពស់នៅរយៈកម្ពស់គ្របដណ្តប់លើព្រះរាជាណាចក្រកម្ពុជា ។

ក្រសួងបន្តថា ស្ថានភាពបែបនេះធ្វើឲ្យធាតុអាកាសបន្តក្តៅនៅពេលថ្ងៃ ៖ ១.បណ្តាខេត្តនៅតំបន់វាលទំនាបកណ្តាល សីតុណ្ហភាពអប្បបរមា មានពី២៦-២៨អង្សាសេ និងសីតុណ្ហភាពមានពី៣៧-៣៩អង្សាសេ ។

ស្ថានភាពបែបនេះអាចមានភ្លៀងកម្រិតតិចទៅមធ្យម ជាមួយនឹងផ្គរ រន្ទះ និងខ្យល់កន្ត្រាក់ ។ ចំណែកខេត្តនៅតំបន់ខ្ពង់រាបឦសានសីតុណ្ហភាពអប្បរមាពី២៦-២៨អង្សាសេ និងសីតុណ្ហភាពអតិបរិមាពី៣៤-៣៦អង្សាសេ ។ តំបន់នៅមាត់សមុទ្រ មានសីណ្ហភាពអប្បរមាពី២៦-២៨អង្សាសេ និងសីតុណ្ហភាពអតិបរិមា៣៥-៣៧អង្សាសេ។

ក្រសួងបានលើកឡើងទៀតថា ចាប់ពីថ្ងៃទី១៧-២៣ខែមីនា នឹងអាចមានភ្លៀងខ្សោយ ដោយឡែកតែខេត្តកោះកុងនឹងអាចមានភ្លៀងនៅក្នុងកម្រិតតិចទៅមធ្យម ។ ជាមួយគ្នានោះដែរ ក្រសួងក៏បានអំពាវនាវថែរក្សាសុខភាពចំពោះការកើនកម្តៅ និងសូមឲ្យមានការប្រុងប្រយ័ត្នចំពោះបាតុភូត ផ្គរ រន្ទះ និងខ្យល់កន្ត្រាក់ ពិសេសបណ្តាខេត្តនៅភាគពាយ័ព្យចាប់ពីថ្ងៃទី១៨ ដល់២១ មីនា ឆ្នាំ២០២០ ៕(ព័ត៌មាននេះមានប្រភពមកពីKoh Santepheap.com)