កម្ពុជានឹងចុះត្រជាក់ដល់២៤អង្សាសេ និងមានភ្លៀង ផ្គរ រន្ទះ និងខ្យល់កន្ត្រាក់ចាប់ពីថ្ងៃទី១ ដល់៧មេសា

ប្រទេសកម្ពុជានឹងចុះត្រជាក់រហូតដល់ ២៤ អង្សាសេ ចាប់ពីថ្ងៃទីមួយដល់ថ្ងៃទី 7 ខែមេសាមានភ្លៀង ផ្គរ រន្ទះ និងខ្យល់កន្ត្រាក់ខាងមុខនេះ ។ នេះបើតាមក្រសួងធនធានទឹក និងឧតុនិយម ។

យោងតាមការចេញផ្សាយរបស់ក្រសួងធនធានទឹក និងឧតុនិយមនៅថ្ងៃទី៣១ ខែមីនានេះ ស្តីពីស្ថានភាពធាតុអាកាសបានឲ្យដឹងថា តាមរយៈការតាមដានស្ថានភាពអាកាសធាតុជាបន្តសង្កេតឃើញថា ព្រះរាជាណាចក្រកម្ពុជាទទួលឥទ្ធិពលជ្រលងសម្ពាធទាបនៅលើផ្ទៃដីជាមួយនឹងខ្យល់បក់មកពីសមុទ្រចិនខាងត្បូងនោះបានធ្វើឲ្យបណ្ដាខេត្តនៅតំបន់វាលទំនាបកណ្ដាលមានសីតុណ្ហភាពអប្បបរមា ២៥ដល់២៧អង្សាសេ ។ សីតុណ្ហភាពអតិបរមាមានពី៣៤ដល់៣៧អង្សាសេ ។

ក្រសួងបានឲ្យដឹងទៀតថា ចាប់ពីថ្ងៃទី២ ដល់៦ ខែមេសា នៅបណ្ដាលខេត្តនៅតំបន់វាលទំនាបភាគកណ្ដាល និងភាគពាយ័ព្យនឹងអាចមានភ្លៀងនៅក្នុងកម្រិតពេលខ្លាំងទៅបង្គួរ ចំណែកបណ្ដាខេត្តដទៃទៀតនឹងអាចមានភ្លៀងតិច ។

ចំណែកបណ្ដាខេត្តនៅខ្ពង់រាបភាគឦសានវិញ និងមានសីតុណ្ហភាពអប្បបរមាមានពី២៤ ដល់២៦អង្សាសេ និងសីតុណ្ហភាពអតិបរមាមានពី៣២ ដល់៣៤អង្សាសេ ។ ហើយចាប់ពីថ្ងៃទី២ ដល់៧ មេសាផ្នែកមួយចំនួននឹងអាចមានភ្លៀងនៅក្នុងកម្រិតខ្សោយទៅមធ្យម ។

ដោយឡែក បណ្ដាខេត្តនៅតំបន់មាត់សមុទ្រវិញ និងមានសីតុណ្ហភាពអប្បបរមា ២៥ដល់ ២៧ អង្សាសេ និងសីតុណ្ហភាពអតិបរមាមាន ពី៣៣ ដល់ ៣៥ អង្សាសេ ។ ហើយចាប់ពីថ្ងៃទី២ ដល់ថ្ងៃទី ៧ ខែមេសានៅក្នុងកម្រិតពីតិចទៅបង្គួរក្នុងនោះផ្នែកមួយចំនួននៃខេត្តកោះកុង និងអាចមានភ្លៀងធ្លាក់នៅក្នុងកម្រិតពីមធ្យមទៅបង្គួរ ។

ចំពោះស្ថានភាពអាកាសធាតុបែបនេះ ក្រសួងធនធានទឹក និងឧតុនិយមក៏បានអំពាវនាវដល់ប្រជាពលរដ្ឋមានការប្រុងប្រយ័ត្នចំពោះបាតុភូតផ្គរ រន្ទះ និងខ្យល់កន្ត្រាក់ដែលនឹងអាចកើតមានចាប់ពីថ្ងៃទី២ ដល់ថ្ងៃទី ៦ ខែមេសាផងដែរ ៕