ចាប់ពីថ្ងៃ២៤ ដល់៣០ មិថុនាកម្ពុជាមានភ្លៀងធ្លាក់ និងផ្គរ រន្ទះ ខ្យល់កន្ត្រាក់

ក្រសួងធនធានទឹក និងឧតុនិយមបានបញ្ជាក់ឲ្យដឹងថា ចាប់ពីថ្ងៃ២៤ ដល់៣០ ខែមិថុនា ឆ្នាំ២០២០ កម្ពុជានឹងមានភ្លៀងធ្លាក់ពីតិចទៅច្រើន ហើយបាតុភូតផ្គរ រន្ទះ និងខ្យល់កន្ត្រាក់ផងដែរ ។

យោងតាមសេចក្តីជូនដំណឹងរបស់ក្រសួងធនធានទឹកចេញផ្សាយនៅថ្ងៃទី២៣ ខែមិថុនា ឆ្នាំ២០២០ បានឲ្យដឹងថា តាមរយៈនៃការប្រែប្រួលជាបន្តបន្ទាប់នៃស្ថានភាពអាកាសធាតុសង្កេតឃើញថា ខ្យល់មូសុងនិរតីបក់ក្នុងកម្រិតបង្គួរ ជាមួយនឹងជ្រលងសម្ពាធទាប បន្តអូសបន្លាយលើកម្ពុជា ។

ក្រសួងបន្តថា ស្ថានភាពបែបនេះធ្វើឲ្យបណ្តាលខេត្តនៅតំបន់វាលទំនាបកណ្តាលនឹងអាចមានភ្លៀងធ្លាក់រាយប៉ាយ ក្នុងកម្រិតតិចទៅបង្គួរ ។

ក្នុងនោះក៏មានផ្នែកខ្លះនៃបណ្តាខេត្តនៅភាគពាយ័ព្យ ជាប់ប្រទេសថៃ ភាគខាងក្រោមនឹងភាគខាងកើតជាប់ប្រទេសវៀតណាម នឹងអាចមានភ្លៀងធ្លាក់ច្រើន ។

ចំណែកបណ្តាខេត្តនៅតំបន់ផ្នែកជួរភ្នំដងរែក និងខ្ពង់រាបឦសាន នឹងអាចមានភ្លៀងធ្លាក់រាយប៉ាយពីខ្យោយទៅមធ្យម ។ ហើយបណ្តាខេត្តនៅតំបន់មាត់សមុទ្រនឹងអាចមានភ្លៀងធ្លាក់ពីតិចទៅបង្គួរផងដែរ ។

ក្រសួងក៏បានអំពាវនាវឲ្យប្រជាពលរដ្ឋមានកាតប្រុងប្រយ័ត្នចំពោះបាតុភូតផ្គរ រន្ទះ និងខ្យល់កន្ត្រាក់ដែលនឹងអាចកើតមានជាយថាហេតុ៕(Koh Santepheap.com)