នៅលើពិភពលោកយើងនេះប្រទេសនិងជនជាតិនីមួយៗរមែងមានទំនៀមទម្លាប់រស់នៅរៀងៗខ្លួន ដែលលក្ខណនៃការរស់នៅនោះគឺ មានបែបផែនទៅតាមវប្បធម៌ ប្រពៃណី ទំនៀមទម្លាប់ និងស្ថានភាពជាក់ស្ដែងនៅក្នុងប្រទេសមួយនោះ។ បើយើងក្រលេកមកមើលក្នុងប្រទេសកម្ពុជាវិញ យើងឃើញថាមានជនជាតិចម្រុះពូជសាសន៍ជាច្រើនបានមកធ្វើការនិងស្នាក់នៅជាបន្តបន្ទាប់ពីមួយឆ្នាំទៅមួយឆ្នាំជាពិសេសជនជាតិអឺរ៉ុបនិងជនជាតិចិន។ តោះអញ្ជើញមកស្វែងយល់ទាំងអស់គ្នាថា លក្ខណៈរស់នៅរបស់ជនជាតិខ្មែរ ជនជាតិអឺរ៉ុប និងជនជាតិចិន មានលក្ខណៈខុសគ្នាឬដូចគ្នាអ្វីខ្លះ ហើយប្រភេទលំនៅដ្ឋានបែបណាដែលមានភាពពេញនិយមសម្រាប់ជនជាតិនីមួយៗ?
១. ជនជាតិខ្មែរ
រៀបរាប់អំពីលក្ខណៈនៃការរស់នៅរបស់ជនជាតិខ្មែរ យើងនឹងធ្វើការលើកយកការរស់នៅរាជធានីភ្នំពេញមកបង្ហាញ។ ក្នុងរយៈពេល ២០ ឆ្នាំចុងក្រោយនេះ យើងអាចសង្កេតឃើញថាមានអគារពាណិជ្ជកម្មទាបខ្ពស់ សំណង់លំនៅដ្ឋានជាច្រើនបានបង្ហាញខ្លួន ដូចជាផ្សិតដុះ។ សម្រាប់ប្រជាជនខ្មែរ គឺមានលក្ខណនៃការរស់នៅរបស់គ្រួសារនីមួយៗ ចូលចិត្តរស់នៅប្រមូលផ្ដុំគ្នាបែបគ្រួសារធំដែលមានសមាជិកច្រើន។
ដូច្នេះហើយប្រជាជនខ្មែរភាគច្រើនមានទំនោរទៅរកការស្នាក់នៅក្នុងប្រភេទលំនៅឋានដូចជាផ្ទះល្វែង ផ្ទះក្នុងក្រុង និងផ្ទះវីឡាជាដើម ស្ថិតនៅលើលទ្ធភាពនៃថវិកា ព្រោះយោងតាមស្ថិតិភាគច្រើនគេគិតថាវាមានទំហំធំ សមល្មមអាចរស់នៅជាមួយសមាជិកគ្រួសារដោយគ្មានក្ដីព្រួយបារម្ភ ហើយបើចំទីតាំងល្អក៏អាចប្រកបអាជីវកម្មបានទៀតផង។ មិនតែប៉ុណ្ណោះ សម្រាប់ប្រភេទធម្មតា គេក៏មិនចាំបាច់ចំណាយលើសេវាបន្ថែមដូចជាថ្លៃសន្តិសុខ និងថ្លៃថែទាំ ដែលមាននៅក្នុងគម្រោងបុរីឬ ខុនដូនោះទេ។
ទោះបីជាមានតម្លៃសេវាបន្ថែម សម្រាប់គម្រោងបុរីនាពេលបច្ចុប្បន្ននេះក៏មានភាពល្បីល្បាញដែរ ដោយសារតែចំនួនប្រជាជនមានការកើនឡើង ក៏រុញឲ្យតម្រូវការផ្នែកលំនៅដ្ឋានក៏កើនឡើងដូចគ្នា ហើយសេវាបន្ថែមទាំងនោ របស់បុរីមួយចំនួនធំគឺអាចទទួលយកបាន។ បើយើងបង្វែរចក្ខុទៅសង្កេតលើប្រភេទលំនៅដ្ឋានបែបលោកខាងលិចដែលគេដឹងភាគច្រើនថាជាអាផាតមិនឬខុនដូនោះវិញ គឺមិនសូវឃើញមានជនជាតិខ្មែររស់នៅច្រើននោះទេ។ បើផ្អែកទៅលើស្ថិតិដែលខមភើសបានមកពីម្ចាស់គម្រោងមួយចំនួន បានបង្ហាញឲ្យដឹងថា ប្រជាជនក្នុងស្រុកដែលបានទិញ អាចថាពួកគាត់ទុកសម្រាប់រស់នៅម្ដងម្កាល ឬក៏ទុកសម្រាប់ជួលឬលក់ចេញដើម្បីទទួលបានប្រាក់ចំណេញតែម្ដង។ ដោយស្ថានភាពនេះក៏អាចមកពីអគារខុនដូច្រើនមានភាពឯកជនខ្ពស់ ដូច្នេះប្រសិនបើមានកម្មវិធីជប់លៀងឬក៏ធ្វើការជួបជុំគ្នា អាចនឹងមានភាពលំបាកជាជាងការរស់នៅបុរីឬលំនៅឋានប្រភេទធម្មតា។
២.ជនជាតិចិន
ក្នុងនាមជាជនជាតិអាស៊ីដូចគ្នា ការរស់នៅរវាងជនជាតិចិននិងជនជាតិខ្មែរ មិនសូវមានភាពខុសគ្នាប៉ុន្មានទេ។ បើមើលទៅក្នុងប្រទេសចិន យើងក៏ឃើញមានប្រភេទផ្ទះវីឡាដែរ តែដោយសារការគួបផ្សំរវាងកំណើនប្រជាជនកាន់តែច្រើន ធ្វើអោយជួបបញ្ហាកង្វះដីក្នុងការសាងសង់សំណង់នៅក្នុងទីក្រុង ដូច្នេះហើយទើបតម្លៃរបស់វីឡាភាគច្រើនគឺស្ថិតនៅក្នុងកម្រិតខ្ពស់មួយ ជាហេតុនាំឲ្យប្រជាជនមួយភាគធំ មិនមានលទ្ធភាពក្នុងការទិញនោះឡើយ។
ហើយសម្រាប់លំនៅដ្ឋានដែលមានភាពពេញនិយមនោះគឺជាអាផាតមិន ដែលក្នុងមួយអគារអាចរស់នៅបានច្រើនគ្រួសារ ចំណេញដីសាងសង់ និងតម្លៃសមរម្យ។ ដូច្នេះយើងអាចយល់បានហើយថា ហេតុអ្វីបានជាជនជាតិចិនមានទម្លាប់រស់នៅក្នុងអាផាតមិន ម្យ៉ាងវិញទៀត គេក៏មិនចាំបាច់បារម្ភទៅលើការថែទាំអចលនទ្រព្យទៀតផង។
តែយ៉ាងណាក៏ដោយ ក៏នៅមានក្រុមមនុស្សមួយផ្នែកតូចដែលចូលចិត្តរស់នៅក្នុងវីឡា ឬ ផ្ទះនៅក្នុងបុរីដែលទុកសម្រាប់ជួល ដោយហេតុវាមានទំហំធំអាចរស់នៅបានច្រើនគ្នា គេអាចរស់នៅជាមួយមិត្តភក្តិឬគ្រួសារ អាចមានអាងហែលទឹកទឹកខ្លួនទៀតផង ឬក៏គេអាចជួបជុំគ្នាក៏បាននៅក្នុងវីឡាដោយសេរី មិនមានអ្នកណាមកហាមឃាត់នោះឡើយ ចំណែកឯសុវត្ថិភាពក៏ល្អផងដែរ។ ជាក់ស្ដែងនៅបុរីប៉េងហួតបឹងស្នោរ យើងឃើញមានជនជាតិចិនជាច្រើនកុះករបានរស់នៅទីនោះ។
៣.ជនជាតិលោកខាងលិច
បើយើងងាកទៅមើលការរស់នៅរបស់ជនជាតិអឺរ៉ុបភាគច្រើនវិញគឺគេមានវប្បធម៌មួយ ដោយចាប់ពីអាយុ ១៨ ឆ្នាំឡើងទៅគឺ គេមានទំនួលខុសត្រូវរស់នៅបែកពីគ្រួសារ ដែលនេះស្ថិតជាទម្លាប់មួយរបស់ពួកគេក្នុងការរស់នៅម្នាក់ឯងទៅហើយ។ ម្យ៉ាងវិញទៀតជនជាតិអឺរ៉ុបភាគច្រើន ចូលចិត្តការរស់នៅដែលមានភាពស្ងប់ស្ងាត់ និងចូលចិត្តទទួលអារម្មណ៍ស្រស់ស្រាយពីទេសភាពដែលនៅជុំវិញខ្លួន។
បែបនេះហើយទៅយើងសង្កេតឃើញថាជនជាតិអឺរ៉ុបតែងតែរស់នៅក្នុងអាផាតមិនឬក៏ខុនដូដែលមានសភាពស្ងប់ស្ងាត់ មានធម្មជាតិពណ៌បៃតងនៅជាមួយ និងមានវេរ៉ង់ដាដែលអាចអង្គុយលេងបាន។ ជាទូទៅ នៅក្នុងរាជធានីភ្នំពេញ តំបន់ដែលពេញនិយមសម្រាប់ជនជាតិបរទេស មានដូចជា តំបន់បឹងកេងកង, ទួលទំពូងជាដើម ព្រោះទីតាំងទាំងនេះស្ថិតនៅជិត ទីប្រជុំជន ផ្សារ ផ្សារទំនើប និងកន្លែងផ្សេងៗទៀតជាច្រើន មានភាពងាយស្រួលក្នុងជីវភាពប្រចាំថ្ងៃ។
ដូចដែលយើងបានឃើញរៀបរាប់ខាងលើនោះហើយ យើងក៏អាចនិយាយជារួមបានថា អាផាតមិននិងខុនដូមានភាពពេញនិយមសម្រាប់ជនបរទេសដូចជាចិននិងអឺរ៉ុប ក្នុងការមកសំណាក់នៅប្រទេសខ្មែរ ហើយសម្រាប់ជនជាតិដែលជាម្ចាស់ស្រុកវិញ ភាគច្រើនគឺចូលចិត្តលំនៅដ្ឋានដែលជាប់នឹងដី ផ្ដល់ភាពងាយស្រួលការរស់នៅប្រចាំថ្ងៃ។ បែបនេះហើយ ទើបនាពេលបច្ចុប្បន្ននេះ ពិតជាមានគម្រោងលំនៅដ្ឋានជាច្រើនប្រភេទបានអភិវឌ្ឍសំណង់លំនៅឋានជាច្រើនទម្រង់ ដើម្បីបំពេញបានគ្រប់តម្រូវការមិនថាសម្រាប់ប្រជាជនក្នុងស្រុកនិងជនបរទេស។
ហើយប្រសិនបើលោកអ្នកមានតម្រូវការផ្នែកអចលនទ្រព្យមិនថាជួលឬទិញនោះឡើយ លោកអ្នកអាចជ្រើសរើសក្រុមហ៊ុនខមភើស រៀលអ៊ីស្ទេត ដែលជាក្រុមហ៊ុនដែលមានវិជ្ជាជីវ:ក្នុងវិស័យអចលនទ្រព្យ ក្នុងការជួយលោកអ្នកស្វែងរកនូវអចលនទ្រព្យក្នុងក្ដីស្រមៃ។
0
()
Application has been successfully submitted
we will contact you soon, please pay attention
ទូរស័ព្ទ:+855 66300666
+855 (0) 23222206 (CN/EN/KH)
+86 023 67480241 (CN)
+855 (0) 66400666 (CN/EN/KH)