ក្នុងរយៈពេលជាង២២ឆ្នាំនេះ កម្ពុជាទទួលការវិនិយោគក្នុងវិស័យសំណង់ជាង ៧៤ពាន់លានដុល្លារ

ជាផ្លែផ្កានៃនគរូបនីយកម្ម និងការអភិវឌ្ឍអចលនទ្រព្យ និងសំណង់បានក្លាយជាសសរស្តម្ភស្នូលដែលជំរុញកំណើនសេដ្ឋកិច្ចកម្ពុជា។ ជាក់ស្តែង ទុនវិនិយោគនៅក្នុងវិស័យសំណង់រយៈពេលជាង ២២ឆ្នាំកន្លងមក មានប្រមាណជាង ៧៤ពាន់លានដុល្លារ។

នេះបើតាមការលើកឡើងរបស់ ឯកឧត្តមឧបនាយករដ្ឋមន្ដ្រី សាយ សំអាល់ រដ្ឋមន្ដ្រីក្រសួងរៀបចំដែនដី នគរូបនីយកម្ម និងសំណង់ ក្នុងវេទិការដ្ឋ-ឯកជនលើកទី៤ ស្តីពី «ការអភិវឌ្ឍនគរូបនីយកម្មកម្ពុជា-ជប៉ុន» ក្នុងគោលបំណងបន្តជំរុញបង្កើតឱកាសធុរកិច្ច និងវិនិយោគពីប្រទេសជប៉ុន មកប្រទេសកម្ពុជា ស្តីពីនគរូបនីយកម្ម ដោយផ្តោតលើការអភិវឌ្ឍទីក្រុងឆ្លាតវៃ។

យ៉ាងណាមិញ ឯកឧត្តមឧបនាយករដ្ឋមន្ដ្រីបានមានប្រសាសន៍ថា វិស័យសំណង់កម្ពុជាបច្ចុប្បន្នកំពុងរងផលប៉ះពាល់ពីវិបត្តិសកលលោក។ ក្នុងរយៈពេល ១០ ខែដំបូងនៃឆ្នាំ ២០២៣ ការវិនិយោគក្នុងវិស័យសំណង់មានចំនួនប្រមាណ ១៤៩ លានដុល្លារអាមេរិក បានថយចុះ ៣៥,១៦% បើធៀបនឹងឆ្នាំមុនដែលមានចំនួនប្រមាណ ២៣១ លានដុល្លារ។

លោកឯកឧត្តមបន្ថែមទៀតថា តាមរយៈវេទិការដ្ឋ-ឯកជនលើកទី ៤នេះ ភាគីទាំងពីរបានជំរុញការអភិវឌ្ឍទីក្រុងដោយផ្តោតលើការអភិវឌ្ឍឆ្លាតវៃ ដោយទីក្រុងចំនួន ៣ បានចូលក្នុងបណ្តាញទីក្រុងឆ្លាតវៃអាស៊ាន គឺរាជធានីភ្នំពេញ ក្រុងបាត់ដំបង និងក្រុងសៀមរាប។ ហើយរាជរដ្ឋាភិបាលកម្ពុជា តែងចាត់ទុកវិស័យឯកជនជាក្បាលម៉ាស៊ីននៃកំណើនសេដ្ឋកិច្ច និងមានតួនាទីគន្លឹះ ក្នុងការជំរុញអភិវឌ្ឍន៍សេដ្ឋកិច្ច-សង្គម អភិវឌ្ឍន៍ទីផ្សារការងារ លើកស្ទួយសហគ្រាសធុនតូច-មធ្យម លើកកម្ពស់ប្រសិទ្ធភាពធុរកិច្ច ពង្រីកភាពជាដៃគូរវាងវិស័យរដ្ឋ និងវិស័យឯកជន និងពង្រឹងការប្រកួតប្រជែងក្នុងបរិការណ៍នៃបដិវត្តន៍ឧស្សាហកម្មទី៤។

ជាមួយគ្នានេះ ឯកឧត្តម សាយ សំអាល់ ក៏បានថ្លែងអំណរគុណចំពោះការគាំទ្ររបស់រាជរដ្ឋាភិបាល និងប្រជាជនជប៉ុន ដល់ប្រជាជនកម្ពុជា តាមរយៈសមិទ្ធផលជាច្រើន មានដូចជា ហេដ្ឋារចនាសម្ព័ន្ធ ផ្លូវជាតិ និងស្ពានសំខាន់ៗ ប្រព័ន្ធធារាសាស្រ្ត ប្រព័ន្ធគ្រប់គ្រងទឹកជំនន់ ប្រព័ន្ធផ្គត់ផ្គង់ទឹកស្អាត ការអភិវឌ្ឍវារីអគ្គិសនី ការជួសជុលប្រាសាទបុរាណ ការការពារបរិស្ថាន ការកំចាត់មីន និងយុទ្ធភណ្ឌមិនទាន់ផ្ទុះ ក៏ដូចជា ការបណ្តុះបណ្តាលដល់មន្រ្តីរាជការ និងនិស្សិតកម្ពុជា។