ផ្លូវប្របមាត់សមុទ្រខេត្ត​កែប គ្រោងបញ្ចប់​នៅ​ដើម​ឆ្នាំ​២០២៤ខាងមុខនេះ

ផ្លូវប្របមាត់សមុទ្រមានប្រវែងជាង ១១គីឡូម៉ែត្រ តភ្ជាប់ពីកំពង់ផែទេសចរណ៍កោះទន្សាយ ខេត្តកែប មកកាន់ឆ្នេរអង្កោលកំពុងដំណើរការសាងសង់ បើគិតមកទល់ពេលនេះបានសម្រេចលទ្ធផលជិត ១០០% ហើយ ដែលគម្រោងនេះនឹងបញ្ចប់ការក្រាលកៅស៊ូទាំងពីរស្រទាប់ មុនបំណាច់ឆ្នាំ ២០២៣ ហើយគម្រោងទាំងមូលនឹងរួចរាល់ទាំងស្រុង នាដើមឆ្នាំ២០២៤ខាងមុខនេះ។ 

គម្រោងមួយនេះ អនុវត្តន៍ក្រោមមូលនិធិរបស់ធនាគារអភិវឌ្ឍន៍អាស៊ី (ADB) ដែលចំណាយថវិកាប្រមាណ ១០,៥លានដុល្លារអាមេរិក ហើយបានចាប់ផ្តើមការសាងសង់កាលពីខែមីនាឆ្នាំ២០២២។

លោក ឡឹម ប៊ុនលេង ជាវិស្វករនៃក្រុមហ៊ុនម៉ៅការសាងសង់ផ្លូវប្របមាត់សមុទ្រនេះបានឲ្យដឹងថា៖ សម្រាប់ការងារក្រាលកៅស៊ូ យើងនឹងបញ្ចប់ទាំងស្រុងមុនបំណាច់ឆ្នាំ២០២៣នេះ ក្នុងនោះនៅការងារក្រាលបេតុងតាមចិញ្ជើមផ្លូវ និងរៀបចំបង្គោលភ្លើងជាដើម ជារួមគម្រោងទាំងមូលនឹងត្រូវបញ្ចប់នាខែមករា ឆ្នាំ២០២៤។

លោក ប៊ុន យោង អភិបាលរង និងជាអ្នកនាំពាក្យរដ្ឋបាលខេត្តកែប បានឲ្យដឹងដែរថា តាមរយៈគម្រោងផ្លូវប្របមាត់សមុទ្រដែលមានប្រវែងជាង ១១គ.ម នេះ គឺជាសមិទ្ធផលថ្មីមួយទៀត របស់រដ្ឋបាលខេត្តកែប ជាពិសេសសម្រាប់វិស័យទេសចរណ៍ ក្រោមការដឹកនាំរបស់អភិបាលខេត្តកែប ដោយផ្លូវមួយខ្សែពិតណាស់ នឹងក្លាយជាគោលដៅស្រូបទាញអ្នកទេសចរ ឲ្យមកកម្សាន្តសប្បាយនាឱកាសថ្ងៃឆ្លងឆ្នាំសកល (២០២៣ ចូល ២០២៤) នៅទីតាំងកម្សាន្តថ្មីរបស់យើងគឺ ឆ្នេរអង្កោល។

គួរជម្រាបថា គម្រោងផ្លូវប្របមាត់នេះ គឺជាអនុគម្រោងមួយនៃគម្រោងហេដ្ឋារចនាសម្ព័ន្ធទេសចរណ៍សម្រាប់កំណើនប្រកបដោយបរិយាបន្ន នៃមហាអនុតំបន់មេគង្គជំហានទី២ របស់ធនាគារអភិវឌ្ឍន៍អាស៊ី ADB ក្នុងនោះមានអនុគម្រោងចំនួន២ទៀត រួមមានទីលានទុកដាក់សំរាមបានសម្ពោធ និងផ្ទេរឱ្យរដ្ឋបាលខេត្តគ្របគ្រង់រួចរាល់ និងគម្រោងកំពង់ផែលើកោះទន្សាយដែលកំពុងដំណើរការការដ្ឋាន។

គួររំលឹកផងដែរថា កាលពីខែសីហាឆ្នាំនេះ ក្រសួងទេសចរណ៍បានប្រកាសដាក់ឱ្យអនុវត្តជាផ្លូវការនូវ "ផែនការមេអភិវឌ្ឍន៍វិស័យទេសចរណ៍ខេត្តកែបឆ្នាំ ២០២៣-២០៣៥" ដើម្បីប្រែក្លាយខេត្ដនេះជាគោលដៅទេសចរណ៍សម្រាកកម្សាន្ដប្រណីតកម្រិតខ្ពស់ ប្រកបដោយគុណភាព ភាពទាក់ទាញ ធានាបាននូវឧត្តមភាពប្រកួតប្រជែងខ្ពស់នៅក្នុងតំបន់ និងពិភពលោក។