គម្រោង«ស្ពានព្រែកប្រា-ចាក់អង្រែ» ត្រៀមបើកការដ្ឋានសាងសង់នៅខែកុម្ភៈខាងមុខនេះ

គម្រោង«ស្ពានព្រែកប្រា-ចាក់អង្រែ» ដែលមានតម្លៃប្រមាណ៦០លានដុល្លារអាម៉េរិក ត្រៀមរៀបចំសម្ពោធបើកការដ្ឋានសាងសង់នៅខែកុម្ភៈ ខាងមុខនេះហើយ។ នេះបើតាមការបញ្ជាក់ពី លោក ផន រឹម អ្នកនាំពាក្យក្រសួងសាធារណការ និងដឹកជញ្ជូន។

លោកបានមានប្រសាសន៍ថា ប្រសិនបើផែនការគ្មានអ្វីប្រែប្រួលទេនោះ ពិធីបើកការដ្ឋាននឹងធ្វើឡើងនៅថ្ងៃទី ១៩ ខែកុម្ភៈខាងមុខនេះ ហើយនឹងត្រៀមខួងសរសរគ្រឹះទី១ ត្រើយខាងកើត នៅចុងខែមករា ឆ្នាំ២០២៤។ 

លោក ផន រឹម បានលើកឡើងថា គម្រោង«ស្ពានព្រែកប្រា-ចាក់អង្រែ» អាចជួយកាត់បន្ថយការកកស្ទះចរាចរណ៍លើស្ពានព្រះមុនីវង្សឆ្លងកាត់ទន្លេបាសាក់ ភ្ជាប់ផ្លូវជាតិលេខ១ នៅខណ្ឌច្បារអំពៅ និងជួយពង្រឹងដល់ទំនាក់ទំនងសេដ្ឋកិច្ចសង្គម រវាងរាជធានីភ្នំពេញប៉ែកខាងត្បូង ព្រលានយន្តហោះអន្តរជាតិតេជោក្រុងតាខ្មៅ ជាពិសេសធ្វើឱ្យប្រសើរឡើងដល់ប្រសិទ្ធភាពនៃការដឹកជញ្ជូន និងភស្តុភារកម្មនៅក្នុងតំបន់រាជធានីភ្នំពេញ ក៏ដូចជាកាត់បន្ថយការកកស្ទះចរាចរណ៍នៅតាមដងទន្លេបាសាក់ និងជួយពន្លឿនការអភិវឌ្ឍតំបន់។

គួរជម្រោបថា គម្រោងសាងសង់ស្ពានឆ្លងទន្លេតភ្ជាប់ពី តំបន់ព្រែកប្រាទៅចាក់អង្រែ ខាងលើនេះ ប្រើឥណទានសម្បទានពីប្រទេសចិន ដែលមានតម្លៃប្រមាណ ៦០លានដុល្លារអាម៉េរិក ហើយត្រូវបានប៉ានស្មានថានឹងប្រើរយះពេល ៤២ខែ ឬ៣ឆ្នាំកន្លះ។