ចំណតស្ថានីយថ្មី ព្រលានយន្តហោះខេត្តព្រះសីហនុ នឹងបញ្ចប់ការសាងសង់នៅឆ្នាំ ២០២៦

ចំណតស្ថានីយថ្មីនៅព្រលានយន្តហោះខេត្តព្រះសីហនុ គ្រោងនឹងបញ្ចប់ការសាងសង់នៅឆ្នាំ ២០២៦។ នេះបើតាមការបញ្ជាក់ពីនាយកក្រុមហ៊ុន Vinci Airports នៅចំពោះមុខលោក ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ ក្រុមប្រឹក្សាអភិវឌ្ឍន៍កម្ពុជា ខណៈចូលជួបពិភាក្សាការងារអំពីការវិនិយោគរបស់ក្រុមហ៊ុននៅកម្ពុជា។

លោក Emmanuel MENANTEAU ប្រធានប្រចាំតំបន់នៃក្រុមហ៊ុន VINCI Airports បានគូសបញ្ជាក់ថា ជំនួបឱកាសនេះ ក្នុងគោលបំណងដើម្បីគោរពស្នើសុំអនុសាសន៍ណែនាំពីលោកឧបនាយករដ្ឋមន្ត្រីលើកិច្ចការងារវិនិយោគរបស់ក្រុមហ៊ុននៅក្នុងប្រទេសកម្ពុជា ទាក់ទងនឹងគម្រោងវិនិយោគអាកាសយានដ្ឋាន។

ប្រធានប្រចាំតំបន់នៃក្រុមហ៊ុន VINCI Airports ក៏បានលើកឡើងអំពីគម្រោងពង្រីកអាកាសយានដ្ឋានអន្តរជាតិខេត្តព្រះសីហនុ ដោយបង្កើតចំណតស្ថានីយថ្មី (New Terminal) ដែលតាមផែនការគ្រោងនឹងបញ្ចប់ក្នុងឆ្នាំ២០២៦ ខាងមុខនេះ។

ក្រុមហ៊ុន VINCI Airports មានបទពិសោធន៍ប្រមាណ ២៥ ឆ្នាំនៅកម្ពុជា លើការវិនិយោគក្នុងគម្រោងអាកាសយានដ្ឋាន ដោយក្នុងនោះអាកាសយានដ្ឋានចំនួន ៣ ដែលក្រុមហ៊ុនធ្លាប់បាននិងកំពុងមានប្រតិបត្តិការនៅប្រទេសកម្ពុជារួមមាន អាកាសយានដ្ឋានអន្តរជាតិភ្នំពេញ អាកាសយានដ្ឋានអន្តរជាតិសៀមរាប និងអាកាសយានដ្ឋានអន្តរជាតិខេត្តព្រះសីហនុ។

ក្រុមហ៊ុននេះគឺជាបុត្រសម្ព័ន្ធនៃ VINCI Group ដែលជាក្រុមហ៊ុនឈានមុខលើការវិនិយោគគម្រោងសម្បទាននានា គ្របដណ្ដប់លើសេវាកម្មដូចជា៖ VINCI Airports, VINCI Highways, VINCI Railways, VINCI Construction, VINCI Transport Infrastructure និង VINCI Energy។