ក្រុមហ៊ុន អ៉ីអន ម៉ល ពិចារណាសាងសង់ផ្សារទំនើបអ៉ីអនទី៤នៅរាជធានីភ្នំពេញ

ក្រុមហ៊ុន អ៉ីអន ម៉ល (ខេមបូឌា) ខូអិលធីឌី កំពុងពិចារណាលើលទ្ធភាពក្នុងការសាងសង់ផ្សារអ៉ីអនម៉លទី៤ ក្នុងខណ្ឌកំបូល រាជធានីភ្នំពេញ។

នេះបើយោងតាមជំនួបរវាងឯកឧត្តម ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ នៃក្រុមប្រឹក្សាអភិវឌ្ឍន៍កម្ពុជា (CDC) និងលោក Tsuboya Masayuki នាយកគ្រប់គ្រងក្រុមហ៊ុន Aeon Mall (Cambodia) Co., Ltd.

កិច្ចប្រជុំនេះធ្វើឡើង ដោយខាងតំណាងក្រុមហ៊ុនអ៉ីអន មានគោលបំណងសុំការណែនាំពីឧបនាយករដ្ឋមន្ត្រី ទាក់ទងនឹងការងារវិនិយោគលើផ្សារទំនើបអ៉ីអនម៉ល នៅប្រទេសកម្ពុជា។ មន្ត្រីត្រួតពិនិត្យគម្រោងរបស់ក្រុមប្រឹក្សាអភិវឌ្ឍន៍កម្ពុជា បានឲ្យដឹងថា ពេលនេះក្រុមហ៊ុនអ៉ីអនម៉ល កំពុងសិក្សាជាមួយCDC អំពីលទ្ធភាពលើការវិនិយោគលើផ្សារទំនើបអ៉ីអនម៉លទីបួន (Aeon Mall 4) ដែលមានទីតាំងនៅក្នុងខណ្ឌកំបូល រាជធានីភ្នំពេញ។

ក្រុមហ៊ុន អ៉ីអន ម៉ល (ខេមបូឌា) ខូអិលធីឌី បានបោះទុនវិនិយោគជិត ៧០៦ លានដុល្លាររួចមកហើយ ក្នុងការសាងសង់ផ្សារទំនើបចំនួន ៣ នៅកម្ពុជា។

ផ្សារទំនើប អ៉ីអនម៉ល ភ្នំពេញដំបូងគេបង្អស់ដែលស្ថិតនៅក្នុងខណ្ឌចំការមន រាជធានីភ្នំពេញ គឺជាបទពិសោធន៍ដំបូងបង្អស់របស់ប្រទេសជាមួយនឹងម៉ាកយីហោផ្សារទំនើបស្តង់ដារអន្តរជាតិ នៅពេលដែលបានបើកដំណើរការនៅក្នុងខែមិថុនា ឆ្នាំ ២០១៤។ ការសាងសង់គម្រោងនេះមានតម្លៃជិតដល់ ២០៥ លានដុល្លារ។

នៅក្នុងគម្រោងពង្រីកនាពេលថ្មីៗនេះដែលបានបញ្ចប់នៅឆ្នាំ ២០២៣ ផ្សារទំនើប អ៉ីអន ម៉លទី១ ក៏បានបន្ថែមហាងចំនួន ៣០ បន្ថែមទៀតនៅជាន់ផ្ទាល់ដីរបស់ខ្លួន ដើម្បីបំពេញតម្រូវការរបស់អាជីវកម្មលក់រាយនាពេលបច្ចុប្បន្ន រួមជាមួយនឹងកន្លែងចតយានយន្តបន្ថែម។

ក្រុមហ៊ុន អ៉ីអន ម៉ល ក៏បានបង្កើតផ្សារទំនើបទី២របស់ខ្លួន ដែលបានធ្វើឡើងនៅក្នុងខែឧសភា ឆ្នាំ ២០១៨ ជាមួយនឹងការបើកសម្ពោធផ្សារទំនើបអ៉ីអនម៉ល សែនសុខ ដែលមានតម្លៃ ១២០ លានដុល្លារ ដែលមានទីតាំងនៅក្នុងខណ្ឌសែនសុខ។

ផ្សារទំនើប អ៉ីអនម៉លទី៣ និងធំជាងគេបានបើកនៅខណ្ឌមានជ័យ ភាគខាងត្បូងរាជធានីភ្នំពេញកាលពីខែមេសាឆ្នាំមុន ដែលមានទីតាំងនៅមហាវិថី សម្ដេចហ៊ុន សែន។ លើសពីតម្លៃផ្សារទំនើបទាំងពីរដំបូង ផ្សារទំនើប អ៉ីអនម៉លមានជ័យ មានតម្លៃវិនិយោគសរុបជិត ២៩០លានដុល្លារ។

ការបង្កើតផ្សារទំនើបទីបីក៏បានបង្ហាញនូវទំនុកចិត្តរបស់អ្នកអភិវឌ្ឍផងដែរ ដែលលាតសន្ធឹងលើផ្ទៃដី ១,៧៤ ហិកតា ចម្ងាយប្រហែល ៨ គីឡូម៉ែត្រពីទីប្រជុំជនរាជធានីភ្នំពេញ ក្លាយជាផ្សារទំនើបដ៏ធំ និងចម្រុះបំផុតរបស់ទីក្រុងរហូតមកដល់បច្ចុប្បន្ន។

សូមជម្រាបថា អ៉ីអនម៉ល (ខេមបូឌា) ខូអិលធីឌី គឺជាក្រុមហ៊ុនបុត្រសម្ព័ន្ធរបស់ក្រុមហ៊ុន អ៉ីអនម៉ល ខូអិលធីឌី ដែលបង្កើតឡើងដំបូងក្នុងឆ្នាំ ១៩១១ នៅទីក្រុងជីបា ប្រទេសជប៉ុន។ ខ្សែសង្វាក់អន្តរជាតិដ៏ល្បីល្បាញមានផ្សារទំនើបសរុបចំនួន ២០៣ នៅក្នុងប្រទេសចំនួន ១៤ ជុំវិញពិភពលោក។ នៅឆ្នាំ ២០២១ ក្រុមហ៊ុនអ៉ីអន ត្រូវបានគេរាយការណ៍ថាជាក្រុមហ៊ុនលក់រាយធំជាងគេទី ១៧ នៅលើពិភពលោកទាក់ទងនឹងប្រាក់ចំណូល។