រដ្ឋបាលខេត្ដកំពតគ្រោងនឹងកែលម្អក្រុងកំពត ឱ្យ​ស័ក្ដិ​សម​ជា​ទីក្រុង​ទេសចរណ៍​ស្អាត​អាស៊ាន​

ខេត្ដកំពតនឹងកាន់តែមានភាពស្រស់ស្អាត ខណៈអភិបាលខេត្ត ឯកឧត្ដម ម៉ៅ ធនិន អះអាងថានឹងកែលម្អធ្វើឱ្យក្រុងកំពត ផ្លាស់ប្តូរមុខមាត់ថ្មីស័ក្តិសមជាទីក្រុងទេសចរណ៍ស្អាតអាស៊ាន។ ការអះអាងនេះត្រូវបានធ្វើឡើងនៅក្នុងដំណើរចុះពិនិត្យ និងសិក្សាគម្រោងកែលម្អសោភណឌភាពសួនច្បារដងព្រែក ត្រង់ចំណុចទីលានកីឡាលើទឹកចាស់ ក្បែររូបសំណាកត្រីផ្សោត កាលពីថ្ងៃទី១០ ខែកុម្ភៈ ឆ្នាំ២០២៤។

ឯកឧត្តម ម៉ៅ ធនិន បានមានប្រសាសន៍ថា  រដ្ឋបាលខេត្តបាននិងកំពុងអនុវត្តគម្រោងកែលម្អសោភណ្ឌភាពក្រុងជាច្រើន ក្នុងនោះមានដូចជា គម្រោងបង្កើតឆ្នេរខ្សាច់កម្សាន្តពីរកន្លែងបន្ថែមទៀត ដែលទី១ គឺឆ្នេរខ្សាច់ចន្លោះស្ពានចាស់ និងស្ពាន់ថ្មី និងទី២ ឆ្នេរខ្សាច់ចន្លោះស្ពានថ្មី និងស្ពានរថភ្លើង ដែលការរៀបចំគឺក្រាលការ៉ូម៉ាបតាមសួនច្បារដងព្រែកកំពង់បាយ ការបង្កើតបំពាក់រូបសេះសមុទ្របាញ់ទឹកនៅវេរ៉ងដាខាងមុខសាលាខេត្តចាស់ ការកែសម្រួលទីលានកីឡាលើទឹកមកជាសួនច្បារ ការរៀបចំសណ្តាប់ធ្នាប់សំណង់នៅតាមមាត់បណ្តោយព្រែកត្រើយខាងលិច ដើម្បីបង្កើតផ្លូវ និងសួនច្បារ គម្រោងរៀបចំសួនច្បារសាធារណៈនៅទល់មុខវត្តត្រើយកោះជាដើម។

ឯកឧត្តមបានបន្តថា រដ្ឋបាលខេត្តនឹងដាក់ឱ្យអនុវត្តគម្រោងកែលម្អសោភណ្ឌភាពបន្ថែមទៀត គឺពង្រីកសួនច្បារត្រង់ចំណុចកីឡាលើទឹក (បរិវេណហាត់ប្រាណ) ឱ្យកាន់តែធំទូលាយ ដើម្បីឱ្យព្រែកកំពង់បាយមានរាងរៅស្អាត ហើយឆ្នេរខាងលិចព្រែកទល់មុខគ្នា ក៏ត្រូវរៀបចំឈូសឆាយដីព្រៃ កុំឱ្យបាំងទេសភាពព្រែក និងស្ពានត្រើយកោះ ពេលធ្វើរួចត្រូវបំពាក់ភ្លើង និងមានចងទង់ជាតិ តង់ជ្វាលាផងដែរ។

ឯកឧត្តមអភិបាលខេត្តកំពតបានបញ្ជាក់ថា ឥឡូវសួនមាត់ព្រែកក្នុងក្រុងកំពតស្អាត ប៉ុន្តែនៅពេលដែលគម្រោងកែលម្អដែលបានរៀបរាប់ខាងលើធ្វើចប់ ក្រុងកំពតនឹងផ្លាស់ប្តូរមុខមាត់ថ្មី ស្អាតហើយទាក់ទាញបំផុត គឺពិតជាស័ក្តិសមជាក្រុងទទួលបានពានរង្វាន់ទីក្រុងទេសចរណ៍ស្អាតអាស៊ាន ដែលរដ្ឋបាលខេត្តនឹងធ្វើពិធីដង្ហែនៅថ្ងៃទី១៥ ខែកុម្ភៈ ឆ្នាំ២០២៤ ខាងមុខនេះ។

ក្រៅពីនោះឯកឧត្តម ក៏បានលើកឡើងអំពីគម្រោងបង្កើតឆ្នេរខ្សាច់កម្សាន្តមាត់សមុទ្រ និងគម្រោងស្ថាបនាស្ពានឆ្លងព្រែកកំពង់បាយមួយបន្ថែមទៀតផងដែរ ដើម្បីបញ្ចៀសការកក់ស្ទះចរាចរណ៍។