ខែដំបូងនៃ២០២៤ ទំហំ​ពាណិជ្ជកម្ម​អន្តរជាតិ​របស់​កម្ពុជា​មានទឹកប្រាក់ជាង៤ពាន់លានដុល្លារ កើនឡើងជិត១៧%

ក្នុងខែមករា ដើមឆ្នាំ ២០២៤នេះ ការធ្វើពាណិជ្ជកម្មរបស់កម្ពុជាជាមួយបណ្តាដៃគូសំខាន់ មានទំហំទឹកប្រាក់ប្រមាណជាង ៤,០៥៧ ពាន់លានដុល្លារ កើនឡើង ១៦.៩% បើធៀបនឹងរយៈពេលដូចគ្នាកាលពីឆ្នាំមុន។ នេះយោងតាមរបាយការណ៍របស់អគ្គនាយកដ្ឋានគយ និងរដ្ឋាករកម្ពុជា។

ទិន្នន័យដដែលនេះបានបញ្ជាក់ថា មួយខែដំបូងនៃឆ្នាំ២០២៤ ការនាំចេញរបស់កម្ពុជាមានតម្លៃ ១,៩៦៧ ពាន់លានដុល្លារ កើនឡើង២៧% ស្របពេលការនាំចូលមកវិញមានតម្លៃប្រមាណ ២,០៩០ ពាន់លានដុល្លារ កើនឡើង ៨.៧%។ 

ដៃគូពាណិជ្ជកម្មសំខាន់ៗរបស់កម្ពុជា គឺចិន ដែលសម្រេចបានទំហំពាណិជ្ជកម្មជាង ១,១៥៤ ពាន់លានដុល្លារ កើនឡើង ១៨.៧% ដោយកម្ពុជានាំចេញទំនិញទៅចិន ក្នុងតម្លៃ ១២១លានដុល្លារ កើនឡើងដល់ទៅ ៥០.១% ខណៈចិននាំចូលវិញក្នុងតម្លៃជាង ១,០៣២ ពាន់លានដុល្លារ កើនឡើង១៥.៨%។

ជាមួយគ្នានេះ ទំហំពាណិជ្ជកម្មរវាងកម្ពុជា និងវៀតណាមមានទំហំជាង ៦៧៧ លានដុល្លារ កើនឡើង៤១.៥% ដោយកម្ពុជានាំចេញទៅវៀតណាម ក្នុងតម្លៃ ៣៧៣ លានដុល្លារ កើនឡើង ១១៦.៦% ខណៈវៀតណាមនាំចូលវិញក្នុងតម្លៃជាង ៣០៤ លានដុល្លារ ថយចុះ០.៦%។

ចំណែក ការនាំចេញនាំចូលរវាងកម្ពុជា និងសហរដ្ឋអាមេរិកវិញ មានទំហំជាង ៦៤៤ លានដុល្លារ កើនឡើង១០.៨% ដោយកម្ពុជានាំចេញទៅសហរដ្ឋអាមេរិក ក្នុងតម្លៃ ៦២៦លានដុល្លារ កើនឡើង ១១.៤% ខណៈសហរដ្ឋអាមេរិកនាំចូលវិញក្នុងតម្លៃជាង ១៧,២៥ លានដុល្លារ ថយចុះ៨%។

រួមជាមួយប្រទេសជាដៃគូរពាណិជ្ជកម្មសំខាន់ៗដទៃទៀត ដូចជាថៃ ជប៉ុន ឥណ្ឌូនេស៊ី កាណាដា សិង្ហបុរី អេស្ប៉ាញ ជាដើម។

គួរជម្រាបថា ក្នុងឆ្នាំ២០២៣កន្លងទៅនេះ ប្រទេសកម្ពុជា សម្រេចបាននូវទំហំពាណិជ្ជកម្មប្រមាណ ៤៦,៨ ពាន់លានដុល្លារអាមេរិក ក្នុងនោះ ការនាំចេញមានទំហំ ២២,៦ ពាន់លានដុល្លារ និងការនាំចូលមានទំហំជាង ២៤,១ ពាន់លានដុល្លារអាមេរិក។