​រាជរដ្ឋាភិបាលកំពុងស្វែងរកដៃគូវិនិយោគលើគម្រោងចំនួន ១៧៤ ដែលត្រូវការទុនវិនិយោគ ៣៦,៦ពាន់លានដុល្លារ

រាជរដ្ឋាភិបាល ជំរុញការផ្សព្វផ្សាយ «ផែនការមេគ្រប់ជ្រុងជ្រោយ ស្តីពីប្រព័ន្ធដឹកជញ្ជូនអន្តរមធ្យោបាយ និងភស្តុភារកម្មកម្ពុជា ២០២៣-២០៣៣» ដែលមានតម្រូវការវិនិយោគ ១៧៤គម្រោង និងត្រូវការទុនវិនិយោគ ៣៦,៦ពាន់លានដុល្លារអាម៉េរិក។

ការផ្សព្វផ្សាយនេះ បានធ្វើឡើងនៅក្នុងកិច្ចប្រជុំ និងពិភាក្សាលើប្រព័ន្ធភស្តុភារកម្មនៅកម្ពុជា ដែលមានការចូលរួមពីអន្តរក្រសួង-ស្ថាប័នពាក់ព័ន្ធ និងវិស័យឯកជន នៅព្រឹកថ្ងៃទី ២០ខែកុម្ភៈ ឆ្នាំ ២០២៤។ កិច្ចប្រជុំនេះ ដឹកនាំដោយលោកឧបនាយករដ្ឋមន្ត្រី ស៊ុន ចាន់ថុល អនុ ប្រធាន ទី១ ក្រុមប្រឹក្សាអភិវឌ្ឍន៍កម្ពុជា និងជាប្រធានក្រុមប្រឹក្សាជាតិភស្តុភារកម្មកម្ពុជា។ 

ថ្លែងក្នុងកិច្ចប្រជុំ លោកឧបនាយករដ្ឋមន្ត្រី បានស្នើសុំទៅគ្រប់ភាគីពាក់ព័ន្ធទាំងអស់ទាំងផ្នែករដ្ឋ និងឯកជន ចូលរួមផ្សព្វផ្សាយឱ្យបានទូលំទូលាយ អំពីផែនការមេគ្រប់ជ្រុងជ្រោយស្តីពីប្រព័ន្ធដឹកជញ្ជូនអន្តរមធ្យោបាយ និងភស្តុភារកម្មកម្ពុជា ២០២៣-២០៣៣ ដែលជាផែនការមេថ្នាក់ជាតិថ្មីមួយ ដើម្បីជំរុញឱ្យកម្ពុជាអាចទាក់ទាញការវិនិយោគចូលមកបានកាន់តែច្រើនបន្ថែមទៀត។

លោកឧបនាយករដ្ឋមន្ត្រី បានគូសបញ្ជាក់ថា កម្ពុជាមានផែនការមេកំណត់បាននូវគម្រោងអាទិភាពចំនួន ១៧៤គម្រោង ក្នុងនោះគម្រោងផ្លូវថ្នល់មាន ៩៤គម្រោង ផ្លូវ ដែកមាន ០៨គម្រោង ដឹកជញ្ជូនតាមផ្លូវទន្លេមាន ២៣គម្រោង ដឹកជញ្ជូនតាមផ្លូវសមុទ្រមាន ២០គម្រោង ផ្លូវអាកាសមាន ១០គម្រោង ប្រព័ន្ធឡូជីស្ទីកមាន ១៥គម្រោង និងគម្រោងបន្ថែមផ្សេងៗមាន ០៤គម្រោង។ 

លោកឧបនាយករដ្ឋមន្ត្រី បានលើកទៀតឡើងថា តាមការប៉ាន់ស្មានតម្រូវការហិរញ្ញប្បទានមានទំហំសរុបប្រមាណ ៣៦,៦ពាន់លានដុល្លារអាម៉េរិក ដែលក្នុងនោះ តម្រូវការក្នុងរយៈពេលខ្លីនិងមធ្យម ពីឆ្នាំ២០២៣ ដល់ ២០២៧ មានប្រមាណ ១៩,៩២ពាន់លានដុល្លារអាម៉េរិក

សូមជម្រាបថា ផែនការមេគ្រប់ជ្រុងជ្រោយស្ដីពីប្រព័ន្ធដឹកជញ្ជូនអន្តរមធ្យោបាយ និងភស្ដុភារកម្មកម្ពុជា ២០២៣-២០៣៣ ត្រូវបានរាជរដ្ឋាភិបាលកម្ពុជា អនុម័តដាក់ឱ្យប្រើប្រាស់ជាផ្លូវការនៅថ្ងៃទី០២ ខែសីហា ឆ្នាំ២០២៣ ក្នុងនោះមានផែនការមេចំនួន ០៧ សំយោគបញ្ចូលគ្នារួមមាន៖ ផ្លូវថ្នល់ ផ្លូវដែក ផ្លូវទឹក កំពង់ផែ ភស្តុភារកម្ម ផ្លូវអាកាស និងដឹកជញ្ជូនអន្តរមធ្យោបាយ រួមគ្នាមានចំនួន ១៧៤គម្រោង ទាំងផ្នែកទន់ និងផ្នែករឹង។

គម្រោងទាំង ១៧៤ ដែលបានរៀបរាប់ខាងលើ ក៏មានរួមបញ្ចូលទាំងគម្រោង «ព្រែកជីកហ្វូណនតេជោ» ក្នុងទំហំទឹកប្រាក់ ១.៧ ពាន់លានដុល្លារ ដែលគ្រោងរៀបចំពិធីបើកការដ្ឋានសាងសង់ ក្នុងអំឡុងត្រីមាសទី៤ ឆ្នាំ២០២៤ ខាងមុខនេះ។