ឧបនាយករដ្ឋមន្ត្រី៖ គម្រោងផ្លូវជាតិ៥០C ពីកំពង់ឆ្នាំងទៅកំពង់ធំ ជាគម្រោងអាទិភាពសម្រាប់ឆ្នាំ២០២៤

ក្រសួងសាធារណការ និងដឹកជញ្ជូន បានដាក់ដាក់គម្រោងផ្លូវជាតិលេខ៥០សេ ពីខេត្តកំពង់ឆ្នាំងទៅខេត្តកំពង់ធំ ទៅក្នុងគម្រោងអាទិភាពដែលត្រូវសាងសង់មុនគេក្នុងឆ្នាំ២០២៤នេះ។

ថ្លែងក្នុងពិធីបិទសន្និបាតបូកសរុបលទ្ធផលការងារឆ្នាំ២០២៣ និងលើកទិសដៅការងារឆ្នាំ២០២៤ របស់ក្រសួងសាធារណការ និងដឹកជញ្ជូន កាលពីថ្ងៃទី២៩ ខែកុម្ភៈ ឆ្នាំ២០២៤ នាទីស្តីការក្រសួង ឯកឧត្តម ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ ក្រុមប្រឹក្សាអភិវឌ្ឍន៍កម្ពុជា បានណែនាំដល់ក្រសួងសាធារណការ និងដឹកជញ្ជូន ត្រូវពិនិត្យលើគម្រោងផ្លូវ និងស្ពានពីខេត្តកំពង់ឆ្នាំងទៅខេត្តកំពង់ធំ ដែលជាគម្រោងអាទិភាពត្រូវចាប់ផ្តើមសាងសង់មុនគេក្នុងឆ្នាំនេះ។

ឯកឧត្តម ស៊ុន ចាន់ថុល បានមានប្រសាសន៍ថា៖ “សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានប្រកាសថា គម្រោងនេះជាគម្រោងអាទិភាព សម្រាប់ឆ្នាំ២០២៤ ដូច្នេះ សូមឯកឧត្តម ប៉េង ពោធិ៍នា តាមដានគម្រោងផ្លូវជាតិលេខ៥០សេនេះ ដើម្បីឈានទៅដល់ការបើកការដ្ឋានសាងសង់ឱ្យបានឆាប់ៗ”។

បើតាមប្រសាសន៍ឯកឧត្តម ស៊ុន ចាន់ថុល ក្រសួងសាធារណការបានធ្វើលិខិតទៅក្រសួងសេដ្ឋកិច្ចនិងហិរញ្ញវត្ថុរួចហើយ។

សូមបញ្ជាក់ថា គម្រោងផ្លូវនិងស្ពាន ពីខេត្តកំពង់ឆ្នាំងទៅកំពង់ធំ គឺចេញពីស្រុកកំពង់លែង ខេត្តកំពង់ឆ្នាំង មកទល់នឹងផ្លូវជាតិលេខ ៦A ក្នុងសង្កាត់ស្រយូវ ក្រុងស្ទឹងសែន ខេត្តកំពង់ធំ។ គម្រោងនេះ រួមបញ្ចូលការកសាងផ្លូវ ៥០C ដែលមានប្រវែង ៥៨គីឡូម៉ែត្រ នឹងស្ពានមួយទៀត មានប្រវែងរហូតដល់ទៅ ៣.៣គីឡូម៉ែត្រ ដែលនឹងក្លាយជាស្ពានវែងជាងគេបំផុតនៅក្នុងប្រទេសកម្ពុជា។ 

គម្រោងគ្រោងចំណាយថវិកាសរុបចំនួន២៥០លានដុល្លារ ក្នុងនោះ  ផ្លូវនឹងចំណាយថវិកាប្រមាណ១៥០លានដុល្លារ សំរាប់ស្ពាននឹងចំណាយថវិកាប្រមាណ១០០លានដុល្លារ។