កម្ពុជាជាប់លេខ១ក្នុងនាមជាប្រទេសដែលមានសេដ្ឋកិច្ចលូតលាស់លឿនបំផុតនៅអាស៊ីអាគ្នេយ៍និងទីបីនៅអាស៊ីក្នុងឆ្នាំ ២០២៤

ប្រទេសកម្ពុជានាំមុខគេក្នុងការព្យាករណ៍កំណើននៅក្នុងតំបន់អាស៊ីអាគ្នេយ៍ក្នុងឆ្នាំ ២០២៤ នេះបើយោងតាមស្ថិតិរបស់ Seasia Stats ដោយផ្អែកលើការព្យាករណ៍កំណើនផលិតផលក្នុងស្រុកសរុប (GDP) នៅអាស៊ីអាគ្នេយ៍ឆ្នាំ ២០២៤ ពីទស្សនវិស័យខែតុលា ឆ្នាំ២០២៣ របស់មូលនិធិរូបិយវត្ថុអន្តរជាតិ (IMF) និងការធ្វើបច្ចុប្បន្នភាពក្នុងខែមករាឆ្នាំ២០២៤។

“កម្ពុជាបានឈរនៅចំណាត់ថ្នាក់កំពូលដោយមានកំណើនដល់ ៦,១ ភាគរយ ខណៈហ្វីលីពីនជាប់លេខ២ ជាមួយកំណើន ៥,៩ ភាគរយ និងវៀតណាមទទួលបានលេខ ៣ ជាមួយកំណើន ៥,៨ ភាគរយ។”

សម្រាប់តំបន់អាស៊ី ព្រះរាជាណាចក្រកម្ពុជាស្ថិតនៅលំដាប់ទី ៣ ក្នុងចំណោមប្រទេសដែលមានសេដ្ឋកិច្ចលូតលាស់លឿនបំផុតទាំង ២៥ ក្នុងឆ្នាំ ២០២៤ បន្ទាប់ពីម៉ាកាវ និងប្រទេសឥណ្ឌាដែលមានកំណើន ២៧,២ និង ៦,៣ ភាគរយរៀងគ្នា។

ចំណាត់ថ្នាក់នេះបានគូសបញ្ជាក់ពីការដឹកនាំដ៏មានប្រសិទ្ធភាពរបស់រាជរដ្ឋាភិបាលកម្ពុជាថ្មីដែលដឹកនាំដោយសម្តេចធិបតី ហ៊ុន ម៉ាណែត ក្នុងការជម្រុញឱ្យមានការស្តារសេដ្ឋកិច្ចឡើងវិញ ក្រោយវិបត្តិជំងឺកូវីដ-១៩ និងវិបត្តិសង្គ្រាមអ៊ុយក្រែន-រុស្ស៊ី។

សេដ្ឋកិច្ចដ៏រឹងមាំរបស់ប្រទេសកម្ពុជាត្រូវបានជម្រុញដោយវិស័យចម្រុះ រួមទាំងការនាំចេញសម្លៀកបំពាក់ ស្បែកជើង និងទំនិញសម្រាប់ធ្វើដំណើរ វិស័យទេសចរណ៍ ផលិតផលកសិកម្ម និងវិស័យអចលនទ្រព្យ និងសំណង់។