ព្រលានយន្ដហោះអន្ដរជាតិភ្នំពេញនឹងត្រូវផ្អាកដំណើរការនៅឆ្នាំ២០២៥

ក្រោយបើកដំណើរការអស់រយៈពេលជាច្រើនឆ្នាំ ព្រលានយន្ដហោះអន្ដរជាតិភ្នំពេញ នឹងត្រូវបិទនៅពេលដែលអាកាសយានដ្ឋានអន្ដរជាតិតេជោ ដែលមានទីតាំងស្ថិតនៅក្នុងខេត្ដកណ្ដាលបើកដំណើរការ។ នេះបើតាមការបញ្ជាក់ពីឯកឧត្ដមបណ្ឌិត ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរណ៍ស៊ីវិលនាពេលថ្មីៗនេះ។

សូមជម្រាបថា អាកាសយានដ្ឋានអន្តរជាតិភ្នំពេញបច្ចុប្បន្ន មានឈ្មោះនៅអតីតកាលថា អាកាសយានដ្ឋានអន្តរជាតិពោធិ៍ចិនតុង ត្រូវបានកសាងនិងបើកដំណើរការនៅឆ្នាំ១៩៥៥ លើផ្ទៃដីទំហំ ៣៦៦,៧២ ហិកតា ស្ថិតក្នុងភូមិសាស្ត្រ សង្កាត់កាកាប ខណ្ឌពោធិ៍សែនជ័យ នៅជាយរាជធានីភ្នំពេញ ចម្ងាយប្រមាណ ១០ គីឡូម៉ែត្រ។ នៅឆ្នាំ១៩៩៥ រាជរដ្ឋាភិបាលកម្ពុជា បានផ្ដល់ការវិនិយោគឱ្យក្រុមហ៊ុន SCA អភិវឌ្ឍសាងសង់ និងគ្រប់គ្រងប្រតិបត្តិការអាកាសយានដ្ឋានអន្ដរជាតិមួយនេះ។ អាកាសយានដ្ឋានអន្តរជាតិពោធិ៍ចិនតុង ត្រូវបានប្តូរឈ្មោះទៅជាអាកាសយានដ្ឋានអន្តរជាតិភ្នំពេញ នៅខែមករា ឆ្នាំ២០០៣។

ប៉ុន្តែដោយហេតុថា អាកាសយានដ្ឋានអន្តរជាតិភ្នំពេញបច្ចុប្បន្ន មានផ្ទៃដីលក្ខណៈតូចចង្អៀត ទីតាំងស្ថិតនៅស្ទើរចំកណ្ដាលរាជធានីភ្នំពេញ និងក្នុងតំបន់ប្រតិបត្តិការអាកាសយានដ្ឋានបច្ចុប្បន្ន ពោរពេញទៅដោយសំណង់អគារខ្ពស់ៗ និងមានឧបសគ្គដល់សុវត្ថិភាពកិច្ចប្រតិបត្តិការហោះឡើង-ចុះចតអាកាសយានគ្រប់ប្រភេទ និងហ៊ុំព័ទ្ធដោយសំណង់លំនៅឋានប្រជាពលរដ្ឋយ៉ាងច្រើន ទើបរាជរដ្ឋាភិបាលបានផ្ដល់ការវិនិយោគឱ្យក្រុមហ៊ុន ខេមបូឌា អ៊ែរផត អ៊ិនវេសមិន ខូអិលធីឌី (CAIC) អភិវឌ្ឍសាងសង់ និងគ្រប់គ្រងប្រតិបត្តិការ អាកាសយានដ្ឋានអន្តរជាតិថ្មីមួយលំដាប់ថ្នាក់ 4F មានឈ្មោះថា “អាកាសយានដ្ឋានអន្តរជាតិតេជោ”។

គួររំលឹកថា ព្រលានយន្ដហោះអន្តរជាតិតេជោ ត្រូវបានសាងសង់លើផ្ទៃដី ២៧០០ ហិកតាមានទីតាំងស្ថិតនៅស្រុកកណ្ដាលស្ទឹង ខេត្ដកណ្ដាល។ អាកាសយានដ្ឋានថ្មីនេះត្រូវបានបើកដំណើរការសាងសង់នៅថ្ងៃទី១៦ ខែមិថុនា ឆ្នាំ២០២០ ដែលមានទុនវិយោគសរុប ១ ៥០០ លានដុល្លារ និងត្រូវបែងចែកជា ៣ ដំណាក់កាល ដោយដំណាក់កាលទី១ បញ្ចប់នៅឆ្នាំ២០២៥ ដំណាក់កាលទី២ បញ្ចប់នៅឆ្នាំ២០៣០ និងដំណាក់កាលទី៣ បញ្ចប់នៅឆ្នាំ២០៣០។ បច្ចុប្បន្ននេះ ព្រលានយន្ដហោះអន្តរជាតិតេជោសម្រេចការសាងសង់បានប្រមាណ៦៨%ហើយ៕