ទំហំពាណិជ្ជកម្មកម្ពុជាជាមួយប្រទេសអាសិបសម្រេចបាន​ប្រមាណ ៨ ៣៦៤ លានដុល្លារនៅត្រីមាសទី១

ក្នុងត្រីមាសទី១ ឆ្នាំ២០២៤ ទំហំពាណិជ្ជកម្មកម្ពុជា ជាមួយបណ្តាប្រទេសដៃគូចំនួន១៤ នៃកិច្ចព្រមព្រៀងសេដ្ឋកិច្ចគ្រប់ជ្រុងជ្រោយតំបន់អាសិប (RCEP) សម្រេចបានទឹកប្រាក់ប្រមាណ ៨ ៣៦៤ លានដុល្លារអាមេរិក។

ឯកឧត្តម ប៉ែន សុវិជាតិ រដ្ឋលេខាធិការ និងជាអ្នកនាំពាក្យក្រសួងពាណិជ្ជកម្ម បានមានប្រសាសន៍ថា ពាណិជ្ជកម្មរបស់កម្ពុជាជាមួយបណ្តាប្រទេស RCEP បានកើនឡើង ដោយសារការអនុគ្រោះពាណិជ្ជកម្មក្រោមកិច្ចព្រមព្រៀងពាណិជ្ជកម្មតំបន់។ ជាក់ស្ដែងនៅក្នុងត្រីមាសទី១ ឆ្នាំ២០២៤កន្លងទៅនេះ ការនាំចេញរបស់កម្ពុជាទៅកាន់បណ្តាប្រទេស RCEP មានប្រមាណ ២ ៦៩៥,៦៥ លានដុល្លារ កើនជាង២៥,៧៦ភាគរយ។ ចំណែកការនាំចូលវិញពីប្រទេសដៃគូវិញមាន ៥ ៦៦៩,១៤ លានដុល្លារ កើន១០,១៣ភាគរយ។

ឯកឧត្តម ប៉ែន សុវិជាតិ បានលើកឡើងថា ការនាំចេញរបស់កម្ពុជា ភាគច្រើនដូចជា៖ សម្លៀកបំពាក់ ស្បែកជើង កាបូប សម្ភារធ្វើដំណើរ គ្រឿងឧបភោគបរិភោគ(អង្ករ គ្រាប់ធញ្ញជាតិ ត្រី សាច់) គឺនៅតែរក្សាបានកំណើនយ៉ាងល្អប្រសើរ។

គួរបញ្ជាក់ថា នៅក្នុងត្រីមាសទីមួយឆ្នាំ២០២៤ ទំហំពាណិជ្ជកម្មរវាងប្រទេសកម្ពុជា និងប្រទេសជាសមាជិក RCEP ស្មើនឹងចំនួន ៦៥,៨៣% នៃទំហំពាណិជ្ជកម្មសរុបក្នុងអំឡុងពេលដូចគ្នាឆ្នាំនេះ។ កាលពីឆ្នាំ២០២៣ ទំហំពាណិជ្ជកម្មរវាងកម្ពុជា និងប្រទេសដៃគូ RCEP មានចំនួន ២៩,៤៥ ពាន់លានដុល្លារអាមេរិក។

គួររំលឹកថា កិច្ចព្រមព្រៀងពាណិជ្ជកម្មភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP) ដែលមានកម្ពុជាជាសមាជិកផងនោះ ត្រូវបានចូលជាធរមាននៅថ្ងៃទី១ ខែមករា ឆ្នាំ២០២២ បន្ទាប់ពីចរចាអស់ជិត១០ឆ្នាំ។ កិច្ចព្រមព្រៀងពាណិជ្ជកម្មនេះបានអនុញ្ញាតឱ្យកម្ពុជារួចពន្ធលើទំនិញជាច្រើន ជាពិសេសទំនិញកសិកម្ម ទំនិញកសិកម្មកែច្នៃ និងទំនិញឧស្សាហកម្មជាដើម។

ប្រជាជាតិ RCEP តំណាងឱ្យប្រជាជនប្រហែល ២,២ ពាន់លាននាក់ ឬ ៣០ ភាគរយ នៃចំនួនប្រជាជនពិភពលោកដែលរួមចំណែក ២៦,២ ទ្រីលានដុល្លារដល់ផលិតផលក្នុងស្រុកសរុប (GDP) ស្មើនឹងប្រមាណ ៣០ ភាគរយនៃផលិតផលក្នុងស្រុកសរុបទូទាំងពិភពលោក។