ខ្លាចទប់មិនឈ្នះ ! ប្រទេស២នេះសម្រេចចាក់វ៉ាក់សាំងដល់ទៅ៣ដូសសម្រាប់ប្រជាជនខ្លួន

[ស្វែងរកអចលនទ្រព្យគ្រប់ប្រភេទមាននៅ Compass - សេចក្តីរាយការណ៍ព័ត៌មាន] ប្រទេសអារ៉ាប់រួមបាននិយាយនៅថ្ងៃអង្គារថា ខ្លួននឹងចាក់វ៉ាក់សាំងកូវីដ១៩ឈ្មោះថា Sinopharm ដូសទី៣បន្ថែមក្នុងរយៈពេល៦ខែបន្ទាប់ សម្រាប់ប្រជាជនណាដែលបានចាក់រួចរាល់២ដូស ។ នេះបើយោងតាមប្រភពព័ត៌មានពីទីភ្នាក់ងារសារព័ត៌មាន Reuters ។

សារព័ត៌មាន Reuters ក៏បានឱ្យដឹងដែរថា ប្រទេសបារ៉ែនដែលជាប្រទេសជិតខាងនៅឈូងសមុទ្រប្រទេសអារ៉ាប់រួមក៏បាននិយាយដែរថា ខ្លួននឹងផ្តល់វ៉ាក់សាំងលើកទី៣ យ៉ាងហោចណាស់ប្រាំមួយខែបន្ទាប់ពីការចាក់លើកទី ២ ដោយចាប់ផ្តើមពីក្រុមងាយរងគ្រោះមុនគេ ។

អាជ្ញាធរគ្រប់គ្រងវិបត្តិនិងគ្រោះមហន្តរាយជាតិ (NCEMA) បាននិយាយថា ការចាក់របស់អារ៉ាប់រួម គឺជាផ្នែកមួយនៃ “យុទ្ធសាស្ត្រសកម្មរបស់ខ្លួន ក្នុងការផ្តល់ការការពារអតិបរិមាសម្រាប់សង្គម” ដោយផ្តល់អាទិភាពដល់អ្នកដែលមានអាយុលើស៦០ឆ្នាំ ឬកំពុងមានជំងឺរ៉ាំរ៉ៃ ។

អង្គការសុខភាពពិភពលោកហៅកាត់ “WHO” ដែលកាលពីសប្តាហ៍មុនបានអនុម័តវ៉ាក់សាំង Sinopharm សម្រាប់ការប្រើប្រាស់ជាបន្ទាន់ បាននិយាយថា ការសាកល្បងទ្រង់ទ្រាយធំដំណាក់កាលទី៣ បានបង្ហាញថា វ៉ាក់សាំងទាំង២ដូសដែលចាក់ចន្លោះពេល២១ថ្ងៃ គឺមានប្រសិទ្ធភាព៧៩ភាគរយប្រឆាំងនឹងការឆ្លងជំងឺកូវីដ-១៩ ។

សូមបញ្ជាក់ផងដែរថា ប្រទេសអារ៉ាប់រួមនៅថ្ងៃអង្គារបានរាយការណ៍ថាមានការឆ្លងមេរោគថ្មីចំនួន ១២៧០ ករណី ដែលធ្វើឱ្យមានចំនួនសរុបដល់ទៅ ៥៤៨.៦៨១ ករណីជាមួយនឹងការស្លាប់ ១៦៣៧ នាក់ ៕

ប្រភព ៖ Reuters , អត្ថបទដោយ ៖ Samnang , ប្រធានផ្នែកនិពន្ធ ៖ Sunnie, និពន្ធនាយក / ផលិតករ ៖ Nicole

កាន់តែងាយស្រួលស្វែងរកអចលនទ្រព្យបានគ្រប់ប្រភេទជាមួយគេហទំព័រ Compass ទាំងក្នុង និងក្រៅប្រទេសមាននៅ ៖ Cambodia丨Laos | Myanmar | Singapore丨Philippines丨Thailand丨UAE