ក្រៅពីជំនួញបច្ចេកវិទ្យាមហាសេដ្ឋី Jack Ma បោះទុនរាប់រយលានដុល្លារលើអចលនទ្រព្យធំៗទាំងនេះ

នៅពីក្រោយភាពជោគជ័យផ្នែកជំនួញក្នុងវិស័យបច្ចេកវិទ្យា លោក Jack Ma និងក្រុមហ៊ុន Alibaba របស់លោក ក៏បានវិនិយោគជាច្រើនលានដុល្លារលើវិស័អចលនទ្រព្យផងដែរ។ ខាងក្រោមនេះគឺជាព័ត៌មានមួយចំនួនពីការទិញអចលនទ្រព្យរបស់ Jack Ma ៖

តាមប្រភពពីគេហទំព័រ Business Insider បានចេញផ្សាយថា នៅក្នុងឆ្នាំ២០១៥ លោក Jack Ma បានទិញផ្ទះមួយកន្លែងនៅទីក្រុងហុងកុងដែលមានតម្លៃរហូតដល់១៩១លានដុល្លារអាមេរិក ដែលជាតម្លៃថ្លៃជាងគេបំផុតនៅក្រុងហុងកុង ហើយតម្លៃនៃការទិញផ្ទះនេះគឺថ្លៃជាងគេបំផុតក្នុងតំបន់អាស៊ីនាពេលនោះ ។ 

តាមប្រភពសារព័ត៌មានអាមេរិក The Wall Street Journal បានរាយការណ៍ថា ក្នុងឆ្នាំ២០១៥ដដែលលោក Ma បានទិញដីមួយកន្លែងមានទំហំ ១១៣៧១ ហិកតាក្នុងទំហំទឹកប្រាក់២៣លានដុល្លារអាមេរិក ដែលមានទីតាំងនៅ Brandon Park ដែលជាតំបន់ភ្នំស្ថិតនៅទិសឥសាន្តនៃក្រុងញ៉ូយ៉ក សហរដ្ឋអាមេរិក ។ ដីនោះមានផ្ទះពីរខ្នងអមដោយបឹងបួរ និងព្រៃព្រឹក្សាដ៏ស្រស់បំព្រង ។ មួយឆ្នាំបន្ទាប់មកលោក Ma ក៏បានទិញដីចម្ការទំពាំងបាយជូទំហំ៨៤ហិកតា ស្ថិតនៅភាគត្បូងនៃប្រទេសបារាំងផងដែរ ។

បើយោងតាមសារព័ត៌មាន South China Morning Post និង Financial Times ក្រៅពីការវិនិយោគជាលក្ខណៈបុគ្គល ក្រុមហ៊ុន Alibaba របស់លោក Jack Ma ក៏បានសម្រេចទិញភាគហ៊ុន ៥០ ភាគរយនៅក្នុងអគារពាណិជ្ជកម្ម AXA Tower នៅសឹង្ហបុរីក្នុងតម្លៃប្រមាណ ១.២ ពាន់់លានដុល្លារអាមេរិក កាលពីខែឧសភា ឆ្នាំ២០២០ កន្លងទៅ ។ 

កាលពីខែ សីហា ឆ្នាំ២០២០ ក្រុមហ៊ុន Alibaba ក៏បានសម្រេចទិញយកភាគហ៊ុនពីក្រុមហ៊ុនភ្នាក់ងារអចលនទ្រព្យ E-House China Enterprise Holdings ដែលជាក្រុមហ៊ុនចុះបញ្ជីផ្សារហ៊ុនហុងកុង ក្នុងចំនួនទឹកប្រាក់ ១០៦ លានដុល្លារ ដែលធ្វើឱ្យក្រុមហ៊ុន Alibaba មានចំណែកភាគហ៊ុន ១៣.៣ ភាគរយ ។ 

បន្ថែមពីនេះ បើតាមសេចក្តីរាយការណ៍របស់សារព័ត៌មាន Yicai Global ដែលមានមូលដ្ឋាននៅចិនចេញផ្សាយជាភាសារអង់គ្លេសថា ភាគីទាំងពីរក៏បានសម្រេចបោះទុនវិនិយោគរួមគ្នាក្នុងទំហំទឹកប្រាក់សរុប ៧១៦.៦ លានដុល្លារអាមេរិកផ្សេងទៀត ដើម្បីឱ្យដាក់ដំណើការកម្មវិធី Tmall Haofang ដែលជាកម្មវិធីទិញ-លក់អចលនទ្រព្យតាមប្រព័ន្ធអនឡាញ ៕

អត្ថបទដោយ ៖ សំណាង