នាយករដ្ឋមន្ត្រីថៃ ៖ «ប្រជាជនថៃមិនមែនជាសត្វកណ្តុរសម្រាប់ធ្វើតេស្តប្រសិទ្ធភាពវ៉ាក់សាំងកូវីដ១៩ទេ» !

យោងតាមប្រភពពីទីភ្នាក់ងារសារព័ត៌មានថៃ Bangkok Post បានចេញផ្សាយនាថ្ងៃទី១៨ ខែមករា ឆ្នាំ២០២០ នេះឱ្យដឹងថា នាយករដ្ឋមន្រ្តីថៃលោក ប្រាយុទ្ធ ចាន់អូចា បានថ្លែងថា លោកនឹងមិនអនុញ្ញាតឱ្យជនជាតិថៃត្រូវគេប្រើជាសត្វកណ្តុរដើម្បីធ្វើតេស្តប្រសិទ្ធភាពវ៉ាក់សាំងកូវីដ១៩នោះទេ ដោយលោកបាននិយាយថា ការចាក់វ៉ាក់សាំងកូវីដ១៩ក្នុងប្រទេសថៃលុះត្រាណាតែវ៉ាក់សាំងនោះទទួលស្គាល់ប្រសិទ្ធភាព១០០%ជាមុនសិន ។ 

នៅលើទំព័រហ្វេសប៊ុករបស់លោកកាលពីថ្ងៃអាទិត្យកន្លងទៅនេះលោក ប្រាយុទ្ធ បានឆ្លើយតបនឹងរបាយការណ៍អំពីផលប៉ះពាល់បន្ទាប់ពីការគ្រប់គ្រងវ៉ាក់សាំងកូវីដ១៩នៅក្នុងប្រទេសមួយចំនួន ។ 

លោកនាយករដ្ឋមន្រ្តីថៃរូបនេះបានសរសេរថា ៖«យើងត្រូវរង់ចាំអ្នកជំនាញកំណត់ថា តើពួកគេមានអ្វីដែលត្រូវធ្វើជាមួយវ៉ាក់សាំង ឬថាតើមានកត្តាផ្សេងទៀតដូចជាស្ថានភាពសុខភាពឬអាយុ ។ ប្រទេសខ្លះចង់បានវ៉ាក់សាំងលឿនហើយសំរេចចិត្តប្រើវ៉ាក់សាំងដែលគ្មានប្រសិទ្ធភាព និងសុវត្ថិភាពមិនទាន់បានធ្វើតេស្តពេញលេញនៅឡើយ» ។ 

លោកបានបញ្ជាក់ផងដែរថា ៖«សម្រាប់ប្រជាជនថៃខ្ញុំបានសំរេចចិត្តចៀសវាងការប្រថុយប្រថានបែបនេះ ។ ខ្ញុំនឹងមិនអនុញ្ញាតឱ្យមានការប្រើវ៉ាក់សាំងដែលមិនត្រូវបានធ្វើតេស្តពេញលេញ ហើយនឹងមិនអនុញ្ញាតឱ្យប្រទេសនេះ (ថៃ) ត្រូវបានគេប្រើជាប្រធានបទសម្រាប់ពិសោធន៍ ។ ដើម្បីជាប្រយោជន៍នៃការប្រុងប្រយ័ត្នខ្ញុំបានដាក់ចេញនូវគោលនយោបាយសំខាន់មួយនោះគឺយើងចាំបាច់ត្រូវប្រាកដថា វ៉ាក់សាំងមានសុវត្ថិភាពមុនពេលប្រើលើប្រជាជនថៃ» ៕

អត្ថបទដោយ ៖ សំណាង