សម្តេចប្រកាសដំណឹងល្អ ! មុនចូលឆ្នាំខ្មែរប្រជាពលរដ្ឋ៥០ម៉ឺននាក់នឹងបានចាក់វ៉ាក់សាំងកូវីដ១៩

រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានអញ្ជើញជាអធិបតីក្នុងពិធីសម្ពោធសមិទ្ធផលថ្មីៗរបស់ក្រសួងសាធារណការ និងដឹកជញ្ជូននាថ្ងៃទី២២ ខែមករា ឆ្នាំ២០២១ ដោយសម្តេចប្រកាសនូវដំណឹងល្អសម្រាប់ប្រជាពលរដ្ឋដោយមុនពេលចូលឆ្នាំខ្មែរវ៉ាក់សាំងប្រឆាំងកូវីដ១៩នឹងត្រូវចាក់ជូនប្រជាពលរដ្ឋ៥០ម៉ឺននាក់ ខណៈវ៉ាក់សាំងទី១គឺត្រូវចាក់លើខ្លួនសម្តេចផ្ទាល់តែម្តង ។

សម្ដេចតេជោ ហ៊ុន សែន នាយករដ្ឋមន្ត្រីបានបន្តថា មុនពេលចូលឆ្នាំថ្មីប្រពៃណីខ្មែរវ៉ាក់សាំងប្រឆាំងមេរោគកូវីដ-១៩នឹងនាំយកពីប្រទេសចិនមកកាន់កម្ពុជា ហើយនឹងចាក់ជូនប្រជាពលរដ្ឋឱ្យបាន៥០ម៉ឺននាក់ ។

សម្ដេចបានថ្លែងយ៉ាងដូច្នេះថា ៖ «មុនចូលឆ្នាំខ្មែរ កម្ពុជាត្រូវទទួលបាននូវការចាក់វ៉ាក់សាំងចំនួន៥០ម៉ឺននាក់ ព្រោះនៅពេលខាងមុខ៣០ម៉ឺនដូសនឹងមកដល់សម្រាប់មនុស្ស១៥ម៉ឺននាក់ ប៉ុន្តែមិត្តចិនកំពុងតែជំរុញឱ្យបាន៦០ម៉ឺនដូស ។ បើបាន៦០ម៉ឺនដូសនៅខែកុម្ភៈ យើងនឹងចាក់បាន៣០ម៉ឺននាក់ សល់៤០ម៉ឺនដូសទៀតនឹងចាក់២០ម៉ឺននាក់ ដូច្នេះមុនចូលឆ្នាំខ្មែរគឺនឹងបាន៥០ម៉ឺននាក់ ។ ម្ជុលទីមួយនឹងចាក់លើខ្លួនខ្ញុំមុនគេ....ចាក់ហើយ ខ្ញុំនឹងធ្វើសន្និសីទកាសែតពីមន្ទីរពេទ្យកាល់ម៉ែត ដើម្បីធ្វើឱ្យប្រជាជនកម្ពុជាច្បាស់» ។

សម្ដេចតេជោ ហ៊ុន សែន បានថ្លែងថា នៅពេលភាគីចិនបញ្ជូនវ៉ាក់សាំងប្រឆាំងមេរោគកូវីដ-១៩ មកដល់កម្ពុជាភ្លាម សម្តេចតេជោនឹងទៅទទួលដល់អាកាសយានដ្ឋានអន្តរជាតិភ្នំពេញផ្ទាល់តែម្ដង ដើម្បីបង្ហាញអំពីការថ្លែងអំណរគុណចំពោះទឹកចិត្តដ៏ល្អប្រពៃរបស់មិត្តចិន ដែលបានផ្ដល់ជំនួយវ៉ាក់សាំងនេះ ហើយម្ជុលដំបូងបង្អស់នឹងចាក់លើខ្លួនសម្ដេចផ្ទាល់ ៕