អ្នកឧកញ៉ា ឡេង ណាវ៉ាត់ត្រា ប្រើពេលខ្លីផ្តាច់ខ្លួនពីពលករកូរ៉េមកជាសេដ្ឋីអចលនទ្រព្យព្រោះតែមូលហេតុ១នេះ

ធ្លាប់ជាអតីតពលករនៅប្រទេសកូរ៉េ ពេលនេះអ្នកឧកញ៉ា ឡេង ណាវ៉ាត់ត្រា ត្រូវបានគេដឹងថា បានជួយសង្គមច្រើនក្នុងនោះមានជួយដល់មន្ទីរពេទ្យគន្ធបុប្ផា កាកបាទក្រហម និង កិច្ចការសង្គមជាច្រើនទៀត ក្នុងនោះក្នុងចង្កោមអ្នកសិល្បៈដែលមានបញ្ហាសុខភាពក៏ដូចជាបញ្ហាជីវភាព លោកតែងតែជួយមិនដាច់ឡើយ ។

តាមការឱ្យដឹងរបស់អ្នកឧកញ៉ា ឡេង ណាវ៉ាត់ត្រា បានឱ្យដឹងថា មូលហេតុ១ដែលអាចធ្វើឱ្យលោកអាចផ្តាច់ខ្លួនពីពលករកូរ៉េមកជាសេដ្ឋីអចលនទ្រព្យដ៏ល្បីម្នាក់នៅក្នុងប្រទេសកម្ពុជាដោយប្រើពេលវេលាខ្លីបំផុតនោះគឺអ្នកឧកញ៉ាបានថ្លែងថា «លោកបានប្រថុយប្រថាននៅក្នុងការធ្វើវិនិយោគអចលនទ្រព្យ» ។

អ្នកឧកញ៉ាបានឱ្យដឹងទៀតថា ៖ «ដំបូងឡើងលោកបាន ទិញដីទុកដែលដីនោះមានតម្លៃ ៤ម៉ឺនដុល្លារ ប៉ុន្តែលុយក្នុងដៃមានតែប្រមាណជាង១ម៉ឺន១ពាន់ដុល្លារប៉ុណ្ណោះ ក្រោមការសន្សំពីប្រទេសកូរ៉េ នៅឆ្នាំ២០១៤ ។ ដោយលុយចំនួន៣ម៉ឺន ២ពាន់ គឺលោកត្រូវខ្ចីពីធនាគារ និងមិត្តភក្តខ្លះ ប៉ុន្តែលោកបានបញ្ជាក់ថា ការដែលលោកហ៊ានខ្ចីលុយគេនោះ មកពីលោកអាងថា មានឡានបែន សម្រាប់រកប្រចាំថ្ងៃ ដើម្បីរករំដោះប្រាក់ពីធនាគារ ។ រហូតដល់ចន្លោះពេល ៨ខែ ទៅ១ឆ្នាំ ដីដែលលោកទិញនោះ លក់បាន ១២ម៉ឺនដុល្លារ ។ បន្ទាប់ពីលក់ដីបានលុយ ជាង១២ម៉ឺនដុល្លារនោះហើយ លោកក៏បាន យកលុយនោះទៅទិញដី៤កន្លែងទុក ដោយគ្រាន់តែគិតថា ទិញទុកលក់ចំណេញប៉ុណ្ណោះ» ។

សេដ្ឋីអចលនទ្រព្យរូបនេះបានបន្ថែមថា ៖ «ដោយចៃដន្យមានមិត្តភក្តរបស់លោកម្នាក់ សុំចែកដីនោះ៥ម៉ែត្រ ដើម្បីធ្វើផ្ទះ១ល្វែង បន្ទាប់មកមានអ្នកផ្សេងជាច្រើនទៀត មកសុំចែកដីយកធ្វើផ្ទះជាបន្តបន្ទាប់ រហូតអស់ដីនោះដោយមិនដឹងខ្លួន ព្រមទាំងបានលុយចំណេញច្រើនផងដែរ ។ បន្ទាប់មកលោកបានដឹងថា វិស័យមួយនេះពិតជាងអាចកែប្រែវាសនារបស់លោកបានពិតមែន ក៏លោកសម្រេចចិត្ត យកលុយដែលចំណេញនោះ ព្រមទាំងខ្ចីលុយ ពីធនាគារបន្ថែមដើម្បីយកទៅ ទិញដីនៅផ្លុវជាតិលេខ៣ ដើម្បីពុះឡូតិ៍លក់ ដែលបានចូលហ៊ុនគ្នាជាមួយមិត្តភក្តិរបស់លោក២នាក់» ។

ចាប់តាំងពីពេលនោះមក អ្នកឧកញ៉ា ឡេង ណាវ៉ាត់ត្រា កាន់តែជោគជ័យខ្លាំងឡើងៗជាបន្តបន្ទាប់លើវិស័យអចលនទ្រព្យនៅក្នុងប្រទេសកម្ពុជាដោយទទួលបានកេរ្តិ៍ឈ្មោះកាន់តែល្បីល្បាញ និងទទួលបានការគាំទ្រកាន់តែច្រើនឡើងៗ រហូតទទួលបានគោរមងារ «អ្នកឧកញ៉ា» ។ ចំណុចដែលលោកជឿជាក់លើខ្លួនឯងដែល អាចលក់បាន គឺដោយសារ ការទទួលខុសត្រូវ ភាពស្មោះត្រង់ របស់យើងពីមុន ដែលធ្លាប់បានធ្វើកន្លងមក ដែលធ្វើឱ្យអតិថិជនគាត់ជឿទុកចិត្ត គ្រប់គម្រោងដែលគាត់បានចេញមក ៕

អត្ថបទដោយ ៖ សំណាង