លេងធម៌ក្តៅហើយលើកនេះ ! យោធាមីយ៉ាន់ម៉ាចេញច្បាប់អាជ្ញាសឹកបង្ក្រាបក្រុមបាតុករ

យោងតាមការចេញផ្សាយដោយទីភ្នាក់ងារសារព័ត៌មាន Channel News Asia ដែលបានចេញផ្សាយនៅថ្ងៃទី០៩ ខែកុម្ភៈ ឆ្នាំ២០២១ បានចេញផ្សាយថា កំណើនប្រជាជនមីយ៉ាន់ម៉ាកើនឡើងរាប់ម៉ឺននាក់ដោយបានប្រមូលផ្តុំគ្នាធ្វើបាតុកម្មតតាំងនឹងរដ្ឋប្រហាររបស់កម្លាំងយោធាដើម្បីទាមទារឱ្យដោះលែងលោកស្រី អ៊ុង សានស៊ូជី និងក្រុមមន្ត្រីមួយចំនួនដែលត្រូវបានឃាត់ខ្លួន ។

តាមប្រភព Channel News Asia បានឱ្យដឹងថា ស្ថានការណ៍ប្រទេសមីយ៉ាន់ម៉ានាពេលបច្ចុប្បន្នកាន់តែក្តៅគគុកឡើងៗដោយបានចេញច្បាប់អាជ្ញាសឹកបង្ក្រាបក្រុមបាតុករខាងលើ ដែលច្បាប់អាជ្ញាសឹកដែលបានចេញនេះគ្របដណ្ដប់លើក្រុងតូចៗចំនួន៧នៃទីក្រុង Mandalay ដោយហាមឃាត់ប្រជាជនពីការធ្វើបាតុកម្មតវ៉ា ឬការប្រមូលផ្ដុំគ្នាចាប់ពីមនុស្ស៥នាក់ឡើងទៅ រួមជាមួយបម្រាមគោចរចាប់ពីម៉ោង ៨យប់ ដល់ម៉ោង ៤ព្រឹក ។ 

ប្រភពពីទីភ្នាក់ងារសារព័ត៌មានខាងលើបានឱ្យដឹងទៀតថា កម្លាំងយោធាមីយ៉ាន់ម៉ាក៏បានចេញសារព្រមានមួយផងដែរពីការប្រើកម្លាំងបាយបង្រ្កាបលើក្រុមបាតុករដែលកំពុងនាំគ្នាធ្វើបាតុកម្មតវ៉ាប្រឆាំងរដ្ឋប្រហារ និងទាមទារឱ្យដោះលែងលោកស្រី អ៊ុន សានស៊ូជី រួមទាំងមន្ត្រីជាន់ខ្ពស់ជាច្រើនរូបទៀតនៃរដ្ឋាភិបាលរបស់លោកស្រីដែលកំពុងជាប់ឃុំឃាំង ។

គួររម្លឹកផងដែរថា ចលនាបាតុកម្មដ៏កក្រើកនៅក្នុងប្រទេសមីយ៉ាន់ម៉ានេះបានផ្ទុះឡើងកាលពីថ្ងៃសុក្រសប្តាហ៍មុនបន្ទាប់ពីយោធាមីយ៉ាន់ម៉ាបានឡើងគ្រប់គ្រងអំណាចក្រោយចាប់ខ្លួនលោកស្រី អ៊ុង សានស៊ូជី និងថ្នាក់ដឹកនាំមួយចំនួនទៀតរបស់រដ្ឋាភិបាលលោកស្រី ក្រោមហេតុផលថាការបោះឆ្នោត កាលពីខែវិច្ឆិកា ឆ្នាំ២០២០ បានប្រព្រឹត្តទៅដោយគ្មានតម្លាភាព ឬមានការក្លែងបន្លំ ៕

អត្ថបទដោយ ៖ សំណាង