នេះហើយជាមូលហេតុដែលធ្វើឱ្យបុរសជនជាតិខ្មែរស្លាប់ដោយសារកូវីដ១៩

រាជធានីភ្នំពេញ ៖ អ្នកជំងឺខ្មែរដំបូងដែលបានស្លាប់ដោយសារជំងឺកូវីដ១៩កាលពីវេលាម៉ោង១០និង៤០នាទីព្រឹក ថ្ងៃទី១១ ខែមីនា ឆ្នាំ២០២១ ពេលនេះត្រូវបានទម្លាយមូលហេតុដោយសារតែអ្នកជំងឺមានបញ្ហារលាកសួតរ៉ាំរ៉ៃបណ្តាលមកពីគាត់ពិសាបារីជាច្រើនឆ្នាំទើបពេលកើតកូវីដ១៩ធ្វើឱ្យលោកបាត់បង់ជីវិត ។ នេះបើយោងតាមប្រសាសន៍លោកស្រីវេជ្ជបណ្ឌិត យក់ សម្បត្តិ រដ្ឋលេខាធិការក្រសួងសុខាភិបាល ។

លោកស្រីរដ្ឋលេខាធិការក្រសួងសុខាភិបាលបានបន្តថា ៖«អ្នកជំងឺកូវីដដែល ស្លាប់នឹងគាត់ជាអ្នកជំងឺម្នាក់មានបញ្ហាសួតរ៉ាំរ៉ៃដោយសារគាត់ជាអ្នកជក់បារីច្រើន និងជក់ច្រើនឆ្នាំហើយ ដែលមានការរលាកសួតហើយដល់គាត់មានកូវីដ១៩វិជ្ជមានទៀត វាធ្វើឲ្យសួតគាត់កាន់ទ្រុឌទ្រោម»។ 

លោកស្រីបានឱ្យដឹងទៀតថា គ្រូពេទ្យបានខិតខំព្យាយាមយកចិត្តទុកដាក់ព្យាបាលគាត់ជាទីបំផុត ដោយបានដាក់អុកស៊ីហ្សែនជួនគាត់ជាច្រើនថ្ងៃ ហើយចុងក្រោយនេះ គ្រូពេទ្យបានប្រើប្រាស់ម៉ាស៊ីនជំនួយដង្ហើមទៀត តែដោយសារតែសួតរបស់គាត់មានការរលាកខ្លាំង ទើបយើងមិនអាចជួយសង្គ្រោះគាត់បាន ។

ក្រសួងសុខាភិបាលបានបញ្ជាក់ទៀតថា សពរបស់អ្នកកើតជំងឺកូវីដ-១៩នេះមិនអាចរក្សាទុកបានយូរនោះទេ ពោលនឹងត្រូវរៀបចំបូជាតាមអ្វីដែលជាការកំណត់របស់ប្រមុខនៃរាជរដ្ឋាភិបាល នាពេលថ្មីៗនេះ ៕