អ្នកនាង អាន សុធីតា អ្នកជំនាញផ្នែកអចលនទ្រព្យ និងនាយិការក្រុមហ៊ុន CBRE Cambodia កាលពីថ្មីៗនេះ បានសំដែងពីការព្រួយបារម្ភចំពោះអ្នកទិញអចលនទ្រព្យនៅប្រទេសកម្ពុជា ថាងាយនឹងរងហានិភ័យខ្ពស់ពីការផ្ដល់កម្ចីអចលនទ្រព្យដែលមានភាពធូររលុង ជាពិសេសពីម្ចាស់គម្រោង។
ការព្រួយបារម្ភនេះ គឺបន្ទាប់ពីអង្គការអន្តរជាតិមួយចំនួន បានតឿនដល់កម្ពុជាថាត្រូវតែរឹតបន្តឹងវិធានការផ្តល់ប្រាក់កម្ចីទៅលើវិស័យអចលនទ្រព្យ ដើម្បីជៀសវាងហានិភ័យ។
របាយការណ៍ចុងក្រោយរបស់មូលនិធិរូបិយវត្ថុអន្តរជាតិ ឬហៅកាត់ថា IMF បានបង្ហាញថា ការផ្តល់ប្រាក់កម្ចីទៅឲ្យអ្នកអភិវឌ្ឍន៍អចលនទ្រព្យនៅកម្ពុជានៅតែមិនទាន់មានការត្រួតពិនិត្យ និងមិនមានការគ្រប់គ្រងឲ្យបានល្អនៅឡើយ ដែលជាកត្តាគួរឱ្យព្រួយបារម្ភ។
ដូចគ្នានេះដែរ ធនាគារអភិវឌ្ឍន៍អាស៊ីឬ ADB កាលពីពេលថ្មីៗនេះ ក៏បានក្រើនរំលឹកថា កម្ពុជាគួរតែកាត់បន្ថយហានិភ័យផ្នែកហិរញ្ញវត្ថុដែលកើតចេញពីការផ្តល់ឥណទានទៅលើវិស័យអចលនទ្រព្យ។
ជុំវិញបញ្ហានេះ អ្នកនាង អាន សុធីតា បានពន្យល់ថា អ្នកនាងមិនសូវបារម្ភប៉ុន្មានទេចំពោះ កម្ចីពីធនាគារ ព្រោះថាភាគច្រើនធនាគារ គឺមានគោលនយោបាយនិងការត្រួតពិនិត្យតឹងរឹងនិងហ្មត់ចត់មុននិងផ្ដល់កម្ចី ហើយមួយវិញទៀតការគ្រប់គ្រងលើប្រព័ន្ធហិរញ្ញវត្ថុនេះគឺជាកាតព្វកិច្ចរបស់ធនាគារជាតិ។ ប៉ុន្តែអ្នកនាងព្រួយបារម្ភខ្លាំងពីកម្ចីដែលផ្ដល់ដោយម្ចាស់គម្រោង។
គម្រោងអចលនទ្រព្យនៅកម្ពុជារួមមានគម្រោងលំនៅដ្ឋាន គម្រោងដីឡូ ជាច្រើន បាននិងកំពុងកើនឡើងជាបន្តបន្ទាប់។ លើសពីនេះ គម្រោងអចលនទ្រព្យនីមួយៗ សុទ្ធសឹងតែមានសេវាកម្មកម្ចីរំលោះរបស់ខ្លួន ដែលជាជម្រើសគួរឱ្យទាក់ទាញមួយសម្រាប់អ្នកទិញដែលចង់ទិញផ្ទះ ទិញដី លើកដំបូង ឬផ្ទះថ្មីរបស់ខ្លួន។
ខណៈពេលដែលទីផ្សារអចលនទ្រព្យនៅកម្ពុជាមានការប្រកួតប្រជែងខ្ពស់ ការអនុម័តផ្ដល់កម្ចីអចលនទ្រព្យ ដែលតម្រូវឱ្យអតិថិជនបង់រំលោះជាប្រចាំខែ ហាក់បីដូចជាមានភាពធូររលុង ក្នុងគោលបំណងដើម្បីទាក់ទាញដល់អតិជនឱ្យមកទិញអចលនទ្រព្យឲបានឆាប់រហ័ស។
អ្នកនាង អាន សុធីតា បានពន្យល់ថា៖ «បញ្ហានាពេលបច្ចុប្បន្នគឺ អ្នកម្ចាស់គម្រោងមិនសូវរឹតបន្តឹងចំពោះអ្នកទិញឡើយ ពោលគឺមិនបានសិក្សាឱ្យបានហ្មត់ចត់ទៅលើកម្រិតជីវភាពរបស់អ្នកទិញថាអាចមានលទ្ធផលក្នុងការបង់រំលោះប្រចាំខែបានឬទេ»។
«អ្វីដែលពួកគាត់ផ្ដោតសំខាន់គឺ លក់ចេញនូវគម្រោងរបស់ខ្លួនឱ្យបានច្រើន និងលក់ឲអស់តាមពេលកំណត់។ នេះគឺបញ្ហាចំបង តួរយ៉ាងដូចជា ក្នុងករណីដែលអ្នកទិញមិនអាចបង់រំលោះបានគ្រប់ចំនួន ឬអស់លទ្ធភាពបង់ជាប្រចាំខែដល់ម្ចាស់គម្រោង ម្ចាស់គម្រោងនឹងដកហូតអចលនទ្រព្យ តាមកិច្ចសន្យា។ ដូច្នេះ អ្នកដែលត្រូវខាតគឺ អ្នកទិញ។» អ្នកនាង បានបន្ត។
ជាមួយគ្នានេះដែរ អ្នកនាង ក៏បានធ្វើការអំពាវនាវដល់អ្នកទិញឱ្យពិចារណាលើស្ថានភាពហិរញ្ញវត្ថុរបស់ខ្លួនឱ្យបានច្បាស់លាស់ មុននឹងសម្រេចចិត្តបង់រំលោះអចលនទ្រព្យណាមួយ ចៀសវាងការប្រឈមនូវហានិភ័យដែលកើតឡើងដោយមិនបានព្រៀងទុក។
គួរបញ្ជាក់ផងដែរថា បើយោងតាម «ទស្សនវិស័យអភិវឌ្ឍន៍អាស៊ី (អេឌីអូ) ឆ្នាំ ២០១៩» ឥណទានដល់វិស័យឯកជនកើនឡើង ២៦,៤ ភាគរយពីមួយឆ្នាំទៅមួយឆ្នាំ គិតត្រឹមខែមិថុនា ឆ្នាំ ២០១៩ ខណៈការផ្តល់ប្រាក់កម្ចីសម្រាប់អចលនទ្រព្យកើនឡើង ៣៧,២ ភាគរយ ប្រាក់កម្ចីលំនៅដ្ឋានកើនឡើង ៣៩,៤ ភាគរយ និងកម្ចីសំណង់ ៣២,១ ភាគរយ នេះ។(ព័ត៍មាននេះមានប្រភពមកពីConstruction-Property.com)
0
()
Application has been successfully submitted
we will contact you soon, please pay attention
ទូរស័ព្ទ:+855 66300666
+855 (0) 23222206 (CN/EN/KH)
+86 023 67480241 (CN)
+855 (0) 66400666 (CN/EN/KH)