ឯកឧត្តម ឃួង ស្រេង អភិបាល នៃគណៈអភិបាលរាជធានីភ្នំពេញ បានណែនាំឲ្យអាជ្ញាធរខណ្ឌទាំង១៤ យកចិត្តទុកដាក់ទៅលើការស្នើសុំសេវាចុះបញ្ជីផ្ទេរកម្មសិទ្ធិអចលនទ្រព្យ របស់ប្រជាពលរដ្ឋ អោយកាន់តែប្រសើរជាមុន ។
“’ចង់ជួបចៅសង្កាត់ពិបាកជាងជួបរដ្ឋមន្ត្រី’ ពាក្យទាំងនេះ បានសាបរលាបទៅបាត់ហើយ ដោយសារការបង្កើតឲ្យមានក្រុមបដិសណ្ឋារកិច្ច នៅថ្នាក់សង្កាត់ ដើម្បីផ្ដល់សេវាជូនប្រជាពលរដ្ឋ។ ឯកឧត្តមបានថ្លែងដូច្នេះ ក្នុងកិច្ចប្រជុំស្ដីពីបែបបទ នៃការបញ្ជូនឯកសារស្នើសុំសេវាចុះបញ្ជីផ្ទេរកម្មសិទ្ធិអចលនទ្រព្យ ក្នុងភូមិសាស្ត្រខណ្ឌទាំង១៤ រាជធានីភ្នំពេញ ដែលរដ្ឋបាលរាជធានីភ្នំពេញ បានប្រារព្ធឡើង កាលពីដើមសប្ដាហ៍កន្លងទៅនេះ។ កិច្ចប្រជុំនេះ ធ្វើឡើងដើម្បីកែលម្អការផ្ដល់សេវាសាធារណៈ លើការស្នើសុំសេវាចុះបញ្ជីផ្ទេរកម្មសិទ្ធិអចលនទ្រព្យ ដល់ប្រជាពលរដ្ឋឱ្យកាន់តែមានប្រសិទ្ធភាព និងភាពស័ក្តិសិទ្ធិភាពជាងមុន។
ឯកឧត្តម ក៏បានវាយតម្លៃអំពីការអនុវត្តការងារកន្លងមក ថា “ការផ្ដល់សេវាជូនប្រជាពលរដ្ឋ កន្លងមកនេះឃើញថា បានល្អប្រសើរហើយ ប៉ុន្តែយើងនៅតែខ្វះខាត ទៅនឹងអ្វីដែលជាការណែនាំរបស់ក្រសួងដែនដី” ។
គេសង្កេតឃើញថា ប៉ុន្មានឆ្នាំចុងក្រោយនេះ រដ្ឋាភិបាលបានដាក់ចេញនូវផែនការកំណែទម្រង់យ៉ាងច្រើនលើគ្រប់វិស័យ ជាពិសេសក្របខណ្ឌកែទម្រង់វិមជ្ឈការ និងសហវិមជ្ឈការ ដែលរាជរដ្ឋាភិបាលតាមរយៈក្រសួងមហាផ្ទៃ និងក្រសួងដែនដី ដែលមានចំណុចច្រើនពាក់ព័ន្ធនឹងវិស័យអចលនទ្រព្យ។
ក្នុងនោះ មានចំណុចមួយ បានបញ្ជាក់យ៉ាងច្បាស់ ពីការប្រគល់សិទ្ធិក្នុងការចុះហត្ថលេខាតាមបញ្ជា (ត.ប)អភិបាលនៃគណៈអភិបាលខណ្ឌសាមី ជូនប្រធានការិយាល័យរៀបចំដែនដីនគរូបនីយកម្ម និងសំណង់ និងភូមិបាលខណ្ឌ ដោយប្រើប្រាស់ត្រារបស់ការិយាល័យផ្ទាល់ ក្រោយពីមានការបញ្ជាក់ស្នាមមេដៃពី ចៅសង្កាត់ក្នុងសំណុំឯកសារចុះបញ្ជីផ្ទេរកម្មសិទ្ធិ។ បន្ទាប់មក គេត្រូវធ្វើដីកាបញ្ជូនផ្ទាល់ទៅមន្ទីរដែនដីនគរូបនីយកម្មសំណង់ និងសុរិយោដីរាជធានីភ្នំពេញ តាមនីតិវិធី និងលិខិតបទដ្ឋានគតិយុត្តជាធរមាន។
ឯកឧត្តម បានបន្តថា “ថ្នាក់ជាតិ មានការកែសម្រួលជាច្រើន រហូតទៅដល់រដ្ឋមន្ត្រីក្រសួងដែនដីនគរូបនីយកម្ម និងសំណង់ បានធ្វើការកែសម្រួលមួយចំនួនផងដែរ។ ប៉ុន្តែកិច្ចការងារនេះ នៅតែមិនទាន់បានល្អប្រសើរនៅឡើយ ដូច្នេះទើបរាជរដ្ឋាភិបាល សម្រេចផ្ទេរមុខងារនេះ មកថ្នាក់ក្រោមជាតិ ដើម្បីធ្វើយ៉ាងណាផ្ដល់សេវាជូនប្រជាពលរដ្ឋឲ្យកាន់តែល្អប្រសើរ។
ការផ្ទេរមុខងារមកថ្នាក់ក្រោមជាតិនេះ គឺធ្វើយ៉ាងណាឲ្យ ការផ្ដល់សេវាជូនប្រជាពលរដ្ឋមានប្រសិទ្ធភាព មានតម្លាភាព និងមានល្បឿនលឿនជាងមុន ។
អ្វីដែលពិសេសជាងនេះថែមទៀតនោះ ឯកឧត្តម បានក្រើនរំលឹកអាជ្ញាធរទាំង ១៤ ខណ្ឌ ឱ្យមានការ ត្រៀមលក្ខណៈឲ្យបានស្រេចបាច់ សម្រាប់ផែនការកំណែទម្រង់របស់រដ្ឋាភិបាល។ លោកបានរំលេចឱ្យដឹងថា នៅថ្ងៃខាងមុខ អាចនឹងមានច្រកចេញចូលតែមួយ នៅត្រឹមថ្នាក់សង្កាត់តែម្តង៕(ព័ត៌មាននេះមានប្រភពមកពីConstruction-Property.com)
0
()
Application has been successfully submitted
we will contact you soon, please pay attention
ទូរស័ព្ទ:+855 66300666
+855 (0) 23222206 (CN/EN/KH)
+86 023 67480241 (CN)
+855 (0) 66400666 (CN/EN/KH)